Números 8:1-26
8 Tsaypitami Moisésta TAYTA DIOS kayno nirqan:
2 “Aarónta kayno niy: ‘Qanchis mechërukunata candelabruman churay nawpanman atsikyänanpaq’ ”.*
3 Tsaymi Moisésta TAYTA DIOS nishqannöla mechërukunata candelabruman Aarón churarqan nawpanpa atskipänanpaq.
4 Tsay candelabruqa jamakunanpita hasta puntanyaq martilluwan takaylapa qoripita rurashqami karqan. TAYTA DIOS rikatsishqantanölami tsay candelabruta Moisés ruratsirqan.*
Tayta Diosta sirvinanpaq levitakunata churashqan
5 Moiséstami TAYTA DIOS kayno nirqan:
6 “Wakin Israel runakunapita rakirkur *levitakunata purificatsinki.
7 Purificatsirqa paykunapa jananman yakuta tsaqtsupanki. Lapan cuerpunpita shaprankunata rutukurir röpankunata taqshakärinqa. Tsaynöpami purificashqana kanqapaq.
8 Nirkurnami apapäkamunqa juk turituta rupatsina sacrificiupaq y aceitiwan pichushqa harinata tsaki mikuy ofrendapaq. Tsaynöla apapäkamunqa purificatsina sacrificiupaq juk turitutapis.
9 “Levitakunata wilanki Tinkuna Toldu nawpanman shapäkamunanpaq. Tsaynöla wilanki lapan Israel runakunatapis tsayman juntakämunanpaq.
10 Noqapa nawpäman levitakuna shamuptin Israel runakunapa mandaqninkuna makinta churapäkunqa paykunapa umanman.
11 Nirkurnami makinta Aarón joqarishpan nawpächo paykunata dedicanqa sirvimänanpaq. Tsaynöpami levitakuna Israel runakuna apamushqan ofrendano kapäkunqa.
12 “Nirkurnami apapäkamushqan turitukunapa umanman makinta levitakuna churapäkunqa. Juk turituta pishtar altarcho rupatsinki purificatsina sacrificiupaq y jukaq turitutanami pishtar altarcho rupatsinki rupatsina sacrificiupaq. Tsaynöpami levitakuna purificashqa kapäkunqa.
13 “Tsaypitanami paykunata pushanki Aarónpa y tsurinkunapa nawpanman. Tsaychömi makikita joqarirkur levitakunata noqapaq dedicanki.
14 Tsaynöpami Israel runakunapita levitakunata rakinki noqapa kananpaq.
15 Purificashqa y dedicashqa karnami paykuna libri yaykupäkunqa Tinkuna Tolducho rurananpaq kaqkunata rurapäkunanpaq.
16 “Israel runakunapa qechpa olqu tsurinkunapa trukanmi levitakunata akrashqä noqapa kananpaq.
17 Egipto runakunapa qechpa olqu tsurinkunata wanutsishqä junaqpitami Israel runakunapa qechpa olqu tsurinkuna y uywankunapa punta yuriq orqu wawankunapis noqapa kaykan.*
18 Tsaymi levitakuna noqapa kaykan Israel runakunapa qechpa olqu tsurinkunapa trukan.
19 Levitakunatami churashqä Israel runakunapa trukan Tinkuna Tolducho Aarónta y tsurinkunata yanapananpaq. Tsaynöpami Israel runakunata Tinkuna Tolduman aywaptin mana castigashaqtsu”.
20 TAYTA DIOS nishqannölami Moisés, Aarón y lapan Israel runakuna levitakunata churapäkurqan TAYTA DIOSTA sirvinanpaq.
21 Tsaymi levitakuna armakushpan purificakur röpankunata taqshakärirqan. Tsayno rurarkuptinmi makinta joqarkur TAYTA DIOSPAQ paykunata Aarón dedicarqan. Nirkurmi purificatsina sacrificiuta rupatsirqan purificashqa kapäkunanpaq.
22 Tsayno dedicarkuptinnami levitakuna Aarónta y tsurinkunata Tinkuna Toldu patiucho yanapayta qalaykurqan. Moisésta TAYTA DIOS nishqannölami levitakunata dedicar lapanta rurarqan.
Sagrädu Tolducho levitakuna ayka wata sirvinanpaqpis tantiyatsishqan
23 Tsaypitami Moisésta TAYTA DIOS kayno nirqan:
24 “*Levitakuna Tinkuna Toldu patiucho yanapayta qalaykunqa ishkay chunka pitsqa (25) watayuqpitaraqmi.
25 Pitsqa chunka (50) watayuq karnami jubilakärinqa.
26 Jubilakurpis tiempun kashqan höra levita mayinkunata Tinkuna Tolducho yanapanqa. Itsanqa nawpata sirvishqanno mananami sirvinqanatsu. Tsayno kananpaq levitakunata niy”.
Ichic wilacuycuna
^ 8.2 Nawpanman atsikyarqa qori mësacho kaykaq chunka ishkay tantakunatami atsikyaparqan. Tsayta musyanaykipaq liyinki Éxo. 40.22, 24.
^ 8.1-4 Éxo. 25.31-40; 37.17-24.
^ levita Levita runakunaqa karqan Jacobpa tsurin Levípita miraq runakunami. Paykunami templucho cürakunata yanaparqan (Núm. 1.47-54; 3.5-39). Templu manaraq kaptinmi Dioswan Tinkuna Tolducho yanaparqan (1Crón. 24–26). Levitakunatami rey Josafat kacharqan markan markan Diospa leyninkunata yachatsipäkunanpaq (2Crón. 17.7-9).
^ 8.17 Éxo. 13.2, 11-16.
^ levita Levita runakunaqa karqan Jacobpa tsurin Levípita miraq runakunami. Paykunami templucho cürakunata yanaparqan (Núm. 1.47-54; 3.5-39). Templu manaraq kaptinmi Dioswan Tinkuna Tolducho yanaparqan (1Crón. 24–26). Levitakunatami rey Josafat kacharqan markan markan Diospa leyninkunata yachatsipäkunanpaq (2Crón. 17.7-9).
