Números 36:1-13
36 Galaadpita miraq runakunapa mandaqninkunami aywapäkurqan Moiséswan y Israel mayinkunapa mandaqninkunawan parlananpaq. (Galaadmi karqan Maquirpa tsurin. Maquirmi karqan Manaséspa tsurin. Manasésmi karqan Josépa tsurin.)
2 Paykunaman chayaykurmi kayno nipäkurqan: “Israel mayintsikuna suertita jitaypa chakrata chaskinanpaqmi TAYTA DIOS nishushqanki. Tsaynölami aylü Zelofehadpa chakranta warmi tsurinkuna chaskinanpaqpis nishushqanki.*
3 Tsay jipashkuna juk trïbu Israel mayintsiwan taptin chakranqa manami noqakunapa trïbüpanatsu kanqa, sinöqa runanpa trïbunpanami. Tsaynöpaqa trïbü chaskishqan chakrakuna walkalanami rikakunqa.
4 *Jubileo wata chayamuptinqa runanpa trïbunpaqnami tsay chakra imayyaqpis kanqa”.
5 Tsayno niptinmi TAYTA DIOS tantiyatsishqannöla Israel mayinkunata Moisés kayno nirqan: “José trïbu runakunaqa rasun kaqtami nirkaykan.
6 TAYTA DIOSMI kayno nin: ‘Zelofehadpa jipash tsurinkuna runawan tayta munarqa kikinpa trïbun aylu runalawan tätsun.
7 Tsaynöpami juk trïbu runakuna mana jatikaykanqatsu juk trïbu runakunapa chakrankunamanqa. Tsaypa trukanqa cada trïbu runakunami chakrankunata respitatsinqa.
8 Mayqan trïbu jipashpis chakrata chaskirqa kikinpa trïbun aylu runalawan tanqa. Tsaynöpami taytanpita chaskishqan chakrata tsay trïbu runakunala tsararanqa.
9 Juk trïbu runakuna ama jatikanqatsu juk trïbu runakunapa chakranmanqa. Tsaypa trukanqa cada trïbu runakuna chakrankunalacho arukärinqa’ ”.
10 Moisésta TAYTA DIOS nishqanta Zelofehadpa jipash tsurinkuna chaskikurmi
11 Maala, Tirsa, Hogla, Milca y Noa tiyunkunapa tsurinkunalawan tarqan.
12 Josépa tsurin Manasés trïbu runakunawan taptinmi chaskishqan chakrakuna karqan papäninpa trïbuncho.
13 Jericó tsimpan y Jordán mayu nawpan Moab pampacho Israel runakuna tarkaykaptinmi Moisésta TAYTA DIOS nirqan tsay leykunata tantiyatsinanpaq.
Ichic wilacuycuna
^ 36.2 Núm. 27.1-11.
^ Jubileo wata Jubileo wataqa cada pitsqa chunka (50) watachömi karqan. Tsay watachöqa rantikärishqan chakrakunata punta kaq duëñunkunami shuntaq. Waktsa kashpan ashmay kananpaq yaykuq runapis tsay wataqa librinami yarqukuq (Lev. 25.8-55).
