Números 7:1-89
7 Sharkatsiyta usharkurnami Moisésqa sagrädu kananpaq *Sagrädu Tolduman y lapan manëjunkunaman aceitita winaparqan. Tsaynölami aceitita winaparqan *altarma y altarpa manëjunkunamanpis.
2 Nirkurnami censaycho yanapaq cada trïbupa mandaqninkuna* Tinkuna Sagrädu Tolduman ofrendankunata apapäkurqan.
3 Cada mandaqmi juk töruta aparqan. Cada ishkay mandaqkunanami tsapanayuq juk carrëtata apapäkurqan. Tsaymi chunka ishkay törukuna y tsapanayuq soqta carrëtakuna karqan. Lapan apashqankunatami Sagrädu Toldupa nawpanman chayatsirqan.
4 Tsawraqa Moisésta TAYTA DIOS kayno nirqan:
5 “Tsay carrëtakunata y törukunata chaskirkur *levitakunata aypunki Tinkuna Tolduta apapäkunanpaq”.
6 Tsayno niptinmi carrëtakunata y törukunata chaskirkur levitakunata Moisés aypurqan.
7 Gersónpita miraq levitakunatami ishkay carrëtakunata y chusku törukunata aypurqan apapäkunanpaq.*
8 Meraripita miraq levitakunatanami chusku carrëtakunata y pusaq törukunata aypurqan apapäkunanpaq.* Paykunaqa cüra Aarónpa tsurin Itamar mandashqantami rurapäkurqan.
9 Coatpita miraq levitakunatami itsanqa mana aypurqantsu. Paykunaqa *sagrädu kaqkunatami umrushqa apapäkurqan.*
10 Altarta dedicananpaqmi tsay chunka ishkay mandaqkuna ofrendankunata apapäkurqan. Tsaymi sagrädu kananpaq altarman aceitita winapaptin ofrendankunata altarpa nawpanman churapäkurqan.
11 Tsawraqa Moisésta TAYTA DIOS kayno nirqan: “Altarta dedicanaykipaq ofrendankunata apamurqa waran waran cada trïbupa mandaqnin trukanakuypa apapäkamunqa”.
12 Punta kaq junaqchömi Judá trïbu Aminadabpa tsurin Naasón ofrendanta aparqan.
13 Paymi aparqan qellaypita rurashqa juk plätuta y juk lavatoriuta. Tsay plätu lasarqan pachak kimsa chunka (130) siclo y lavatoriuna lasarqan qanchis chunka (70) siclo.* Tsaykunata pësarqan Tinkuna Tolducho kaykaq pësakunawanmi. Tsaki mikuy ofrendapaqmi tsay lavatoriu y tsay plätu aceitiwan pichushqa alinnin harina junta kaykarqan.
14 Tsaynöpis inciensuta aparqan qoripita rurashqa cucharón juntata. Tsay cucharón lasarqan chunka siclumi.*
15 Tsaynöpis rupatsina sacrificiupaq aparqan juk turituta, juk carnita y juk watayuq carnishta.
16 Purificatsina sacrificiupaqmi aparqan juk chïvuta.
17 Jawka kawakuy sacrificiupaqnami aparqan ishkay töruta, pitsqa carnikunata, pitsqa chïvukunata y juk watayuq pitsqa carnishkunatapis. Tsaykuna karqan Aminadabpa tsurin Naasónpa ofrendankunami.
18 Ishkay kaq junaqchönami ofrendata aparqan Isacar trïbu Zuarpa tsurin Natanael.
19 Paymi aparqan qellaypita rurashqa juk plätuta y juk lavatoriuta. Tsay plätu lasarqan pachak kimsa chunka (130) siclo y lavatoriuna lasarqan qanchis chunka (70) siclo. Tsaykunata pësarqan Tinkuna Tolducho kaykaq pësakunawanmi. Tsaki mikuy ofrendapaqmi tsay lavatoriu y tsay plätu aceitiwan pichushqa alinnin harina junta kaykarqan.
