Números 28:1-31
28 Tsaypitana Moisésta TAYTA DIOS kayno nirqan:
2 “Israel runakunata yätsinki nishqä junaqkunacho mana qonqaypa sacrificiuta rupatsinanpaq. Tsay rupatsishqanqa mikuynïmi kaykan. Ali asyayninta* mayarmi noqa kushikushaqpaq.
3 “Tsaynöpis kayno nir tantiyatsinki: ‘Waran waran juk watayuq ishkay sänu carnishta TAYTA DIOSPAQ rupatsipäkunki. Carnishkunata rupatsishqaykiqa rupatsina sacrificiumi kanqa.
4 Jukaq carnishta rupatsipäkunki patsa waraykaptin y jukaqtana rupatsipäkunki patsa tsakaykaptin.
5 Tsaykunata rupatsir tsaki mikuytapis rupatsipäkunki ishkay kïlu alinnin harinaman juk litru olïvu aceitiwan tsapurkur’ ”.
6 (Tsaynömi Sinaí jirkacho rupatsina sacrificiukunata waran waran rupatsipäkurqan. Tsay rupatsishqanpa ali asyayninta mayarmi TAYTA DIOS kushikurqan.)
7 “ ‘Cada carnishta rupatsinaykipaq apamurmi juk litru vïnutapis apapäkamunki. Tsay vïnutami TAYTA DIOSTA adorar Tinkuna *Sagrädu Toldu patiucho kaykaq *altarman winapäkunki.
8 Jukaq carnishtanami tutapa rupatsishqaykinöla tardipapis rupatsipäkunki. Tsay jananmanmi tutapa winashqaykinöla tsaki mikuyta y vïnutapis winapäkunki. Rupatsishqaykipa ali asyayninta mayarmi TAYTA DIOS kushikunqapaq.
Jamay junaqcho sacrificiuta rupatsinanpaq tantiyatsishqan
9 “ ‘Jamay junaqpis juk watayuq ishkay sänu carnishta *altarcho rupatsipäkunki. Tsay jananman chusku kïlu alinnin harinata olïvu aceititawan tsapurkur winanki. Tsayqa tsaki mikuy ofrendami kanqa. Tsaynöla rupaykätsishqayki jananman vïnutapis winapäkunki.
10 Jamay junaqcho tsayno rupatsirpis y vïnuta jananman winarpis ama qonqapäkunkitsu waran waran rupatsina sacrificiutapis rupatsiyta.*
Cada killa sacrificiukunata rupatsinanpaq tantiyatsishqan
11 “ ‘Cada killacho punta kaq junaq TAYTA DIOSPAQ sacrificiuta rupatsipäkunki ishkay sänu turituta, juk sänu carnita y juk watayuq qanchis sänu carnishkunata.
12 Cada turituta rupatsir soqta kïlu alinnin harinata aceitiwan tsapurkur jananman winapäkunki. Tsaynöla cada carnita rupatsir chusku kïlu alinnin harinata aceitiwan tsapurkur winapäkunki.
13 Cada carnishta rupatsir ishkay kïlu alinnin harinata aceitiwan tsapurkur winapäkunki. Tsay rupatsishqaykipa ali asyayninta mayarmi TAYTA DIOS kushikunqapaq.
14 Turituta rupatsir jananman winapäkunki ishkay litru vïnuta. Tsaynöla cada carnita rupatsir juk litru mediu vïnuta winapäkunki. Cada carnishta rupatsir juk litru vïnuta winapäkunki. Tsaynöla cada killa rupatsina sacrificiuta imaypis rupatsipäkunki.
15 “ ‘Juk chïvutapis tsay junaq purificatsina sacrificiupaq rupatsir jananman vïnuta winapäkunki. Tsaynöla waran waran sacrificiutapis mana qonqaypa rupatsipäkunki.
