Nehemías 4:1-23
4 (3.33) Juchushqa kaykaq murällata altsarkaykashqäta mayaykurmi Sanbalatqa pasaypa rabyakushpan manakaqman churapäkamarqan.
2 (3.34) Tsaymi mandaq mayinkunapa y Samaria soldädukunapa nawpancho kayno nipäkurqan: “¡Imatataq rurarkaykan mana väliq Israel runakuna! ¿Altsayta usharkur sacrificiuta rupatsinanpaq kashqantatsuraq yarparkaykan? ¿Juk junaqla ushapäkunanpaq kashqantatsuraq yarparkaykan? ¿Pasaypa rupashqa qoturaykaq rumikunawantsuraq perqayta yarparkaykan?”
3 (3.35) Tsaynölami Sambalatpa nawpancho amonita Tobíaspis kayno nirqan: “Paykuna perqashqantaqa atuqlami jarukur juchuratsinqa”.
4 (3.36) Tsayno nipäkuptinmi Tayta Diosta kayno manakurqä: “Tayta Diosnilä, mayaykulay manakaqman churapäkamashqanta. Maldicionapäkamashqanta kikinkunaman tikraykatsilay. Contrankunapa makinman entregaykulay juk lädu nacionman prësu apakärinanpaq.
5 (3.37) Jutsankunatapis ama perdonaytsu. Paykunaqa marka murällata sharkatsiptï manakaqmanmi churapäkaman”.
6 (3.38) Tsayno manakurkurmi lapan voluntänïwan murällata pulanyaqna sharkatsipäkurqä.
7 (1) Jerusalén murällata altutana sharkaykätsishqäta y lapan wakrankunata altsaykätsishqäta musyaykurmi Sanbalat, Tobías, Arabia runakuna, amonita runakuna y Asdod runakuna pasaypa rabyakurqan.
8 (2) Tsaymi wilanakurqan Jerusalénman aywaykamur noqakunata atacapäkamänanpaq.
9 (3) Tsaymi Tayta Diosnintsita manakurir churanakärirqä tsakaypapis o junaqpapis atacamaptin defiendikärinäpaq.
10 (4) Tsaypitanami Judá runakuna* mantsarishpan kayno nipäkurqan:“Murälla juchushqan rumikuna aläpami qoturaykan.Ashtamuqkunapa kalpanpis manami kannatsu.Murälla ushatsiyta manami puëdishunnatsu”.
11 (5) Chikimaqnïkunashi wilanakärishqa kayno nir: “Manana arunanpaq elaqpita yaykurir chipyaq wanutsishun”.
12 (6) Tsaynölami chikimaqnïkuna tashqan läducho taq Israel mayïkuna yaparir yaparir wilapäkamarqan wakpita kaypita noqakunata atacamänanpaq wilanakurkaykashqanta.
13 (7) Tsaymi runakunata aylunpa aylunpa churarqä espädanwan, lanzanwan y flëchankunawan aruqkunata cuidapäkunanpaq. Paykunatami churarqä murälla waqtankunaman, fácil yaykunanpaq kaqkunaman y pipis mana täpashqan kaqkunamanpis.
14 (8) Runakuna mantsakushqanta rikarmi mayor runakunata, mandaqkunata y lapan runakunata kayno nirqä: “Paykunata ama mantsakärishuntsu. Lapanpaq munayniyuq Tayta Diosman yärakur ayluykikunata, tsurikikunata, warmikikunata y wayikikunata defiendipäkuy”.
15 (9) Noqakunapis pelyanäpaq shuyarpaykashqäta musyaykurmi y Tayta Dios tsapata churapashqanta tantiyaykurmi conträkuna manana atacamarqannatsu. Tsaymi perqa altsayta sïguipäkurqä.
16 (10) Tsaypita patsami munaynïcho kaq pulan soldädukuna arupäkurqan y pulan kaqkunanami bronci chalëcun jatishqa pelyananpaq shuyarpaykarqan lanzankunawan, escüdunkunawan y flëchankunawan. Capitankunapis Judá runakunata yanapananpaq listumi kaykarqan.
17 (11) Murällata altsaqkuna y rumi ashtaqkunapis jukaq makinwan aruq y jukaq makinwannami armankunata aptaraq.
18 (12) Paykunaqa lapanmi espädanta tseqlancho tsarararqan. *Cornëta tukaqpis nawpächömi kaykarqan imapis kaptin jukla tukananpaq.
19 (13) Mayor runakunata, mandaqkunata y wakin runakunatapis kaynömi nirqä: “Arunantsipaqqa atskami kaykan. Murällata perqar aläpa karu karumi karkaykantsi.
20 (14) Tsayno kaptinqa atacamaptintsi cornëtata tukamushqanta mayar tsayman lapantsi jukla juntakäshun defiendikunantsipaq. Tayta Diosnintsimi noqantsipa favornintsi pelyanqa”.
21 (15) Tsaymi patsa warashqanpita hasta patsa tsakashqanyaq arupäkuptï pulan kaq runakuna lanzan aptashqa karkaykarqan.
22 (16) Mastami runakunata kayno nirqä: “Yanapashuqnikikunawan kay Jerusalénlacho quëdakäriy. Tsaynöpami tsakaypa täpapäkunki y junaqpana arupäkunki”.
23 (17) Noqapis, aylükunapis, yanapamaqnïkunapis y yanaqaykämaq soldädukunapis röpäkunata manami loqtikärirqätsu. Tsaynöpami atacamaptin pelyanäpaqpis cada ünü kamarikushqala karkaykarqä.
Ichic wilacuycuna
^ 4.10 Judá runakunaqa Israel runakunami karqan.
^ cornëta Cornëtaqa carnipa waqranpita rurashqami karqan. Cornëtata cüra tukashqanta rikanaykipaq rikanki Lev. 25.9 versïculucho kaykaq dibüjuta. Qellaypita rurashqa cornëtapis karqanmi (Núm. 10.1-10).
