Números 9:1-23
9 Egiptupita Israel runakuna yarqamushqanpita juk wata cumplirkuptinnami ishkay kaq wata qalaykunan killa Sinaí chunyaq jirkacho Moisésta TAYTA DIOS kayno nirqan:
2 “Israel runakuna cada watami *Pascua fiestata rurapäkunqa nishqä junaqcho.
3 Pascua fiesta qalaykunqa kay killa chunka chusku junaq tardimi. Tsayta rurapäkunqa imanöpis rurananpaq yätsishqänölami”.
4 Tsawraqa Israel mayinkunata Moisés nirqan Pascua fiestata rurapäkunanpaq.
5 Tsaynöpami Moisésta TAYTA DIOS nishqannöla wata qalaykunan killa chunka chusku junaq tardipita qalaykur Sinaí jirkacho Pascua fiestata rurapäkurqan.*
6 Wakinqa ayata yatashqanpita *impüru karmi Pascua carnishta mana pishtarqantsu. Tsaymi tsay junaqla aywar Moisésta y Aarónta
7 kayno nipäkurqan: “Noqakunaqa ayata yatashqa karmi impüru karkaykä. Tsayno karpis ¿manatsuraq Israel mayïkunawan TAYTA DIOSPAQ Pascua carnishta pishtapäküman?”
8 Tsawraqa Moisés kayno nirqan: “TAYTA DIOSTARAQ tapumushaq imata rurapäkunaykipaq kashqantapis”.
9 Tsawraqa Moisésta TAYTA DIOS kayno nirqan:
10 “Israel runakunata kayno niy: ‘Qamkuna y qamkunapita miraqkunapis lapayki adoramashpayki Pascua fiestata rurapäkunki. Tsayno rurapäkunki ayata yatashqanpita impüru karpis o viäjipa aywarpis.
11 Itsanqa tsayno kaqkunaqa juk killa pasarkuptinraqmi chunka chusku junaq tardi Pascua fiestapaq carnishta pishtapäkunqa. Tsay tardi pishtashqan carnishpa aytsanta kankaylapa mikupäkunqa levadüraynaq tantalanpawan y asqaq jachalanpawan.
12 Tsay aytsata waraynin* junaqpaqqa ama putsütsinqatsu ni tulunkunatapis pakinqatsu.* Ruranaykipaq nishqänöla Pascua fiestata rurapäkunki.
13 Püru kaykar y maypapis mana ilashqa kaykar Pascua fiestata mana ruraq kaqtaqa Israel runakunapita qarqupäkunki. Nishqä junaq adoramar Pascua fiestapaq carnishta mana pishtaq kaqtaqa qarqapäkunki.
14 “ ‘Rurapäkunaykipaq nishqänölami qamkunacho kaykaq jäpa runakunapis Pascua fiestata rurapäkunqa. Lapaykipis tsaynöla rurapäkunki’ ”.*
Sagrädu Toldu janancho pukutay kashqan
Éxodo 40.34-38
15 *Pactu Tolduta ichitsishqan junaqmi pukutay tsapakurkurqan. Patsa tsakashqanpita patsa warashqanyaqmi tsay toldu janancho ninano atsikyarqan.*
16 Tsaynölami imaypis junaqpa pukutay tsaparaq y tsakaypana ninano atsikyaraq.
17 Tinkuna *Sagrädu Toldu jananpita pukutay sharkur aywaptinmi Israel runakuna patsarashqanpita aywapäkuq. Maychöpis pukutay takyashqanchömi patsakäriq.
18 Tsay pukutaywanmi Israel runakunata TAYTA DIOS tantiyatsiq aywapäkunanpaq kashqanta o patsakärinanpaq kashqantapis. Tsaymi Sagrädu Toldu jananpita pukutay aywayta qalaykushqanyaq patsakushqalancho täkäriq.
19 Sagrädu Toldu jananpita atska junaq pukutay mana aywaptinqa TAYTA DIOSTA cäsukur Israel runakuna tsaylachömi patsarpaq.
20 Walka junaqla Sagrädu Toldu janancho pukutay kaptinqa tsay junaqkunalami tsaycho patsarpaq. Pukutay aywaptinqa paykunapis aywapäkuqmi. Tsaynöpami Israel runakunata TAYTA DIOS tantiyatsiq aywapäkunanpaq kashqanta o patsakärinanpaq kashqantapis.
21 Aybësisqa juk tsakaylami Tinkuna Sagrädu Toldu janancho pukutay ichiraq. Patsa wararkuptin pukutay aywaqta rikarqa Israel runakunapis aywapäkuqmi. Tsaynölami tsakaypapis junaqpapis pukutay aywaptinqa paykuna aywapäkuq.
22 Sagrädu Toldu janancho pukutay ishkay junaq kaptinpis o juk killa kaptinpis o juk wata kaptinpis Israel runakuna jinanlanchömi patsarpaq. Pukutay aywaptinraqmi paykunapis aywapäkuq.
23 Tsaynöpami Israel runakunata TAYTA DIOS tantiyatsiq aywapäkunanpaq kashqanta o patsakärinanpaq kashqantapis. Moisésta TAYTA DIOS nishqannölami Israel runakuna lapantapis rurapäkurqan.
Ichic wilacuycuna
^ Pascua fiesta Pascua fiestata Israel runakuna rurapäkun Tayta Dios Egiptupita jorqamushqanta yarpapäkurmi. Moisés qelqashqan leykunacho nishqannölami lapan olqu kaqkuna chunka ishkay watayuqpita janaman tsay fiestaman aywapäkuq. Warmikunapis tsay fiestaman aywapäkuqmi (Éxo. 12.1-28; Deut. 16.1-8; Mar. 14.12; 1Cor. 5.7).
^ 9.1-5 Éxo. 12.1-13.
^ püru, impüru Püru ninanqa ima qanrapis mana kashqan ninanmi. Tsaymi Tayta Dios munashqanno jutsaynaq kawaq runapis püru kashqanta Bibliacho nin (1Juan 3.3).
^ 9.12 Wakin runakunaqa warantin nipäkun.
^ 9.12 Éxo. 12.46; Juan 19.36.
^ 9.14 Éxo. 12.48-49.
^ Pactu Toldu Pactu Tolduqa Tayta Dioswan Tinkuna Toldumi karqan. Tsayno jutin karqan Israel runakunawan pactuta rurar paykunawan imaypis kananpaq Tayta Dios promitishqa kaptinmi. Tsay tolducho Tayta Dios kaptinmi Pactu Toldu kashqanta y Tayta Dioswan Tinkuna Toldu kashqanta nipäkurqan (Éxo. 38.21; Núm. 1.50; 2Crón. 24.6; Hech. 7.44; Apoc. 15.5). Tsaynöla Tinkuna Toldupita tantiyatsikuyta liyinki.
^ 9.15 Éxo. 13.21-22.
^ Sagrädu Toldu Liyinki Tinkuna Toldupita tantiyatsikuyta.
