Números 4:1-49
4 Moisésta y Aaróntami TAYTA DIOS kayno nirqan:
2 “Coatpita miraq *levitakunata aylunpa aylunpa y castanpa castanpa censapäkuy.
3 Paykunata censapäkunki kimsa chunka (30) watayuqpita pitsqa chunka (50) watayuqyaq. Tsay edä runakunami Tinkunantsi Tolducho imapis rurananpaq kaqkunata rurapäkunqa.
4 Coatpita miraq runakunami apapäkunqa Tinkunantsi Tolducho *sagrädu kaqkunata.
5 “Patsakushqanpita Israel runakuna aywakärinanpaqmi Aarón y tsurinkuna *Pactu Babulta pitunqa. Tsayno pitunqa Lugar Santupita Lugar Santïsimuta rakiraq cortïnawan.
6 Tsay jananpami pitunqa fïnu qarapita rurashqa tolduwan. Tsay toldu jananpami pitunqa juk piëzala awashqa azul tëlawan. Nirkurnami ishkay largu qerukunata churanqa apapäkunanpaq.
7 “Tsaynöpis tanta churakuna mësapita tantata jorqurkur pitunqa azul tëlawan. Tsay tëla jananmanmi churapäkunqa plätukunata, wishlakunata y *altarman vïnuta jichananpaq kaq cöpakunata y järrakunatapis. Tsaynölami jorqushqan tantatapis tëla jananman churanqa.
8 Lapanta churaykur jananpana pitunqa puka tëlawan. Tsay jananpa fïnu qarapita rurashqa tolduwan pituykurmi ishkay largu qerukunata churanqa apapäkunanpaq.
9 “Tsaynölami azul tëlawan pitupäkunqa mechëruntinta candelabruta, alicätinkunata, platïllukunata y aceiti winakunan väsunkunatapis.
10 Nirkurnami fïnu qarapita rurashqa tolduwan pituykur kirma jananpa churanqa apapäkunanpaq.
11 “Tsaynölami qoripita rurashqa altartapis pitunqa azul tëlawan. Tsay jananpami pitunqa fïnu qarapita rurashqa tolduwan. Tsaypitanami ishkay largu qerukunata churanqa apapäkunanpaq.
12 “Nirkurnami azul tëlakunawan pitunqa Tinkunantsi *Sagrädu Tolducho kaq manëjukunatapis. Tsaypitanami fïnu qarapita rurashqa tolduwan piturkur kirma jananpa churanqa apapäkunanpaq.
13 “Sacrificiu rupatsina altarpita uchpata pitsarkur granäti tëlawan altarta tsapanqa.
14 Nirkurna tëla jananman churanqa tenäzakunata, trinchikunata, kanalakunata, tazonkunata y altarcho kaq lapan manëjukunatapis. Nirkur fïnu qarapita rurashqa tolduwan piturkur ishkay largu qerukunata churanqa apapäkunanpaq.
15 “Aarón y tsurinkuna lapan tsay sagrädu kaqkunata pituyta usharkuptinnami Coatpita miraqkuna shapäkamunqa apapäkunanpaq. Manaraq pituptinqa yataylapis ama yatanqatsu. Tsaykunata yatarqa wanupäkunqami. Tsaynöpami Tinkuna Tolducho kaqkunata Coatpita miraqkuna apapäkunqa.
16 “Aarónpa tsurin Eleazarmi apanqa candelabru ratananpaq aceitita, ali asyaq* inciensuta, altarcho rupatsinanpaq apamushqan tsaki mikuykunata y sagrädu aceititapis. Paymi kanqa Sagrädu Tolduta y tsaycho kaykaq lapan manëjukunatapis rikananpaq”.
17 Moisésta y Aaróntami TAYTA DIOS kayno nirqan:
18 “Cuidädu levitakunacho Coat aylupita miraqkuna ushakanman.
19 Sagrädu manëjukunata yatar mana wanunanpaq Aarón y tsurinkuna Coat aylu runakunata tantiyatsinqa imata rurananpaq y imata apananpaqpis.
20 Tsay sagrädu manëjukunata manaraq pituptin Tinkunantsi Tolduman ama yaykapäkutsuntsu. Tsay manëjukunata rikarqa wanunqami”.
Gersónpita miraq levitakuna imacho arunanpaqpis tantiyatsishqan
21 Nirkurnami Moisésta TAYTA DIOS kayno nirqan:
22 “Tsaynöpis Gersónpita miraq *levitakunata aylunpa aylunpa y castanpa castanpa censapäkuy.
