Números 24:1-25
24 Israel runakunata Tayta Dios bendicionta qoshqanta tantiyarmi Balaam Tayta Diosta tapukuq mana aywarqannatsu. Tsaypita chunyaqpa tikraykur
2 rikachakushqanchömi rikarqan Israel runakuna trïbunpa trïbunpa campamentuncho kaykaqta. Tsaypita Tayta Diospa Espïritun parlatsiptinmi
3 wilakurqan kayno nir:“Beorpa tsurin Balaammi kä.Imano kananpaq kaqta TAYTA DIOS tantiyatsimaptinmi wilakuykä.
4 Tayta Dios noqatami parlapäman.Lapanpaq munayniyuq Tayta Diosmi imatapis musyatsiman.Paymi imatapis revelaman.
5 ¡Jacobpita miraq runakuna, kuyaylapaqmi tolduykikuna karkaykan!¡Israel runakuna, campamentuykiqa kamaraqlami kaykan!
6 Palmëra yörakuna fïlaylanpa ichiraykaqnömi Israel runakuna karkaykan.Mayu nawpancho huertata Tayta Dios plantashqannömi karkaykan.Tsaynöpis yaku kuchuncho jatusaq cedru yörakuna kaykaqnömi karkaykan.
7 Israel runakuna upunanpaq y chakrata parqunanpaq yaku manami pishinqatsu.Paykunapa mandaqnin reyqa Agagpitapis mas munayniyuqmi kanqa.Munayniyuq kashqan maytsaychöpis musyakanqami.
8 Tayta Diosmi Israel runakunata Egiptupita jorqamurqan.Paymi poqushqa törunöpis kalpayuq kaykan.Israel runakunaqa contran nacionkunata lapantami ushakätsinqa.Tulunkunatapis pakirmi ushanqa.Flëchankunawanmi wanutsinqa.
9 Uywata tsarinanpaq león lupukuykuqnömi Israel nación kaykan.*Pipis paykunataqa mantsakunmi.Israel runakuna, qamkunata bendicionta qoshuqnikitaqa Tayta Diospis bendiciontami qonqa.Maldicionashuqnikitami itsanqa maldicionanqa”.*
10 Balaam tsayno parlaqta mayaykurmi Balacqa fiyupa rabyakushpan makintapis jitayparaq kayno nirqan: “Qamtaqa qayatsimushqä conträkunata maldicionapämänaykipaqmi. Tsayno niykaptïpis kananwanqa kimsa kutinami paykunata bendicionta qoshqanki.
11 ¡Manaraq imapis kashqanyaq wayikipa kutikuy! Ali päganäpaq niykaptïpis TAYTA DIOSMI mana munashqatsu päguta chaskinaykita”.
12 Tsayno niptinmi Balaam kayno nirqan: “Manaraq shamurmi kachamushqayki runakunata kayno nirqä:
13 ‘Palaciun juntata qorita y qellayta Balac pägamaptinpis TAYTA DIOS mana munashqantaqa manami parlashaqtsu’. Tsaynöpis nirqä TAYTA DIOS tantiyatsimashqalanta wilanäpaq kashqanta.
14 Markämannami kutikushaq. Itsanqa manaraq kutikurmi wilashayki nacionnikita Israel runakuna imata rurananpaq kashqantapis”.
Balaam masta wilakushqan
15 Tsawraqa Balaam wilakurqan kayno nir:“Beorpa tsurin Balaammi kä.Imano kananpaq kaqta TAYTA DIOS tantiyatsimaptinmi wilakuykä.
16 Tayta Diosmi noqata parlapäman.Poderniyuq Tayta Diosmi imatapis tantiyatsiman.Paymi imatapis musyatsiman.Paymi imatapis revelaman.
17 Shamuq watakunacho imapis pasananpaq kaqtami rikaykä.Karucho kaykämuqtami rikaykä.Jacobpita miraq runakunapitami juk qoylar yurinqa.*Israel nacionchömi munayniyuq rey kanqa.Moabita runakunata asulanqa.Setpita miraqkunatapis ushakätsinqa.
18 Paymi Edom nacionta vincinqa.Contran Seir runakunatami* munayninman churanqa.Tsayno vinciptinmi Israel runakuna pasaypa mantsakuypaq kanqa.
19 Jacobpita miraqkunapitami munayniyuq runa yurimunqa.Ar markacho quëdaqkunatapis ushakätsinqami”.
20 Tsayno nirkushpanmi amalecita runakuna tashqan lädupa rikärir Balaam wilakurqan kayno nir:“Amalecita runakunaqa kay patsacho pasaypa munayniyuqmi karkaykan.Tsayno karpis ushakätsishqami kanqapaq”.
21 Ceneo runakuna tashqan lädupapis rikärir Balaam wilakurqan kayno nir:“Markaykikuna mana ushakätsishqa kananpaqnömi karkaykan.Qaqa chawpincho qeshwanömi karkaykan.
22 Tsayno kaykaptinpis Asiria soldädukuna shamur prësu tsarishuptikimi ushakankipaq”.
23 Tsayno nirkushpanmi mastapis Balaam kayno nirqan:“¡Ay vïda! Tayta Dios tsayno mantsariypaq ruraykuptinqa ¿piraq kawanqa?
24 Quitim islapita* *büquikunawan shamurmi Asiriacho kaq markakunata raqälatana kachaykunqa.Heber runakunatapis pasaypami ushakätsinqa”.
25 Tsaypitanami Balaam kutikurqan wayinman. Balacpis aywakurqanmi.
Ichic wilacuycuna
^ 24.17 Qoylar yurinanpaq nirqa rey yurinanpaq kashqantami niykan. Jesucristo rey karmi tsay wilakushqanta cumplirqan (Mat. 2.2; Apoc. 19.16).
^ 24.18 Seir runakuna y edomita runakunaqa tsaylami karqan.
^ 24.24 Quitimqa Chipre islapa unay jutinmi kaykan.
^ büqui Büquiqa yaku jananpa purinanpaq tablapita rurashqa jatunkaray artësanömi kaykan. Tsay büquikunawanmi lamarcho y jatun qochakunacho pescäduta tsaripäkun y juk lädu markakunapapis aywapäkun. Bibliata qelqashqan witsanqa qeruta cruztano ruraykurmi büquicho ichitsipäkurqan. Tsay cruzmanmi rakta tëlata ishkan jana kaq kuchunkunapita watarqan. Ura kaq kuchunkunatanami büquiman watapäkurqan wayraptin aywananpaq (Luc. 8.22-25; Hech. 27.17).