20 Tsaynöpis inciensuta aparqan qoripita rurashqa cucharón juntata. Tsay cucharón lasarqan chunka siclumi.
21 Tsaynöpis rupatsina sacrificiupaq aparqan juk turituta, juk carnita y juk watayuq carnishta.
22 Purificatsina sacrificiupaqmi juk chïvuta aparqan.
23 Jawka kawakuy sacrificiupaqnami aparqan ishkay töruta, pitsqa carnikunata, pitsqa chïvukunata y juk watayuq pitsqa carnishkunatapis. Tsaykuna karqan Zuarpa tsurin Natanaelpa ofrendankunami.
24 Kimsa kaq junaqchönami Zabulón trïbu Helónpa tsurin Eliab ofrendanta aparqan.
25 Paymi aparqan qellaypita rurashqa juk plätuta y juk lavatoriuta. Tsay plätu lasarqan pachak kimsa chunka (130) siclo y lavatoriuna lasarqan qanchis chunka (70) siclo. Tsaykunata pësarqan Tinkuna Tolducho kaykaq pësakunawanmi. Tsaki mikuy ofrendapaqmi tsay lavatoriu y tsay plätu aceitiwan pichushqa alinnin harina junta kaykarqan.
26 Tsaynöpis inciensuta aparqan qoripita rurashqa cucharón juntata. Tsay cucharón lasarqan chunka siclumi.
27 Tsaynöpis rupatsina sacrificiupaq aparqan juk turituta, juk carnita y juk watayuq carnishta.
28 Purificatsina sacrificiupaqmi juk chïvuta aparqan.
29 Jawka kawakuy sacrificiupaqnami aparqan ishkay töruta, pitsqa carnikunata, pitsqa chïvukunata y juk watayuq pitsqa carnishkunatapis. Tsaykuna karqan Elónpa tsurin Zabulónpa ofrendankunami.
30 Chusku kaq junaqchönami Rubén trïbu Sedeurpa tsurin Elisur ofrendanta aparqan.
31 Paymi aparqan qellaypita rurashqa juk plätuta y juk lavatoriuta. Tsay plätu lasarqan pachak kimsa chunka (130) siclo y lavatoriuna lasarqan qanchis chunka (70) siclo. Tsaykunata pësarqan Tinkuna Tolducho kaykaq pësakunawanmi. Tsaki mikuy ofrendapaqmi tsay lavatoriu y tsay plätu aceitiwan pichushqa alinnin harina junta kaykarqan.
32 Tsaynöpis inciensuta aparqan qoripita rurashqa cucharón juntata. Tsay cucharón lasarqan chunka siclumi.
33 Tsaynöpis rupatsina sacrificiupaq aparqan juk turituta, juk carnita y juk watayuq carnishta.
34 Purificatsina sacrificiupaqmi juk chïvuta aparqan.
35 Jawka kawakuy sacrificiupaqnami aparqan ishkay töruta, pitsqa carnikunata, pitsqa chïvukunata y juk watayuq pitsqa carnishkunatapis. Tsaykuna karqan Sedeurpa tsurin Elisurpa ofrendankunami.
36 Pitsqa kaq junaqchönami Simeón trïbu Zurisadaipa tsurin Selumiel ofrendanta aparqan.
37 Paymi aparqan qellaypita rurashqa juk plätuta y juk lavatoriuta. Tsay plätu lasarqan pachak kimsa chunka (130) siclo y lavatoriuna lasarqan qanchis chunka (70) siclo. Tsaykunata pësarqan Tinkuna Tolducho kaykaq pësakunawanmi. Tsaki mikuy ofrendapaqmi tsay lavatoriu y tsay plätu aceitiwan pichushqa alinnin harina junta kaykarqan.