Pascua fiestacho sacrificiukunata rupatsinanpaq tantiyatsishqan
Levítico 23.5-8
16 “ ‘Wata qalaykunan killa chunka chusku junaqcho TAYTA DIOSTA adorar *Pascua fiestata rurapäkunki.*
17 Tsawraqa waraynin* junaqpita qalaykur qanchis junaqyaq levadüraynaq tantata mikupäkunki.*
18 Fiesta qalaykunan junaq ima aruytapis ama arupäkunkitsu, sinöqa TAYTA DIOSTA adorapäkunaykipaq juntakanki.
19 Tsaynöpis TAYTA DIOSTA adorar sacrificiuta rupatsipäkunki ishkay sänu turituta, juk sänu carnita y juk watayuq qanchis sänu carnishkunata.
20 Tsay sacrificiu rupaykashqan jananman winapäkunki alinnin harinata aceitiwan tsapurkur. Cada turituta rupatsir soqta kïlu harinata jananman winapäkunki. Tsaynöla cada carnita rupatsirpis chusku kïlu harinata winapäkunki.
21 Cada carnishta rupatsir ishkay kïlu harinata winapäkunki.
22 Tsaynöpis purificatsina sacrificiupaq juk chïvuta *altarcho rupatsipäkunki. Tsayqa kanqa jutsa rurashqaykipita perdonashqa kapäkunaykipaqmi.
23 Tsaykunata rupatsirqa cada tuta rupatsina sacrificiutapis mana qonqaypa rupatsipäkunki.
24 “ ‘Waran waranmi qanchis junaqyaq fiestata rurar tsayno rupatsipäkunki. Rupatsishqaykipa ali asyayninta mayarmi TAYTA DIOS kushikunqapaq. Tsaynöla rupatsishqayki jananman vïnutapis winapäkunki. Tsaykunata rupatsirqa waran waran cada tuta rupatsina sacrificiutapis mana qonqaypa rupatsipäkunki.
25 Qanchis kaq junaqchöqa ima aruytapis ama arupäkunkitsu, sinöqa TAYTA DIOSTA adorapäkunaykipaq juntakanki.
Semäna fiestacho sacrificiukunata rupatsinanpaq tantiyatsishqan
Levítico 23.9-22
26 “ ‘Punta cosëchata shuntar Semäna fiestata* ruraptiki juk junaq kanqa cosechashqaykipita *primiciata TAYTA DIOSPAQ apamunaykipaqmi. Tsay junaqcho ima aruytapis ama arupäkunkitsu, sinöqa TAYTA DIOSTA adorapäkunaykipaq juntakanki.
27 Tsay junaq TAYTA DIOSPAQ sacrificiuta rupatsipäkunki ishkay turituta, juk carnita y juk watayuq qanchis carnishta. Tsay rupatsishqaykipa ali asyayninta mayarmi TAYTA DIOS kushikunqapaq.
28 Cada turituta rupatsir soqta kïlu alinnin harinata aceitiwan tsapurkur jananman winapäkunki. Tsaynöla carnita rupatsir chusku kïlu alinnin harinata aceitiwan tsapurkur winapäkunki.
29 Cada carnishta rupatsir ishkay kïlu alinnin harinata winapäkunki.
30 Tsaynöpis purificatsina sacrificiupaq juk chïvuta *altarcho rupatsipäkunki. Tsayqa kanqa jutsa rurashqaykipita perdonashqa kapäkunaykipaqmi.
31 “ ‘Tsaki mikuy ofrendata y vïnuta winarkur tsay sacrificiukunata rupatsirpis waran waran rupatsina sacrificiutapis mana qonqaypa rupatsipäkunki. Rupatsinaykipaq kaq uywakunaqa lapanpis sänu kanqa.
Ichic wilacuycuna
^ 28.2 Wakin runakunaqa mushkuyninta nipäkun.
^ Sagrädu Toldu Liyinki Tinkuna Toldupita tantiyatsikuyta.
^ altar Altarkunaqa karqan rumiwan perqashqa y qerupita ruraykur jananpa y rurinpa bronciwan enchapashqami. Tsay altarkunachömi uywakunata rupatsir runakuna jutsankunapita perdonashqa kananpaq cürakuna Tayta Diosta manakäriq. Tsaynölami templu rurincho qoripita rurashqa taksha altarpis karqan. Tsaychömi cürakuna inciensuwan qoshtatsiq. Rumipita perqashqa altar imano kashqanta musyanaykipaq rikanki 2Sam. 24.18-cho kaq dibüjuta. Tayta Diosta mana cäsukuq runakunapis altarkunata ruraykurmi ïdulukunata adorapäkuq (Éxo. 30.1-10; Deut. 27.5-6; 2Rey. 16.10-16; 2Crón. 4.1).
