Nahúm 1:1-15
1 Kay libruchömi qelqaraykan profëta Nahúmta Tayta Dios revelashqan. Nahúmqa karqan Elcos markapitami. Paytami Tayta Dios revelacioncho rikatsirqan Nínive markata ushakätsinanpaq kashqanta.*
Nínivita Tayta Dios castigananpaq nishqan
2 TAYTA DIOSQA munan pay japalanta sirvipäkunantami.Contran kaqkunataqa mana kuyapaypami pitapis castigan.*Pipis mana cäsukuptinqa pasaypami rabyakun.
3 TAYTA DIOSQA pacienciakuq y munayniyuqmi kaykan.Pacienciakuq karpis jutsa ruraqkunataqa castiganmi.TAYTA DIOSQA huracán y löcu tamya jananpami aywan.Pukutaypis chakincho polvu sharkuqnölami kaykan.
4 Olqüpaptinqa lamarpis y mayukunapis tsakikäkunmi.Basán particho y Carmelo jirkacho kaqkunapis tsakikäkunmi.Líbanucho kaykaq waytakunapis wanukäkunmi.
5 Pay shamuptinqa jirkankunapis mantsarishpan siksikyanmi.Jirkakunapis tsulur ushakanmi.*Kay patsapis y kay patsacho kaqkunapis lapanmi mantsarishpan siksikyan.
6 Pay rabyanaptin ¿piraq mana mantsarinmantsu?Pay piñakuptin ¿piraq ichipanman?Pay rabyakurqa ninanöraqmi imaykatapis ushan.Pay puriptinqa qaqakunapis partikäkunmi.
7 TAYTA DIOSQA alilata ruraqmi kaykan.Payqa lakikuqkunatapis yanapanmi.Payman yärakuqkunatapis alimi rikan.
8 Paypa contran kaqkunatami itsanqa juchu apaqnöraq ushakätsin.Maypa aywaptinpis wanuylami qatiraykan.
9 ¿Imanirtaq TAYTA DIOSPA contran sharkunaykipaq wilanakurkaykanki?Payqa lapaykitami ushakätsishunkipaq.Contran kaqkunataqa chipyaqmi ushakätsinqa.
10 Jirakashqa shirakata y tsaki oqshata nina rupar ushaqnömi ushakätsinqa.
11 Nínive runakuna*, qamkunapa mandaqniki reyqa TAYTA DIOSPA contranmi sharkushqa.Tsaymi mana alita yätsishunki.
12 Kuyashqan runakunatami TAYTA DIOS kayno nin:“Qamkunata castigashqa karpis kananpitaqa mananami castigashaykinatsu.Asiria nación runakunatami itsanqa munayniyuq kaptinpis y tsaytsika kaptinpis lapanta ushakätsishaq.
13 Tsay runakunapa munaynincho kashqaykipitami jorqamushayki.Mananami yapayqa paykunapa munaynincho kankipaqnatsu”.
14 Nínive markapa mandaqnin reyta TAYTA DIOS kaynömi nin:“Jutikita aparänanpaqpis qampita miraqkuna manami kanqanatsu.Tsaynöpis diosnikipa templuncho kaykaq ïdulukunata qerupita rurashqa kaqta y qoripita y qellaypita fundishqa kaqtapis lapantami ushakätsishaq.Manakaqman qamta churashpämi tsay templuman pampashayki”.
15 (2.1) Judá runakuna, ali wilakuyta apamuq runa jirkakunapa aywaykämuqta rikapäkuy.Paymi apaykämun ali kawapäkunaykipaq kaq wilakuyta.*Kananpitaqa contrayki runakuna ushakätsishunaykipaq manami shamunqanatsu.Paykunaqa lapannami wanur ushakashqa.Tsayno kaykaptinqa Tayta Diospa fiestankunata* rurar kushikäriy.Tsay fiestakunacho payta promitishqaykita cumplipäkuy.
Ichic wilacuycuna
^ 1.1—3.19 Isa. 10.5-34; 14.24-27; Sof. 2.13-15.
^ 1.2-3 Éxo. 20.5-6; Deut. 4.24.
^ 1.5 Sal. 97.5; Miq. 1.4.
^ 1.11 Nínive markaqa karqan Asiria nacionpa capitalninmi.