38 Tsaynöpis inciensuta aparqan qoripita rurashqa cucharón juntata. Tsay cucharón lasarqan chunka siclumi.
39 Tsaynöpis rupatsina sacrificiupaq aparqan juk turituta, juk carnita y juk watayuq carnishta.
40 Purificatsina sacrificiupaqmi juk chïvuta aparqan.
41 Jawka kawakuy sacrificiupaqnami aparqan ishkay töruta, pitsqa carnikunata, pitsqa chïvukunata y juk watayuq pitsqa carnishkunatapis. Tsaykuna karqan Zurisadaipa tsurin Selumielpa ofrendankunami.
42 Soqta kaq junaqchönami Gad trïbu Reuelpa tsurin Eliasaf ofrendanta aparqan.
43 Paymi aparqan qellaypita rurashqa juk plätuta y juk lavatoriuta. Tsay plätu lasarqan pachak kimsa chunka (130) siclo y lavatoriuna lasarqan qanchis chunka (70) siclo. Tsaykunata pësarqan Tinkuna Tolducho kaykaq pësakunawanmi. Tsaki mikuy ofrendapaqmi tsay lavatoriu y tsay plätu aceitiwan pichushqa alinnin harina junta kaykarqan.
44 Tsaynöpis inciensuta aparqan qoripita rurashqa cucharón juntata. Tsay cucharón lasarqan chunka siclumi.
45 Tsaynöpis rupatsina sacrificiupaq aparqan juk turituta, juk carnita y juk watayuq carnishta.
46 Purificatsina sacrificiupaqmi juk chïvuta aparqan.
47 Jawka kawakuy sacrificiupaqnami aparqan ishkay töruta, pitsqa carnikunata, pitsqa chïvukunata y juk watayuq pitsqa carnishkunatapis. Tsaykuna karqan Reuelpa tsurin Eliasafpa ofrendankunami.
48 Qanchis kaq junaqchönami Efraín trïbu Amiudpa tsurin Elisama ofrendanta aparqan.
49 Paymi aparqan qellaypita rurashqa juk plätuta y juk lavatoriuta. Tsay plätu lasarqan pachak kimsa chunka (130) siclo y lavatoriuna lasarqan qanchis chunka (70) siclo. Tsaykunata pësarqan Tinkuna Tolducho kaykaq pësakunawanmi. Tsaki mikuy ofrendapaqmi tsay lavatoriu y tsay plätucho aceitiwan pichushqa alinnin harina junta kaykarqan.
50 Tsaynöpis inciensuta aparqan qoripita rurashqa cucharón juntata. Tsay cucharón lasarqan chunka siclumi.
51 Tsaynöpis rupatsina sacrificiupaq aparqan juk turituta, juk carnita y juk watayuq carnishta.
52 Purificatsina sacrificiupaqmi juk chïvuta aparqan.
53 Jawka kawakuy sacrificiupaqnami aparqan ishkay töruta, pitsqa carnikunata, pitsqa chïvukunata y juk watayuq pitsqa carnishkunatapis. Tsaykuna karqan Amiudpa tsurin Elisamapa ofrendankunami.
54 Pusaq kaq junaqchönami Manasés trïbu Pedasurpa tsurin Gamaliel ofrendanta aparqan.
55 Paymi aparqan qellaypita rurashqa juk plätuta y juk lavatoriuta. Tsay plätu lasarqan pachak kimsa chunka (130) siclo y lavatoriuna lasarqan qanchis chunka (70) siclo. Tsaykunata pësarqan Tinkuna Tolducho kaykaq pësakunawanmi. Tsaki mikuy ofrendapaqmi tsay lavatoriu y tsay plätu aceitiwan pichushqa alinnin harina junta kaykarqan.
56 Tsaynöpis inciensuta aparqan qoripita rurashqa cucharón juntata. Tsay cucharón lasarqan chunka siclumi.
57 Tsaynöpis rupatsina sacrificiupaq aparqan juk turituta, juk carnita y juk watayuq carnishta.
58 Purificatsina sacrificiupaqmi juk chïvuta aparqan.
59 Jawka kawakuy sacrificiupaqnami aparqan ishkay töruta, pitsqa carnikunata, pitsqa chïvukunata y juk watayuq pitsqa carnishkunatapis. Tsaykuna karqan Pedasurpa tsurin Gamalielpa ofrendankunami.
