Sofonías 1:1-18
1 Kaychömi qelqaraykan TAYTA DIOSPA wilakuyninta Sofonías wilakushqan. Sofonías wilakurqan Amónpa tsurin Josías Judá nacionpa mandaqnin rey kaykashqan witsanmi.* Sofonías karqan Cusipa tsurin. Cusi karqan Gedalíaspa tsurin. Gedalías karqan Amaríaspa tsurin. Amarías karqan Ezequíaspa* tsurin.
2 TAYTA DIOSMI kayno nin:“Kay patsacho kaqkunataqa chipyaqmi ushakätsishaq.
3 Runakunata y uywakunatapis lapantami ushakätsishaq.Pishqukunatapis lamarcho pescädukunatapis lapantami ushakätsishaq.Mana cäsukamaq runakunatapis chipyaqmi ushakätsishaq.Kay patsacho lapan runakunatami ushakätsishaq”.TAYTA DIOSMI tsayno nin.
4 “Judá runakunata y Jerusaléncho taqkunata castigashaqmi.*Baalta adoraqkunata y ruratsishqan ïdulukunatapis lapantami ushakätsishaq.Baalta sirviq cürakunatapis lapantami ushakätsishaq.
5 Wayi jananman witsarkur jana patsacho kaykaq qoylarkunata qonqurpaykur adoraqkunatapis ushakätsishaqmi.Qonqurpaykur adoraykämarpis dios Molocta adoraqkunataqa ushakätsishaqmi.*
6 Tsaynölami ushakätsishaq mana cäsukamaqkunata, mana *ashimaqkunata y mana manakamaqkunatapis”.
7 TAYTA DIOSPA nawpancho lapayki upälakäriy.*Juzganan junaq chayaykämunnami.Tsay junaqpaqqa TAYTA DIOSMI sacrificiuta kamarishqa.Sacrificiuman qayatsishqan runakunapis listunami karkaykan.*
8 TAYTA DIOSMI kayno nin:“Tsay juzganä junaqmi castigashaq nación mandaqkunata, reypa tsurinkunata y jäpa runakunapa costumbrinta rurar mana adoramaqkunatapis.
9 Tsay junaqmi ïdulu adoraqkunataqa lapanta castigashaq.Tsay runakunaqa adorashqan ïdulukunapa templunman churananpaqmi suwakuypa y asaltaypa imaykatapis shuntapäkun”.
10 TAYTA DIOSMI kayno nin:“Tsay junaqqa contrankuna atacaptin Pescädu jutiyuq punkupita qaparpashqanmi maytsaymanpis mayakanqa.Markapa kuchun barriucho qaparpashqanpis mayakanqami.Nawpan jirkankunacho qaparpashqanpis fiyupa mantsariypaqmi mayakanqa.
11 “Mactes barriucho taqkuna, lapayki waqapäkuy.Tsay junaqmi lapan negociantikuna wanunqapaq.Rantikuqkunaqa lapanmi ushakanqapaq.
12 Tsay witsanmi lamparinwan atskikurkur Jerusaléncho taqkunata imano kawarkaykashqantapis rikashaq.Tsaychömi jutsata rurar jawka kaykaq runakunata castigashaq.Tsay runakunaqa shonqulanchömi kayno nirkaykan:‘TAYTA DIOSQA manami castigantsu.Payqa manami alitapis ni mana alitapis rurantsu’.
13 Tsayno niykaptinmi contran runakuna lapan imaykankunatapis apakärinqa.Wayinkunatapis juchutsirmi ushapäkunqa.Tänanpaq sharkatsishqan wayikunachöpis manami tanqatsu.Üvakunata plantarpis vïnunta manami upupäkunqatsu”.
14 TAYTA DIOS juzganan junaq chayamunanpaq walkalanami pishiykan.¡Tsay junaq chayaykämunnami!*Tsay junaq fiyupa mantsariypaq kaptinmi ali chölu runakunapis qaparpanqa.
15 Tsay junaqqa Tayta Dios fiyupami rabyakunqa.Tsaymi runakuna fiyupa lakikur ima ruraytapis mana kamäpakunqatsu.Qaparaykälarmi ushakanqa.Fiyupa tsakaymi kanqa.Yanawyayparaq pukutarmi mantsariypaq tsakakäkunqa.
16 Tsay junaqmi altu murallashqa markakunaman y jatusaq törrikunaman pakakuptinpis contran runakuna atacanqa.Atacaptin mantsakurmi *cornëtata tukashpan qaparpanqa.
17 Tayta Dios kaynömi nin:“Runakunata castigaptïmi lakikushpan tsakäpakushqano puripäkunqa.Tsayno kanqa mana cäsukamar jutsata rurashqanpitami.Yawarninpis pampachömi mashtaranqa.Ayankunapis uywapa ismayninnömi mashtaranqa”.
18 TAYTA DIOS juzganan junaqqa manami qellayninpis ni qorinpis runakunata salvanqatsu.Paymi fiyupa rabyashpan kay nacionta chipyaq ushakätsinqa.Elaqpitami kay nacioncho taqkunata lapanta ushakätsinqa.
Ichic wilacuycuna
^ 1.1b 2Rey. 18.1—20.12.
^ Baal Baalqa cananeo runakuna adorashqan diosmi karqan. Juk dios kashqanta yarpaptinpis manami rasunpatsu dios karqan. Cananeo runakuna yarpapäkurqan tsay diosta adoraptin uywankuna mirananpaq kashqanta y chakrankuna ali wayunanpaq kashqantami. Tsaynöpis yarpapäkurqan löcu tamyata y ali tamyatapis kachamushqantami.
^ 1.4-5 2Rey. 23.4-14.
^ ashiy, Diosta ashiy Tayta Diosta ashirqa lapan shonquntsiwanmi payta manakuntsi (Sal. 105.3-4; 2Crón. 7.13-14). Manami templulachötsu Tayta Diosta Israel runakuna ashipäkurqan, sinöqa maytsaychöpis ashipäkurqanmi (Deut. 4.27-31; Jer. 29.12-14). Tayta Diosta ashirqa jutsata rurashqantsipita perdonta manakuntsi (Ose. 3.5) y payta imaypis cäsukuntsi (Sof. 2.3). Tayta Diosta ashirqa tarishunpaqmi (Deut. 4.29-31; 2Crón. 15.2; Isa. 45.19). Tayta Dios nimantsi payta ashinantsipaq (1Crón. 16.10-11; 22.19; Amós 5.4). Mana ashirqa manami pay munashqannötsu kawantsi (2Crón. 12.14).
^ 1.7 Hab. 2.20; Zac. 2.13.
^ 1.7 Kay versïculuchömi Judá runakunata sacrificiuman tinkutsin. Judá runakunapa contrantami sacrificiuta mikunanpaq qayatsishqan runakunaman tinkutsin.
^ cornëta Cornëtaqa carnipa waqranpita rurashqami karqan. Cornëtata cüra tukashqanta rikanaykipaq rikanki Lev. 25.9 versïculucho kaykaq dibüjuta. Qellaypita rurashqa cornëtapis karqanmi (Núm. 10.1-10).
