Nehemías 6:1-19
6 Sanbalat, Tobías, Arabia runa Gesem y wakin chikimaqnï runakunami musyapäkurqan Jerusalén markapa murällanta juk uchkulatapis mana kachaypa altsatsishqäta. Punkukunatami itsanqa mana tanatsirqäraqtsu.
2 Usharkaykashqäta musyaykurmi Sanbalat y Gesem wilakatsimurqan kayno nir: “Ono pampacho kaykaq mayqan markamanpis juntakäshun”.
Tsayno niptinmi maliciarqä atacamayta munashpan niq tumpala qayatsimashqanta.
3 Tsawraqa noqapis kachakunata kacharqä kayno wilananpaq: “Mas väliq kaq aruycho aruptïmi tiempü mana kantsu shamunäpaq. Shamuptïqa aruynïmi qepakanqa”.
4 Tsayno niykaptïpis chusku kutimi kachata kachamurqan puntata nimashqannöla nimänanpaq. Noqapis puntata nishqänölami wilakatsirqä.
5 Pitsqa kutichönami yanapaqninwan cartata apatsimurqan. Tsay cartachöpis punta kaq cartakunacho nishqannölami nirqan. Itsanqa lapanpis liyinanpaq kichaylatami apatsimurqan.
6 Tsay cartachömi kayno nirqan:
“Reypa contran kar murällata sharkaykätsishqaykitami maytsaychöpis runakuna parlarkaykan. Tsaynöpis nirkaykan Jerusalén runakunapa mandaqnin rey kanaykipaq yarpaykashqaykitami. Gesempis tsaynölami niykan.
7 Tsaynölashi Jerusaléncho rey kashqaykita wilakärinanpaq profëtakunatapis churashqanki. Paykunashi kayno nipäkunqa: ‘¡Judácho mandamaqnintsi rey kaykannami!’ Tsaykunata rey Artajerjes manaraq mayashqanyaq jukla shamuy parlakunantsipaq”.
8 Tsaymi Sanbalatta wilananpaq kachamushqan runata kayno nirqä: “Tsay nishqaykiqa manami rasunpatsu. Tsaytaqa yarpaylaykipitami niykanki”.
9 Paykunaqa arurkaykashqäta kacharinäta munarmi imanöpapis mantsakätsimayta munapäkurqan. Tsayno kaptinpis Tayta Diostami manakurqä mana kachaypa yanapamänanpaq.
10 Nirkurnami Delaíapa tsurin y Mehetabelpa wilkan Semaíasta watukuq aywarqä. Payqa wayinchömi pakaraykarqan. Chayaykuptïmi kayno nimarqan: “Wanutsishunaykipaqmi jurarkaykan. Mana wanutsipäkushunaykipaq Tayta Diospa templuncho kaykaq mas ruri kaq cuartuman yaykuykur punkuta trancarkamushun. Mana pakakuptikiqa kanan tsakaymi wanutsishunkipaq”.
11 Niptinmi kayno nirqä: “Noqaqa manami wanuyta mantsakütsu. Tayta Diosman yärakuq runakunaqa manami ni templumanpis pakakuntsu. Imata nimaptikipis manami pakakushaqtsu”.
12 Semaíaspaqqa Tayta Diospa profëtan mana kashqantami tantiyarqä. Payqa profëta tukurqan Sanbalat y Tobías pägashqa kaptilanmi.
13 Payta tsayno pägarqan mantsakätsimänanpaq y yätsimashqanta cäsukur jutsata ruranäpaqmi.* Tsayno ruraptïqa conträ rimashpan pasaypa penqaymanmi churamanman karqan.
14 “¡Sanbalat y Tobías tsayno ruramashqanpita castigaykulay, Tayta Dios! ¡Tsaynöla profetïsa tukuq Noadíastapis castigaykulay! ¡Wakin profëta tukuqkunatapis mantsakätsimashqanpita castigaykulay!”
15 Elul killacho ishkay chunka pitsqa (25) junaqchömi* murälla sharkatsiyta ushapäkurqä. Pitsqa chunka ishkay (52) junaqmi tsay aruycho kapäkurqä.
16 Lapan chikimaqnïkunami musyapäkurqan walka junaqlacho aruyta ushapäkushqäta. Cerca nacionkunacho taq runakunapis pasaypa mantsakashpan runa tukushqan manami välirqantsu. Paykuna tantiyakärirqan Tayta Diosnintsi yanapamaptin aruyta ushapäkushqätami.
17 Tsay witsanmi respitädu Judá runakunawan Tobías atska kuti cartanakärirqan.
18 Judácho taq atska runakunami Tobíaswan ali rikanakurqan. Tsayno ali rikanakurqan Arapa tsurin Secaníaspa mashan Tobías kaptinmi. Tsaynöpis Tobíaspa tsurin Johanánmi Mesulampa mashan karqan.* Mesulamqa karqan Berequíaspa tsurinmi.
19 Tobíaspaqqa pïmaypis ali runa kashqantami nipäkamaq. Tsaynölami ima nishqalätapis payta runakuna jukla wilapaq. Tobíasqa mantsakätsimänan kashqami cartata noqapaq cadala apatsimuq.
Ichic wilacuycuna
^ 6.13 Templu rurincho kaq cuartuman pipis lutala mana yaykunanpaq kashqanta musyanaykipaq liyinki Núm. 18.7.
^ 6.15 Calendariuntsichöqa tsay junaq karqan 2 de octubri wata 445 a. C.
^ 6.18 Mana Israel runa karpis Tobíaspa warminqa cürapa tsurinmi karqan. Tobíaspa tsurinpa warminnami Jerusaléncho reqishqa runapa tsurin karqan. Tobíaspa suedrunpita masta musyanaykipaq liyinki Neh. 3.29; 12.3. Tsurinpa suedrunpita masta musyanaykipaq liyinki Neh. 3.4, 30.