^ altar Altarkunaqa karqan rumiwan perqashqa y qerupita ruraykur jananpa y rurinpa bronciwan enchapashqami. Tsay altarkunachömi uywakunata rupatsir runakuna jutsankunapita perdonashqa kananpaq cürakuna Tayta Diosta manakäriq. Tsaynölami templu rurincho qoripita rurashqa taksha altarpis karqan. Tsaychömi cürakuna inciensuwan qoshtatsiq. Rumipita perqashqa altar imano kashqanta musyanaykipaq rikanki 2Sam. 24.18-cho kaq dibüjuta. Tayta Diosta mana cäsukuq runakunapis altarkunata ruraykurmi ïdulukunata adorapäkuq (Éxo. 30.1-10; Deut. 27.5-6; 2Rey. 16.10-16; 2Crón. 4.1).
^ Pascua fiesta Pascua fiestata Israel runakuna rurapäkun Tayta Dios Egiptupita jorqamushqanta yarpapäkurmi. Moisés qelqashqan leykunacho nishqannölami lapan olqu kaqkuna chunka ishkay watayuqpita janaman tsay fiestaman aywapäkuq. Warmikunapis tsay fiestaman aywapäkuqmi (Éxo. 12.1-28; Deut. 16.1-8; Mar. 14.12; 1Cor. 5.7).
^ 28.16 Éxo. 12.1-13; Deut. 16.1-2.
^ 28.17 Wakin runakunaqa warantin nipäkun.
^ 28.17-25 Éxo. 12.14-20; 23.15; 34.18; Deut. 16.3-8.
^ altar Altarkunaqa karqan rumiwan perqashqa y qerupita ruraykur jananpa y rurinpa bronciwan enchapashqami. Tsay altarkunachömi uywakunata rupatsir runakuna jutsankunapita perdonashqa kananpaq cürakuna Tayta Diosta manakäriq. Tsaynölami templu rurincho qoripita rurashqa taksha altarpis karqan. Tsaychömi cürakuna inciensuwan qoshtatsiq. Rumipita perqashqa altar imano kashqanta musyanaykipaq rikanki 2Sam. 24.18-cho kaq dibüjuta. Tayta Diosta mana cäsukuq runakunapis altarkunata ruraykurmi ïdulukunata adorapäkuq (Éxo. 30.1-10; Deut. 27.5-6; 2Rey. 16.10-16; 2Crón. 4.1).
^ 28.26-31 Éxo. 23.16; 34.22; Deut. 16.9-12.
^ primicia Primiciaqa kaykan Israel runakuna qechpa kaqkunata y chakrancho punta poquqkunata Tayta Diospaq apashqanmi (Éxo. 23.19; Lev. 2.11-12; Deut. 14.23; 18.3-4; 26.1-11; 2Crón. 31.11-12; Neh. 10.35-37; 12.44; Eze. 44.30; Rom. 8.23; Apoc. 14.4).
^ altar Altarkunaqa karqan rumiwan perqashqa y qerupita ruraykur jananpa y rurinpa bronciwan enchapashqami. Tsay altarkunachömi uywakunata rupatsir runakuna jutsankunapita perdonashqa kananpaq cürakuna Tayta Diosta manakäriq. Tsaynölami templu rurincho qoripita rurashqa taksha altarpis karqan. Tsaychömi cürakuna inciensuwan qoshtatsiq. Rumipita perqashqa altar imano kashqanta musyanaykipaq rikanki 2Sam. 24.18-cho kaq dibüjuta. Tayta Diosta mana cäsukuq runakunapis altarkunata ruraykurmi ïdulukunata adorapäkuq (Éxo. 30.1-10; Deut. 27.5-6; 2Rey. 16.10-16; 2Crón. 4.1).