23 Paykunata censanki kimsa chunka (30) watayuqpita pitsqa chunka (50) watayuqyaq. Tsay edä runakunami Tinkunantsi Tolducho imapis rurananpaq kaqkunata rurapäkunqa.
24 “Gersónpita miraq levitakunami kaykunata apapäkunqa:
25 Tinkunantsi *Sagrädu Toldupa cortïnankunata, Tinkunantsi Tolduta, qataraq toldunkunata, tsay jananpa qataraq fïnu qarapita rurashqa tolduta, Tinkunantsi Toldupa punkun tsaparaq cortïnata,
26 patiuta y *altarta jiruruypa tsaparaq cortïnakunata waskantinta, waqtapita patiuman yaykuna cortïnata y wakin manëjunkunatapis.
27 Aarón y tsurinkunami ninqa Gersón runakuna imata rurananpaq y imata apananpaqpis.
28 Tsay manëjukunatami Gersónpita miraqkuna apapäkunqa. Lapantapis rurapäkunqa cüra Aarónpa tsurin Itamar tantiyatsishqannöla.
Meraripita miraq levitakuna imacho arunanpaqpis tantiyatsishqan
29 “Tsaynöpis Meraripita miraq runakunata aylunpa aylunpa y castanpa castanpa censapäkuy.
30 Paykunata censanki kimsa chunka (30) watayuqpita hasta pitsqa chunka (50) watayuqyaq. Tsay edä runakunami Tinkunantsi Tolducho rurananpaq kaqkunata rurapäkunqa.
31 Paykunami apapäkunqa Tinkunantsi *Sagrädu Toldupa marcunkunata, travisninkunata, tushankunata, jawiräkunanta,
32 Tinkunantsi Sagrädu Toldupa patiunpa tushankunata, tushapa jawiräkunanta, estäcankunata, waskankunata y lapan manëjunkunatapis. Qammi ninki cada ünun imata apananpaq kashqantapis.
33 Tsay manëjukunatami Meraripita miraqkuna apapäkunqa. Tinkunantsi Tolducho sirvimar lapantapis rurapäkunqa cüra Aarónpa tsurin Itamar tantiyatsishqannöla”.
Levitakunata censashqan
34 TAYTA DIOS tsayno niptinmi Moisés, Aarón y mayor runakuna Coatpita miraqkunata aylunpa aylunpa y castanpa castanpa censapäkurqan.
35 Tsayno censapäkurqan kimsa chunka (30) watayuqpita pitsqa chunka (50) watayuqyaq. Tsay edä runakunami Tinkuna Tolducho imapis rurananpaq kaqkunata rurapäkurqan.
36 Coatpita miraqkunata censaptin karqan ishkay waranqa qanchis pachak pitsqa chunka (2,750) runakunami.
37 Paykunami Tinkuna Tolducho ima ruraykunatapis rurapäkurqan. Moisésta TAYTA DIOS nishqannölami paykunata Moisés y Aarón censapäkurqan.
38 Gersónpita miraqkunatapis aylunpa aylunpa y castanpa castanpami censapäkurqan.
39 Tsayno censapäkurqan kimsa chunka (30) watayuqpita pitsqa chunka (50) watayuqyaq. Tsay edä runakunami Tinkuna Tolducho rurananpaq kaqkunata rurapäkunqa.
40 Gersónpita miraqkunata censaptin karqan ishkay waranqa soqta pachak kimsa chunka (2,630) runakunami.
41 Paykunami Tinkuna Tolducho rurananpaq kaqkunata rurapäkurqan. TAYTA DIOS nishqannölami Moiséswan Aarón paykunata censapäkurqan.
42 Meraripita miraqkunatapis aylunpa aylunpa y castanpa castanpami censapäkurqan.
43 Tsayno censapäkurqan kimsa chunka (30) watayuqpita pitsqa chunka (50) watayuqyaq. Tsay edä runakunami Tinkuna Tolducho imapis rurananpaq kaqkunata rurapäkurqan.
44 Meraripita miraqkunata censaptin karqan kimsa waranqa ishkay pachak (3,200) runakunami.
45 Paykunami Tinkuna Tolducho rurananpaq kaqkunata rurapäkurqan. TAYTA DIOS nishqannölami Moiséswan Aarón paykunata censapäkurqan.
46 *Levitakunata aylunpa aylunpa y castanpa castanpami censashpanmi Moisés, Aarón y Israel runakunapa mandaqninkuna
47 kimsa chunka (30) watayuqpita pitsqa chunka (50) watayuqyaq censapäkurqan. Tsay edä runakunami Tinkuna Tolducho rurananpaq kaqkunata rurapäkurqan.