60 Isqun kaq junaqchönami Benjamín trïbu Gedeonipa tsurin Abidán ofrendanta aparqan.
61 Paymi aparqan qellaypita rurashqa juk plätuta y juk lavatoriuta. Tsay plätu lasarqan pachak kimsa chunka (130) siclo y lavatoriuna lasarqan qanchis chunka (70) siclo. Tsaykunata pësarqan Tinkuna Tolducho kaykaq pësakunawanmi. Tsaki mikuy ofrendapaqmi tsay lavatoriu y tsay plätu aceitiwan pichushqa alinnin harina junta kaykarqan.
62 Tsaynöpis inciensuta aparqan qoripita rurashqa cucharón juntata. Tsay cucharón lasarqan chunka siclumi.
63 Tsaynöpis rupatsina sacrificiupaq aparqan juk turituta, juk carnita y juk watayuq carnishta.
64 Purificatsina sacrificiupaqmi juk chïvuta aparqan.
65 Jawka kawakuy sacrificiupaqnami aparqan ishkay töruta, pitsqa carnikunata, pitsqa chïvukunata y juk watayuq pitsqa carnishkunatapis. Tsaykuna karqan Gedeonipa tsurin Abidánpa ofrendankunami.
66 Chunka kaq junaqchönami Dan trïbu Amisadaipa tsurin Ahiezer ofrendanta aparqan.
67 Paymi aparqan qellaypita rurashqa juk plätuta y juk lavatoriuta. Tsay plätu lasarqan pachak kimsa chunka (130) siclo y lavatoriuna lasarqan qanchis chunka (70) siclo. Tsaykunata pësarqan Tinkuna Tolducho kaykaq pësakunawanmi. Tsaki mikuy ofrendapaqmi tsay lavatoriu y tsay plätu aceitiwan pichushqa alinnin harina junta kaykarqan.
68 Tsaynöpis inciensuta aparqan qoripita rurashqa cucharón juntata. Tsay cucharón lasarqan chunka siclumi.
69 Tsaynöpis rupatsina sacrificiupaq aparqan juk turituta, juk carnita y juk watayuq carnishta.
70 Purificatsina sacrificiupaqmi juk chïvuta aparqan.
71 Jawka kawakuy sacrificiupaqnami aparqan ishkay töruta, pitsqa carnikunata, pitsqa chïvukunata y juk watayuq pitsqa carnishkunatapis. Tsaykuna karqan Amisadaipa tsurin Ahiezerpa ofrendankunami.
72 Chunka juk kaq junaqchönami Aser trïbu Ocránpa tsurin Pagiel ofrendanta aparqan.
73 Paymi aparqan qellaypita rurashqa juk plätuta y juk lavatoriuta. Tsay plätu lasarqan pachak kimsa chunka (130) siclo y lavatoriuna lasarqan qanchis chunka (70) siclo. Tsaykunata pësarqan Tinkuna Tolducho kaykaq pësakunawanmi. Tsaki mikuy ofrendapaqmi tsay lavatoriu y tsay plätu aceitiwan pichushqa alinnin harina junta kaykarqan.
74 Tsaynöpis inciensuta aparqan qoripita rurashqa cucharón juntata. Tsay cucharón lasarqan chunka siclumi.
75 Tsaynöpis rupatsina sacrificiupaq aparqan juk turituta, juk carnita y juk watayuq carnishta.
76 Purificatsina sacrificiupaqmi juk chïvuta aparqan.
77 Jawka kawakuy sacrificiupaqnami aparqan ishkay töruta, pitsqa carnikunata, pitsqa chïvukunata y juk watayuq pitsqa carnishkunatapis. Tsaykuna karqan Ocránpa tsurin Pagielpa ofrendankunami.
