Nehemías 5:1-19
5 Tsay witsanmi Israel mayinkuna waktsayätsishqan runakunapis warmikunapis rabyashpan kayno nipäkurqan:
2 “Wayïcho atskaq kaptïmi mikupäkunäpaq tsaki mikuynïpis mana kantsu”.
3 Wakinpis kayno nipäkurqan: “Mikupäkunäpaq mana kaptinmi chakräkunata, üva plantaraykaq chakräkunata y wayïkunatapis prenda churapäkushqä”.
4 Wakinnami kayno nipäkurqan: “Reyta impuestuta pägapäkunäpaqmi üva chakräkunata y wakin chakräkunatapis prenda churapäkushqä.
5 Noqakunapis y jaqan kashqä runakunapis tsay yawarlami karkaykä. Tsurïkunapis y paykunapa tsurinkunapis tsay aylulami karkaykan. Tsayno kaykaptinpis impuestuta päganäpaqmi warmi tsurïkunata y olqu tsurïkunata ashmay kananpaq rantikurkaykä. Wakin warmi tsurïkunata maynami rantikärishqä. Üva chakräkunata y wakin chakräkunatapis prendakushqana kaptïmi imäpis mana kantsu tsurïkunata ashmay kashqanpita jorqupäkunäpaq”.
6 Tsayno parlapäkushqanta mayarmi pasaypa rabyakurqä.
7 Tsaypita shumaq yarpachakurirmi mayor runakunata y mandaqkunata olqüpar kayno nirqä: “¡Imanirtaq tsay yawarla kaykarqa qellaynikipa wawanta cobrarkaykanki!”
Nirkurmi shumaq wilanakunäpaq lapan runakunata qayatsirqä.
8 Juntakarkuptinnami kayno nirqä: “Israel mayintsikunata jäpa nación runakunaman rantikushqantami pägaykur jorqamushqantsi. ¿Tsayno jorqaykämuptintsiku qamkunaqa tsurinkunata rantikunanpaq waktsayaykätsinki?”
Tsayno niptïmi paykunaqa ima niytapis mana kamäpakushpan upälakärirqan.
9 Mastapis kayno nirqä: “Tsayno rurapäkushqaykiqa pasaypa penqaypaqmi kaykan. Tayta Diosnintsita *mantsakurqa runa mayintsita ama waktsayätsishuntsu. Tsaynöpami chikimaqnintsi jäpa runakuna manakaqman mana churaykämäshuntsu.
10 Qamkunanömi aylükunapis, mandäshimaqnïkunapis y kikïpis trïguta y qellayta prestashqä. ¡Prestashqantsita ama cobrashunnatsu!
11 Tsayno kaykaptinqa chakrankunata, üva chakrankunata, olïvu chakrankunata y wayinkunata jukla kutitsipäkuy. Qellayta, trïguta, vïnuta y aceitita prestashqaykitapis ama cobrapäkuynatsu”.
12 Tsayno niptïmi kayno nipäkamarqan: “Nipäkamashqaykinömi lapanta kutitsipäkushaq, tayta. Prestashqäpa wawantapis manami cobrashaqnatsu”.
Tsayno promitiptinmi cürakunata qayaykatsir nawpancho runakunata juratsirqä promitishqankunata cumplipäkunanpaq.
13 Tsaypitanami cäpäta tapsirir kayno nirqä: “Promitishqanta mana cumpliq kaqtaqa cäpäta tapsishqäno wayinpita Tayta Dios qarqutsun. Lapan imaykantapis Tayta Dios qechutsun”.
Tsayno niptïmi lapan runakuna kayno nipäkurqan: “Nishqaykino katsun”. Nirkurmi TAYTA DIOSTA alabar promitipäkushqanta lapan cumplipäkurqan.
14 Judá particho gobernador karqä rey Artajerjes ishkay chunka (20) wata rey kashqanpita hasta kimsa chunka ishkay (32) wata rey kashqanyaqmi. Tsay chunka ishkay wata pasashqanyaq noqapis ni mandäshimaqnïkunapis manami cobrapäkurqätsu gobernador cobrananpaq kaq impuestuta.
15 Noqapita punta kaq gobernadorkunami itsanqa impuestuta cobrarqan. Mikuyta y vïnuta rantinanpaqmi obligapäkurqan chusku chunka (40) yoraq qellayta waran waran kamaripänanpaq. Tsay gobernadorkunapa mandäshiqninkunapis runakunata nakatsipäkurqanmi. Noqami itsanqa Tayta Diosta mantsakur tsaykunata mana rurarqätsu.
16 Tsaypa trukanqa noqapis y mandäshimaqnïkunapis murälla aruyman churakashqa karmi chakrakunata mana rantipäkushqätsu.
17 Wayïchöqa juk pachak pitsqa chunka (150) runakunami mikupäkuq. Paykunami karqan Israel runakuna y soldädukunapa capitanninkuna. Juk lädu nacionpita watukamaq shamuq runakunataqa manami yuparqänatsu.
18 Paykunata qaranäpaqmi cada junaq pishtatsiq kä juk töruta, werannin soqta uyshata y walpakunatapis. Cada chunka junaqmi tsaytsika vïnuta apapäkamuq. Tsayno qaraykarpis runakuna pishïpakuptin gobernador kashqä derëchüta manami cobrarqätsu.
19 ¡Tayta Dios, yarpaykulay kay runakuna ali kawapäkunanpaq yanapashqäta! ¡Noqatapis yanapaykalämay!
Ichic wilacuycuna
^ mantsakuy, Diosta mantsakuy Tayta Diosta mantsakurqa tantiyantsi kuyakuq y perdonakuq karpis jutsa rurayta mana kachariqkunata castigashqantami (Éxo. 34.6; Heb. 10.31). Tayta Dios munayniyuq kashqanta rikar Israel runakunapis payta mantsakurqanmi (Éxo. 14.31; Jos. 4.24; 1Sam. 12.18). Tsaymi Tayta Diosta mantsakur payta adorar cäsukuntsi (Deut. 5.29; 10.12-13; Jos. 24.14) y runa mayintsiwan ali kawantsi (Lev. 25.17, 36, 43). Tayta Diosqa payta mantsakuqkunapa amïgunmi kaykan (Sal. 25.14).
