Nehemías 1:1-11
1 Kay libruchömi qelqaraykan Hacalíaspa tsurin Nehemías rurashqankuna.
Artajerjes ishkay chunka (20) watana Persia nacionpa mandaqnin rey kaykaptinmi Quisleu killacho noqa Nehemías kaykarqä Susa markacho.
2 Tsaycho kaykaptïmi Judápita shamuq runakunawan wawqï Hanani watukamaq chayamurqan. Paykunatami tapukurqä Jerusalén marka imano kaykashqanta y Judácho quëdamuq runakuna imano kaykashqantapis.
3 Tsawraqa kayno nipäkamarqan: “Judá provinciancho quëdamuq runakuna pasaypa kuyapaypaq y penqaypaqmi nakarkaykan. Jerusalénpa murällanpis chipyaq juchutsishqami kaykan. Punkunkunatapis rupatsirmi ushapäkushqa”.
4 Tsayno wilamaptinmi jamaykur fiyupa waqarqä. Tsaynöpis atska junaq lakishqa qoyarmi jana patsacho kaykaq Tayta Diosta manakur ayunarqä.
5 Manakurmi kayno nirqä:
“Jana patsacho kaykaq TAYTA DIOS, lapanpaq munayniyuq y mantsakuypaqmi kaykanki. *Pactuta rurar promitishqaykinölami *kuyashuqnikikunata y mandamientuykita cumpliqkunataqa imaypis kuyanki.
6 Sirvishuqniki Israel runakunapaq tsakaypa junaqpa manakamushqäta mayaykalämay. Mana cäsukuypami Israel mayïkuna jutsata rurapäkushqa. Tsaynölami aylükunapis y noqapis jutsata rurashqä.
7 Qamta mana cäsukurmi lutankunata rurapäkushqä. Manami cumplipäkushqätsu sirvishuqniki Moiséswan wilakatsimashqayki mandamientuykikunata, estatütuykikunata y leynikikunata.
8 Yarpaykulay Moiséswan chunkapis kayno nishqaykita: ‘Jutsata ruraptikiqa maytsaypapis matsipa matsir aywakärinaykipaqmi qarqushayki.
9 Yapay cäsukamar mandamientükunata cumpliptikiqa maytsaycho mashtakashqa kaptikipis tänäpaq akrashqä patsamanmi shuntamushaykipaq’.
10 “Noqakunaqa sirvishuqniki y kuyashqayki runakunami karkaykä. Munaynikiwanmi unay aylükunata Egiptupita jorqamurqayki.
11 Tayta Dios, manakamushqäta mayaykalämay. Makikicho karmi jutikita joqarir qamta alabapäkü. Tsaynöpis reyta tantiyaykatsilay ruwakuptï awnimänanpaq”.
Tsay witsan noqaqa karqä rey Artajerjespa vïnu sirviqninmi.
Ichic wilacuycuna
^ pactu Pactuqa promitinakushqanta cumplinanpaq nishqanmi kaykan. Unay Testamentuchöqa Israel runakunawanmi pactuta Tayta Dios rurarqan. Tsaymi Tayta Dios promitirqan Israel runakunapa Diosnin kar paykunata imaypis yanapananpaq. Israel runakunanami Tayta Diosta promitirqan mandamientunkunata y leyninkunata cumplipäkunanpaq (Éxo. 6.7; 19.5-6; Lev. 26.3-12). Pactuta rurarmi uywata pishtar shuntashqan yawarta Israel runakunaman Moisés tsaqtsuparqan (Éxo. 24.8). Tsaynölami Jesucristo noqantsi rayku wanur yawarninta jichashpan mushuq pactuta rurarqan payta chaskikuqkunata jutsankunapita perdonar salvananpaq (Luc. 22.20; Heb. 10.16-17).
^ kuyay, Diosta kuyay Tayta Diosta kuyarqa lapan nishqankunatami cäsukuntsi (Deut. 6.5; 11.1; Juan 14.15, 21; 1Juan 5.3). Tsaynöpis Tayta Diosta kuyarqa runa mayintsitapis kuyantsimi (1Juan 4.20-21; 5.1).