78 Chunka ishkay kaq junaqchönami Neftalí trïbu Enánpa tsurin Ahira ofrendanta aparqan.
79 Paymi aparqan qellaypita rurashqa juk plätuta y juk lavatoriuta. Tsay plätu lasarqan pachak kimsa chunka (130) siclo y lavatoriuna lasarqan qanchis chunka (70) siclo. Tsaykunata pësarqan Tinkuna Tolducho kaykaq pësakunawanmi. Tsaki mikuy ofrendapaqmi tsay lavatoriu y tsay plätu aceitiwan pichushqa alinnin harina junta kaykarqan.
80 Tsaynöpis inciensuta aparqan qoripita rurashqa cucharón juntata. Tsay cucharón lasarqan chunka siclumi.
81 Tsaynöpis rupatsina sacrificiupaq aparqan juk turituta, juk carnita y juk watayuq carnishta.
82 Purificatsina sacrificiupaqmi juk chïvuta aparqan.
83 Jawka kawakuy sacrificiupaqnami aparqan ishkay töruta, pitsqa carnikunata, pitsqa chïvukunata y juk watayuq pitsqa carnishkunatapis. Tsaykuna karqan Enánpa tsurin Ahirapa ofrendankunami.
84 Tsaynömi altarta dedicapäkunanpaq Israel runakunapa mandaqninkuna ofrendankunata apapäkurqan qellaypita chunka ishkay plätukunata, chunka ishkay tazonkunata y chunka ishkay qoripita rurashqa cucharonkunata.
85 Cada plätu lasarqan pachak kimsa chunka (130) siclo y cada tazonmi lasarqan qanchis chunka (70) siclo. Tsaymi tazonkuna y plätukuna lasarqan ishkay waranqa chusku pachak (2,400) siclo.* Tsaykunata pësapäkurqan Tinkuna Tolducho kaykaq pësakunawanmi.
86 Inciensu junta chunka ishkay qoripita rurashqa cucharonkuna cada ünun lasarqan chunka siclo. Tsaymi lapan qori lasarqan pachak ishkay chunka (120) siclo.* Tsaykunata pësapäkurqan Tinkuna Tolducho kaykaq pësakunawanmi.
87 Rupatsina sacrificiupaq apashqan uywakuna karqan chunka ishkay turitukuna, chunka ishkay carnikuna y juk watayuq chunka ishkay carnishkuna. Tsay uywakunata apapäkurqan tsaki mikuy ofrendankunatawan juntu. Purificatsina sacrificiupaq apashqan chïvukuna karqan chunka ishkaymi.
88 Jawka kawakuy sacrificiupaq apapäkushqan uywakunanami karqan ishkay chunka chusku (24) turitukuna, soqta chunka (60) carnikuna, soqta chunka chïvukuna y juk watayuq soqta chunka carnishkunapis. Altar sagrädu kananpaq aceitita winaparkurmi tsay uywakunata rupatsir altarta dedicarqan.
89 TAYTA DIOSWAN parlananpaq Tinkuna Tolduman yaykurmi *Pactu Babulcho kaykaq ishkay *querubín chawpinpita TAYTA DIOS parlamuqta Moisés mayarqan. Tsay querubinkunaqa *babulpa tsapanan jananchömi kaykarqan. Tsaychömi Moiséswan TAYTA DIOS parlarqan.
Ichic wilacuycuna
^ Sagrädu Toldu Liyinki Tinkuna Toldupita tantiyatsikuyta.
^ altar Altarkunaqa karqan rumiwan perqashqa y qerupita ruraykur jananpa y rurinpa bronciwan enchapashqami. Tsay altarkunachömi uywakunata rupatsir runakuna jutsankunapita perdonashqa kananpaq cürakuna Tayta Diosta manakäriq. Tsaynölami templu rurincho qoripita rurashqa taksha altarpis karqan. Tsaychömi cürakuna inciensuwan qoshtatsiq. Rumipita perqashqa altar imano kashqanta musyanaykipaq rikanki 2Sam. 24.18-cho kaq dibüjuta. Tayta Diosta mana cäsukuq runakunapis altarkunata ruraykurmi ïdulukunata adorapäkuq (Éxo. 30.1-10; Deut. 27.5-6; 2Rey. 16.10-16; 2Crón. 4.1).
