Sofonías 2:1-15
2 Suëla cära Judá runakuna, lapayki juntakaykur yarpachakäriy jutsa ruraykunata kacharinaykipaq.
2 Tayta Dios rabyanan junaq manaraq chayamuptin jutsa ruraykunata kachariy.Mana kachariptikiqa punshata wayra apar ushakätsishqannömi ushakätsishunkipaq.*
3 Kay patsacho ali shonqu runakuna, TAYTA DIOSTA lapayki ashipäkuy.Mandamientunkunata cäsukuqkuna, mana yachaq tukuypa pay munashqanno kawapäkuy.Capazchari rabyanan junaq TAYTA DIOS salvashunkimanpis.*
Filisteo runakunata castigananpaq nishqan
4 Gaza markapis chunyaqmi rikakunqa.Ascalón markapis pasaypami ushakanqa.Asdod markacho taqkunata junaqpami suwapanqa.Ecrón markacho taqkunatapis yörata sapipita troncuntinta jitarishqannömi qarqapäkunqa.
5 ¡Wawalaw! ¡Lamar kuchuncho taq filisteo runakuna, qamkunapis lakipaypaqmi kankipaq!Castigashunaykipaqmi TAYTA DIOS kayno nin:“¡*Canaáncho taq filisteo runakuna, qamkunata ushakätsiptï markaykikunapis chunyaranqami!*
6 Lamar cercancho kaq chakrakuna tikranqa uywakunata mitsikunalanpaqmi.Uysha kunchakunalami tsaycho kanqa”.
7 Kawaykar quëdaq Judá runakunatami itsanqa TAYTA DIOS yanapanqa mana mantsakuypana kawapäkunanpaq.Paykunapaqna tsay chakrakuna kaptinmi uywankunata tsaycho mitsikärinqa.Ascalóncho kaykaq wayikunachömi punupäkunqapaq.
Moabita y amonita runakunata castigananpaq nishqan
8 Tayta Diosmi kayno nin:“Noqa mayashqämi Moab nación runakuna* y Amón nación runakuna* kuyashqä runakunata ashlishqanta.Tsaynöpis mayashqämi kuyashqä runakunata makitsakurkaykashqanta.Paykunaqa Judá runakunapa chakrankunata qechurmi rïcuyashqa”.
9 Tsaymi Israel runakunata kuyaq y lapanta mandaq TAYTA DIOS jurar kayno nin:“Sodoma markanömi Moab nacionpis ushakanqa.Gomorra markanömi Amón nacionpis ushakanqa.*Chakrankunachöpis kashalanami winamunqa.Wakin chakrankunaqa pasaypami qarayanqa.Chunyaq jirkanömi imayyaqpis kanqa.Kawaykar quëdaq kuyashqä runakunami paykunapa imaykantapis apakärinqa.Alinnin kaq chakrankunatapis qechurkurmi tsaycho täpäkunqa.Nishqäqa rasunpami kanqa”.
10 Tsayno paykunata pasanqa pasaypa ali chölu tukärishqanpitami.Paykunami lapanta mandaq TAYTA DIOS kuyashqan runakunata makitsakärishqa.
11 Kay patsacho adorashqan lapan dioskunata TAYTA DIOS ushakätsirmi Moab nación runakunata y Amón nación runakunata fiyupa castiganqa.Tsaymi karu islakunacho taq runakunapis markankunacho Tayta Diostana adorapäkunqa.
Etiopía runakunata castigananpaq nishqan
12 “Etiopía runakuna,* qamkunatapis espädäwanmi ushakätsishaykipaq”.
Asiria runakunata castigananpaq nishqan
13 Tsaynölami Tayta Diosqa norti kaq lädupa aywar Asiria nacionta ushakätsinqa.*Nínive markacho taq runakunatapis ushakätsiptinmi pasaypa chunyaq rikakunqa.
14 Tsay partiqa uywata mitsikunalanpaqmi kanqa.Tukuy casta munti uywakunami tsaycho tanqa.Tukukuna y akakluykunalami wayikunapa terrädukunacho punupäkunqa.Tsaykuna waqashqanpis ventänapami mayakämunqa.Punkukuna ushakashqa kaptinmi cedru tablawan entablashqanpis alayrina rikakanqa.
15 Tsay markacho taq runakunaqa desgracia pasananpaq kashqanta yarpaylapis manami yarpapäkuntsu.Tsaymi shonqulancho kayno nipäkun:“Noqantsipita mas munayniyuq ¿piraq kanqa?”Jina kaqta ushakätsiptinmi markankuna tikranqa jirka uywakuna täkunanman.Tsayta rikarmi marka nawpanpa pasaqkuna makitapis paqchirraq kushipanqa.
Ichic wilacuycuna
^ 2.2 Sal. 1.4; Jer. 13.24; Ose. 13.3.
^ 2.3 Isa. 55.6-7; Joel 2.12-14.
^ Canaán Canaánchöqa atska markakunami karqan. Cada markachömi juk mandaq rey karqan. Tsaychömi tarqan ceneo runakuna, cenezeo runakuna, cadmoneo runakuna, heteo runakuna, ferezeo runakuna, refaíta runakuna, amorreo runakuna, cananeo runakuna, gergeseo runakuna y jebuseo runakunapis (Gén. 15.19-21). Abrahamtami Tayta Dios promitirqan paypita miraqkunata Canaánta qoykunanpaq (Gén. 17.8).
^ 2.8-11a Isa. 15—16; 25.10-12; Jer. 48; Eze. 25.8-11; Amós 1.13-15.
^ 2.8-11b Jer. 49.1-6; Eze. 21.28-32; 25.1-7; Amós 1.13-15.
^ 2.9 Gén. 19.1-29.
^ 2.12 Isa. 18.1-7.
^ 2.13-15 Isa. 10.5-34; 14.24-27; Nah. 1—3.
