Nahúm 3:1-19
3 ¡Wawalaw Nínive runakuna, kananmi mayamanki!Qamkunaqa runakunata mana kuyapaypami yawarninta mashtapäkushqanki.Lulakularmi y runakunata wanutsilarmi purirkaykanki.Mana jamaypami suwakurkaykanki.
2 Tsayno kashqaykipitami mayapäkunkipaq sumbadorta pashtatsiqta,carrëtakunapa ruëdankuna jaqraraykaqta,cawallukuna patatayla cörrirkaykaqtay carrëtakuna taqrarayla aywarkaykaqta.
3 Tsaynöpis rikapäkunkipaq cawallun muntashqa soldädukuna atacashushqaykita,chipchipyaykaq espädankuna y lanzankuna aptashqa aywarkaykämuqta,tsaytsika runakuna däñashqa karkaykaqta,waranqanpa waranqanpa ayakuna jitarpaykaqtay yupaytapis mana atipaypaq wanushqa runakuna karkaykaqta.Tsayno kaptinmi mayman jarunaykipaqpis mana kanqatsu.
4 *Wayrapakuq warmi kuyaylapaq kar runata engañashqannömi qamkunapis atska markakunata engañapäkushqanki.Brüjukunanömi juk nación runakunatapis criyitsipäkushqanki.Tsayno kashqaykipitami tsay desgraciakuna pasashunkipaq.
5 Tsaymi lapanta mandaq TAYTA DIOS kayno nishunki:“Qamkunapa contraykimi kaykä.Runakunapa nawpancho ruripanta qaripaptin warmi penqakushqannömi qamkunapis markakunapa nawpancho penqakärinkipaq.
6 Tsaynöpis ismaywan qanratakuykur runa penqakushqannömi qamkunapis penqakärinkipaq.
7 Lapan rikashuqniki runakunami qeshpiykur kayno nipäkunqa:‘¡Nínive marka pasaypa ushakashqami kaykan!Kananqa ¿piraq tsay markata kuyapanqa?¿Pilaraq tsaycho taq runakunata shoqanqa?’
8 “Nínive runakuna, ¿imanirtaq yarparkaykanki Tebas runakunapita mas munayniyuq kashqaykita?Tebas markaqa kaykan Nilo mayupa nawpanchömi.Marka intëru kuchunpa tumarmi tsay mayu murällano tsapan.
9 Pipis mana atacananpaqmi Etiopía y Egipto nacionkuna favornin imaypis sharkapäkurqan.Tsaynölami Fut y Libia nacionkunapis Tebas markata yanaparqan.
10 Tsayno kaptinpis juk nación runakuna vinciykur Tebas runakunata prësu apakärirqan.Tsaynölami wamrankunata toqshun pilchiq pilchiq cälli esquïnaman paqchirqärirqan.Nirkurmi tsaycho kaykaq yachaq runakunata prësu apakärinanpaq suertita jitapäkurqan.Tsaynölami mayor runakunatapis cadinawan liyarkur prësu apakärirqan.
11 “Nínive runakuna, qamkunapis Tebas marka runakunanölami shinkashqa runano tsankapaykachankipaq.Contraykikuna mana tsarishunaykipaqmi pakakur puripäkunkipaq.
12 Hïgus yörata kuyuratsir shikwaq kaq wayuyninta mikur ushashqannömi qamkunatapis ushakätsishunkipaq.Poqushqa hïgus shikwashqannölami pakakuna törrikikunapis juchur ushakanqapaq.
13 Soldäduykikunapis pasaypa warminömi kanqapaq.Punkuykikunata nina rupar ushaptinmi machayyaraykanqa contraykikuna yaykamunanpaq.
14 “Upupäkunaykipaq yakuta churakuptikipis,marka murälla mas anchu kananpaq perqapäkuptikipis,mituta jaruykur adöbiwan shumaq sigurapäkuptikipis
15 markaykita rupatsir qamkunatapis rupatsipäkushunkipaqmi.Qeshpiq kaqtami espädawan wanutsipäkushunkipaq.Jachata malumya ushashqannömi qamkunatapis chipyaq ushakätsishunkipaq.Tsayno kananpaq kaykaptinqa ¡soldäduykikuna tsaytsika kananpaq mä shuntapäkuy!¡Chukluskuna tsaytsika kashqanno kanaykipaq qamkunapis mä mirapäkuy!
16 “Qamkuna kaqchöqa negociantikuna qoylarnöraqmi mirapäkushqa.Tsayno kaptinpis chukluskuna qaranta loqtirir aywakushqannömi paykunapis aywakärinqapaq.
17 Markaykita täpaq soldädukuna y capitannikikunapis tsaytsika chukluskunanömi karkaykan.Qasaptin perqaman chukluskuna laqarashqannömi paykunapis karkaykan.Inti jeqarkamuptin chukluskuna pärir aywakushqannömi soldäduykikunapis qeshpir aywakärinqa.Maycho kashqantapis manami musyapäkunqatsu.
18 “Asiria nacionpa mandaqnin rey, tantiyakuy ima pasashunaykipaq kashqantapis.Mandäshishuqnikikuna y soldäduykipa capitanninkunapis wanurmi ushakanqapaq.Soldäduykikunapis jirkakunacho mashtashqa kaptin manami pipis shuntananpaq kanqatsu.
19 Qampaqqa wanuypis janaykichönami kaykan.Qamqa pïmaytapis mana kuyapaypami nakatsishqanki.Tsayno kashqaykipitami desgracia pasashushqaykita musyar pïmaypis kushipäshushpayki paqchipäshunkipaq”.
Ichic wilacuycuna
^ wayrapakuq warmi Wayrapakuq warmiqa pägupaq rayku jukwan jukwan kakuq warmimi kaykan. Tsayno warmikunata Tayta Dios imaypis mana perdonananpaq kashqanta runakuna yarpaptinpis Jesucristuqa nirqan jutsankunata kacharir Tayta Dios munashqanno kawarqa perdonashqa kananpaq kashqantami (Mat. 21.31-32; Heb. 11.31).
