Números 30:1-16
30 (2) Israel trïbukunapa mandaqninkunata shuntaykur Moisés kayno nirqan: “Kanan wilashayki TAYTA DIOS imata nishqantapis.
2 (3) Pipis TAYTA DIOSTA imatapis promitirqa cumplinqa. Imata rurananpaq nishqantapis ruranqa.*
3 (4) “Papäninpa makilanchöraq kaykar jipash imatapis TAYTA DIOSTA promitirqa
4 (5) papänin awninantaraqmi shuyanqa. Papänin imatapis mana rimakuptinqa promitishqanta jipash cumplinqa.
5 (6) Promitishqanta musyaykur papänin mana munaptinqa manami promitishqanta cumplinqatsu. Papänin mana munaptinqa TAYTA DIOS manami obliganqatsu cumplinanpaq.
6 (7) “Japalaraq kaykar jipash shumaq mana yarpachakuypa imatapis TAYTA DIOSTA promitirkur runayuq rikakurqa
7 (8) runan awninantaraqmi shuyaranqa. Promitishqanta musyaykur runan imatapis mana rimakuptinqa promitishqanta cumplinqami.
8 (9) Promitishqanta musyaykur runan mana munaptinqa manami promitishqanta cumplinqatsu. Runan mana munaptinqa TAYTA DIOS manami obliganqatsu cumplinanpaq.
9 (10) “Viüda kar o runanpita rakikashqa karmi itsanqa kikilanpitana imatapis promitishqanta cumplinqa.
10 (11) “Runayuq kaykar warmi imatapis TAYTA DIOSTA promitirqa
11 (12) runan awninantaraqmi shuyanqa. Promitishqanta musyaykur runan imatapis mana rimakuptinqa promitishqanta cumplinqa.
12 (13) Promitishqanta musyaykur runan mana munaptinqa manami promitishqanta cumplinqatsu. Runan mana munaptinqa TAYTA DIOS manami obliganqatsu cumplinanpaq.
13 (14) “Tsaymi warmi imatapis promitiptin y ayunananpaq nishqa kaptin runanraq ninqa cumplinanpaq o mana cumplinanpaq kashqantapis.
14 (15) Promitishqanta musyaykur warminta imatapis mana niylapa juk ishkay junaq upälala karqa warmin promitishqantami awniykan.
15 (16) Tsaypitaraq mana munashpanqa runannami jutsayuq kanqa warmin promitishqanta mana cumplishqanpita”.
16 (17) Tsaynömi Moisésta TAYTA DIOS tantiyatsirqan runayuq warmi imano kawananpaq y papäninpa makilanchöraq kaykar jipash imano kawananpaqpis.
Ichic wilacuycuna
^ 30.2 Deut. 23.21-23; Mat. 5.33.
