Nahúm 2:1-13
2 (2) Nínive runakuna, contrayki runakunami ushakätsishunaykipaq aywarkaykämun.Tsayno kaykaptinqa törriman witsarkur alcäbula karkaykay.Nänipa shamuqta rikachakäriy.Espädaykita jukla kamarikäriy.Soldäduykikunata jukla shuntapäkuy.
2 (3) Qamkunami Jacob aylu runakunata ushakätsir rämaynaq üvatano qarapachashqata kacharishqanki.Tsayno rurapäkuptikipis TAYTA DIOSMI Israel runakunata yanapanqa unay kawashqanno yapay ali kawapäkunanpaq.
3 (4) Tayta Diospa soldädunkunaqa atacashunaykipaq kamarikushqanami karkaykan.Escüdunkunapis röpankunapis pukami kaykan.Carrëtankunapis elquynöraqmi atsikyar cörrirkaykan.Cawallunkunapis guërraman jukla yaykuyta munashpanmi atipakurkaykan.
4 (5) Carrëtankunapis qoshtataylami cällikunapa aywarkaykan.Pläzakunachöpis atsikyaypa atsikyar elquynöraqmi wakpa kaypa cörrikacharkaykan.
5 (6) Rey mandaptinmi ali chölu capitankuna escüdunkunawan tsapakurkur markata atacananpaq murällaman tanqanakurraq cörrirkaykan.
6 (7) Marka nawpanpa pasaykaq mayuta qaykuykurmi reypa palaciunta juchurkaykätsin.
7 (8) Reypa warmintapis prësumi aparkaykan.Apakäriptinmi ashmaynin warmikuna paluma waqashqannöraq waqaraykar qepanta aywarkaykan.Pëchuntapis kutarraqmi waqarkaykan.
8 (9) Atacaptinmi Nínive runakuna qeshpir aywakurkaykan.Qocha tsaparaq kichakaptin yaku bunyaypa bunyar aywaqnöraqmi tanqanakurraq runakuna aywakurkaykan.Tsayno aywakärirmi kutinanpaq mayjina qayaptinpis mana kutipäkunnatsu.
9 (10) ¡Nínive runakuna kacharishqan qellayninta y qorintapis apakäriy!¡Paykunapa riquëzankunaqa yupaytapis mana atipaypaqmi kaykan!
10 (11) ¡Nínive marka chunyaraykanmi!¡Pasaypa asulashqami kaykan!¡Wayinkunapis juchutsishqami kaykan!¡Runakuna pasaypa mantsakäriptinmi shonqunkunapis kurun kurunyan y qonqurninkunapis siksikyan!¡Pasaypa almatashqa rikakäriptinmi valorninpis mana kannatsu!
11 (12) Nawpataqa Nínive marka leonpa machayninnömi karqan.Tsaychöqa awkinkunapis y wamrakunapis jawkami kawapäkurqan.
12 (13) Uywakunata wanutsiq leonkunanömi Nínive runakuna karqan.Tsaymi contrankunata ushakarkatsir markanman imaykatapis apaykur aypunakäriq.Tsaynöpami wayinkunamanpis suwakushqankunata churapäkuq.
13 (14) Tsayno kashqanpitami lapanta mandaq TAYTA DIOS Nínive runakunata kayno nin:“Noqaqa qamkunapa contraykinami rikakushqä.Contrayki rikakurmi lapan guërra carrëtaykita uchpayashqanyaq rupatsishaq.Lapan tsurikitami ushakätsishaq.Tsayno ushakätsiptïmi tashqaykicho suwakunapis mana kanqanatsu.Wilakuqkunapis qamkuna kaqcho manami kanqanatsu”.