^ 7.2 Núm. 1.4-19.
^ levita Levita runakunaqa karqan Jacobpa tsurin Levípita miraq runakunami. Paykunami templucho cürakunata yanaparqan (Núm. 1.47-54; 3.5-39). Templu manaraq kaptinmi Dioswan Tinkuna Tolducho yanaparqan (1Crón. 24–26). Levitakunatami rey Josafat kacharqan markan markan Diospa leyninkunata yachatsipäkunanpaq (2Crón. 17.7-9).
^ 7.7 Núm. 4.21-28.
^ 7.8 Núm. 4.29-33.
^ sagrädu Liyinki santupita tantiyatsikuyta.
^ 7.9 Núm. 4.1-20.
^ 7.13 Juk siclo qellayqa killa arur gänashqannömi karqan. Pachak kimsa chunka siclo qellayqa cäsi juk kïlu pulanmi lasarqan. Qanchis chunka siclo qellayqa mediu kïlupita maslami lasarqan.
^ 7.14 Chunka siclo qoriqa pachak chunka (110) grämumi lasarqan.
^ 7.85 Juk siclo qellayqa killa arur gänashqannömi karqan. Ishkay waranqa chusku pachak (2,400) siclo qellayqa ishkay pachak soqta chunka chusku (264) kïlumi lasarqan.
^ 7.86 Pachak ishkay chunka sicluqa chunka kimsa kïlu ishkay chunka (20) grämumi lasarqan.
^ Pactu Babul Pactu Babulqa jananpa y rurinpa qoriwan enchapashqa cajonmi karqan. Tsay babulpa jananchönami qoripita rurashqa ishkay angilkuna kaykarqan. Tsay babulchömi churaraykarqan ishkay läjaman Tayta Dios qelqashqan chunka mandamientukuna, Aarónpa tukrun y Tayta Dios kamaripashqan maná mikuypis. Pactu Babultami Tayta Dioswan Tinkuna Toldu ruriman churarqan. Castellänuchöqa Pactu Babultami “arca del pacto” nipäkuq (Éxo. 25.10-22; 37.1-9).
^ querubín Querubinqa älayuq angilkunami karkaykan. Querubinkunatami Tayta Dios churarqan Edén huertata täpananpaq (Gén. 3.24). Tsaynölami Pactu Babulpa tsapanan jananchöpis qoripita rurashqa ishkay querubinkuna ichiraykarqan (Éxo. 25.18-22; Heb. 9.5). Salomón ruratsishqan templuchöpis ishkay querubinkunami qoriwan enchapashqa karqan. Tsay querubinkunapa altunmi karqan chusku metru pulan (1Rey. 6.23-29). Profëta Ezequielpis revelacionchömi querubinkunata rikarqan (Eze. 10.1-22; 41.18-19).
^ babulpa tsapanan Babulpa tsapananpa jutinmi hebreucho karqan kapporet. Kapporet ninanqa tsapanan ninanmi y jutsata perdonashqan ninanmi. Wakin castellänu traduccionkunaqa propiciatoriu nirmi tsay palabrata traducin. Babulpa tsapanan jananpitami Moisésta Tayta Dios parlaparqan (Éxo. 25.22). Tsaynöpis babulpa tsapanan jananman pukutaycho Tayta Dios yurimurqan (Lev. 16.2). Israel runakuna purificashqa kananpaq kaq junaqchömi mandaq cüra babul kashqanman yaykur turitupa yawarninman dëdunta jatirkur babulpa tsapananta tsaqtsuparqan (Lev. 16.14).
