Números 25:1-18
25 Sitimcho taykarmi Israel runakuna moabita warmikunawan kakurqan.
2 Tsaynöpis tsay warmikunaqa Israel runakunata pusharqan sacrificiukunata rurar diosninkunata adorapäkunanpaq. Tsayno pushaptinmi Israel runakunapis moabita runakunapa diosninkunata adorapäkurqan. Nirkurmi diosninkunapaq churashqan mikuytapis mikupäkurqan.
3 *Baal-peor diosta* tsayno adorapäkuptinmi TAYTA DIOS pasaypa rabyakurqan.
4 Tsaymi Moisésta kayno nirqan: “Israel runakunapa mandaqninkunata prësu tsarirkur lapan runakuna rikaykaptin nawpächo wanutsiy. Tsaynöparaqmi rabyaynï pasanqa”.
5 Tsaymi Israel runakunapa juezninkunata Moisés kayno nirqan: “Trïbuykikunapita mayqan runatapis Baal-peor diosta adoraq aywaqtaqa wanutsipäkuy”.
6 Tsayno niptinmi lapan Israel runakuna Tinkuna Toldu patiucho waqarkaykarqan. Tsay hörami Moisés y wakin runakunapis rikaykaptin juk Israel runa mana penqakuypa madianita warmita toldunman yaykatsirqan.
7 Tsayta rikarmi cüra Aarónpa wilkan y Eleazarpa tsurin Finees pasaypa rabyakurqan. Tsaymi juntaraykashqanpita lanzanta aptakurkur
8 aywarqan madianita warmita pushaykashqanpa qepanta toldun ruriyaq. Yaykurirmi jananakushqa kaykaqta pachanpa tuksiriykurqan. Tsayraqmi fiyu qeshyawan Israel runakuna wanuykashqanpita chawarqan.
9 Tsay fiyu qeshyawanmi ishkay chunka chusku waranqa (24,000) runakuna wanurqan.
10 Tsawraqa Moisésta TAYTA DIOS kayno nirqan:
11 “Cüra Aarónpa wilkan y Eleazarpa tsurin Fineesmi pasaypa rabyashqa kaykaqta qasätsimashqa. Paypis noqanömi pipis jutsata ruraptinqa pasaypa rabyan. Jutsayuqta wanutsishqanpitami Israel runakunata ushaqpaq mana wanutsishqätsu.
12 Kanan Fineesta wilay paywan *pactu rurashqäta.
13 Pactuta rurarmi kikinta y paypita miraqkunata imayyaqpis cüra kananpaq churä. Noqata respitamar tsay jutsayuq runata wanutsishqanpitami Israel runakunapa jutsankunata perdonashqä”.*
14 Wanutsishqan Israel runapa jutinmi karqan Zimri. Payqa karqan Salupa tsurin y Simeón trïbupa mandaqninmi.
15 Wanutsishqan madianita warmipa jutinnami karqan Cozbi. Paymi karqan Zurpa tsurin. Zurnami karqan madianita runakunapa juk mandaqnin.
16 Tsaypitami Moisésta TAYTA DIOS kayno nirqan:
17 “Yaykuykur lapan madianita runakunata wanutsipäkuy.
18 Paykunami Israel runakunata yachaylapa shakyätsishqa Baal-peor diosninta adorapäkunanpaq. Tsaynöpis madianita runakunapa mandaqninpa tsurin Cozbi mana penqakuypami lapanpa nawpancho Zimripa toldunman yaykushqa paywan kakunanpaq. Tsay warmitami wanutsishqa Israel runakunata fiyu qeshyawan wanuykätsishqä höra”.
Ichic wilacuycuna
^ Baal Baalqa cananeo runakuna adorashqan diosmi karqan. Juk dios kashqanta yarpaptinpis manami rasunpatsu dios karqan. Cananeo runakuna yarpapäkurqan tsay diosta adoraptin uywankuna mirananpaq kashqanta y chakrankuna ali wayunanpaq kashqantami. Tsaynöpis yarpapäkurqan löcu tamyata y ali tamyatapis kachamushqantami.
^ 25.1-3 Apoc. 2.14.
^ pactu Pactuqa promitinakushqanta cumplinanpaq nishqanmi kaykan. Unay Testamentuchöqa Israel runakunawanmi pactuta Tayta Dios rurarqan. Tsaymi Tayta Dios promitirqan Israel runakunapa Diosnin kar paykunata imaypis yanapananpaq. Israel runakunanami Tayta Diosta promitirqan mandamientunkunata y leyninkunata cumplipäkunanpaq (Éxo. 6.7; 19.5-6; Lev. 26.3-12). Pactuta rurarmi uywata pishtar shuntashqan yawarta Israel runakunaman Moisés tsaqtsuparqan (Éxo. 24.8). Tsaynölami Jesucristo noqantsi rayku wanur yawarninta jichashpan mushuq pactuta rurarqan payta chaskikuqkunata jutsankunapita perdonar salvananpaq (Luc. 22.20; Heb. 10.16-17).
^ 25.7-13 Sal. 106.30-31.