48 Lapan censashqankunami karqan pusaq waranqa pitsqa pachak pusaq chunka (8,580) runakuna.
49 Moisésta TAYTA DIOS nishqannömi juknin juknin imata apananpaqpis nipäkurqan.
Moisésta TAYTA DIOS nishqannölami levitakuna censashqa karqan.
Ichic wilacuycuna
^ levita Levita runakunaqa karqan Jacobpa tsurin Levípita miraq runakunami. Paykunami templucho cürakunata yanaparqan (Núm. 1.47-54; 3.5-39). Templu manaraq kaptinmi Dioswan Tinkuna Tolducho yanaparqan (1Crón. 24–26). Levitakunatami rey Josafat kacharqan markan markan Diospa leyninkunata yachatsipäkunanpaq (2Crón. 17.7-9).
^ sagrädu Liyinki santupita tantiyatsikuyta.
^ Pactu Babul Pactu Babulqa jananpa y rurinpa qoriwan enchapashqa cajonmi karqan. Tsay babulpa jananchönami qoripita rurashqa ishkay angilkuna kaykarqan. Tsay babulchömi churaraykarqan ishkay läjaman Tayta Dios qelqashqan chunka mandamientukuna, Aarónpa tukrun y Tayta Dios kamaripashqan maná mikuypis. Pactu Babultami Tayta Dioswan Tinkuna Toldu ruriman churarqan. Castellänuchöqa Pactu Babultami “arca del pacto” nipäkuq (Éxo. 25.10-22; 37.1-9).
^ altar Altarkunaqa karqan rumiwan perqashqa y qerupita ruraykur jananpa y rurinpa bronciwan enchapashqami. Tsay altarkunachömi uywakunata rupatsir runakuna jutsankunapita perdonashqa kananpaq cürakuna Tayta Diosta manakäriq. Tsaynölami templu rurincho qoripita rurashqa taksha altarpis karqan. Tsaychömi cürakuna inciensuwan qoshtatsiq. Rumipita perqashqa altar imano kashqanta musyanaykipaq rikanki 2Sam. 24.18-cho kaq dibüjuta. Tayta Diosta mana cäsukuq runakunapis altarkunata ruraykurmi ïdulukunata adorapäkuq (Éxo. 30.1-10; Deut. 27.5-6; 2Rey. 16.10-16; 2Crón. 4.1).
^ Sagrädu Toldu Liyinki Tinkuna Toldupita tantiyatsikuyta.
^ 4.16 Wakin runakunaqa mushkuq nipäkun.
^ levita Levita runakunaqa karqan Jacobpa tsurin Levípita miraq runakunami. Paykunami templucho cürakunata yanaparqan (Núm. 1.47-54; 3.5-39). Templu manaraq kaptinmi Dioswan Tinkuna Tolducho yanaparqan (1Crón. 24–26). Levitakunatami rey Josafat kacharqan markan markan Diospa leyninkunata yachatsipäkunanpaq (2Crón. 17.7-9).
^ Sagrädu Toldu Liyinki Tinkuna Toldupita tantiyatsikuyta.
^ altar Altarkunaqa karqan rumiwan perqashqa y qerupita ruraykur jananpa y rurinpa bronciwan enchapashqami. Tsay altarkunachömi uywakunata rupatsir runakuna jutsankunapita perdonashqa kananpaq cürakuna Tayta Diosta manakäriq. Tsaynölami templu rurincho qoripita rurashqa taksha altarpis karqan. Tsaychömi cürakuna inciensuwan qoshtatsiq. Rumipita perqashqa altar imano kashqanta musyanaykipaq rikanki 2Sam. 24.18-cho kaq dibüjuta. Tayta Diosta mana cäsukuq runakunapis altarkunata ruraykurmi ïdulukunata adorapäkuq (Éxo. 30.1-10; Deut. 27.5-6; 2Rey. 16.10-16; 2Crón. 4.1).
^ Sagrädu Toldu Liyinki Tinkuna Toldupita tantiyatsikuyta.
^ levita Levita runakunaqa karqan Jacobpa tsurin Levípita miraq runakunami. Paykunami templucho cürakunata yanaparqan (Núm. 1.47-54; 3.5-39). Templu manaraq kaptinmi Dioswan Tinkuna Tolducho yanaparqan (1Crón. 24–26). Levitakunatami rey Josafat kacharqan markan markan Diospa leyninkunata yachatsipäkunanpaq (2Crón. 17.7-9).
