Sofonías 3:1-20
3 ¡Mana wiyakuq Jerusalén runakuna, kuyapaypaqmi ushakankipaq!Qamkunaqa pasaypa jutsasapami karkaykanki.Pïmaytapis nakatsinaykipaq mamalan wachashqami karkaykanki.
2 Qamkunaqa pï wilapäshuptikipis manami chaskikärinkitsu.Corrigishuptikipis manami cäsukärinkitsu.TAYTA DIOSMANPIS manami yärakärinkitsu.Payta manami manakuylapis manakärinkitsu.
3 Yarqanaypita qaparaykaq leonkunanömi autoridänikikunapis karkaykan.Tulutapis mana kachariq yarqanashqa atuqkunanömi jueznikikunapis karkaykan.
4 Profëtaykikunapis mana respitakuq y engañakuqmi karkaykan.Cüraykikunapis *sagrädu templutami *impüruyaykätsin.*Tayta Diospa leyninkunatapis manami cumplipäkuntsu.
5 Tsayno kaptinpis TAYTA DIOSQA imaypis Jerusalénchömi kaykan.Payqa manami imatapis lutankunataqa rurantsu.Cada tutami tantiyatsimantsi alilata ruraq kashqanta.Tsayno kaptinpis jutsa ruraq runakunaqa lutanta rurar manami penqakärintsu.
6 Tayta Diosmi kayno nin:“Atska nacionkunatami ushakätsishqä.Törrinkunatapis juchutsirmi ushakätsishqä.Pipis mana puriptinmi cällikunapis chunyaraykan.Markankunapis lapanmi ushakashqa.Tsaychöqa manami pipis tannatsu.
7 Tsaymi kayno yarparqä:‘Tsay nacionkunata ushakätsishqäta rikakurmi Jerusaléncho taq runakuna *mantsakamar lutan ruraykunata kacharinqapaq.Cäsukamaptinqa paykunata manami ushakätsishaqtsu’.Tsayno yarpaptïpis paykunaqa jutsa ruraykunata manami kacharishqatsu”.
8 Tsaymi TAYTA DIOS kayno nin:“¡Wawalaw!Juzganä junaq imay karpis chayamunqami.Pasaypa rabyanätsimashqanpitami lapan nacionkunata shuntaykur castigashaq.Nina imaykatapis laqwaypa laqwar ushaqnömi kay patsacho taqkunata lapanta ushakätsishaq”.
Runakunata salvananpaq Tayta Dios promitishqan
9 “Nirkurnami maytsaycho taq runakunata tantiyatsishaq jutïta joqarir alabamänanpaq.Tsaynöpami shumaq wilanakur juk shonqula sirvipäkamanqa.
10 Mas karucho taq runakunapis yanapanäpaqmi manakamanqa.Tsay runakunaqa Etiopía nacioncho kaykaq mayukunapita mas karuchömi tarkaykan.Tsaypita patsami ofrendankunata noqapaq apapäkamunqa.
11 Tsay witsanmi jutsata rurar kushikuqkunata qamkunapita qarqushaqpaq.*Sagrädu jirkannïcho manami ali chölu tukärinqanatsu.Jutsata mana ruraypa kawarmi penqakärinqanatsu.
12 “Qamkuna tashqaykichöqa ali shonqu y waktsa runakunalami tanqa.Paykunaqa noqalamanmi yärakamunqa.
13 Israelcho kawaykar quëdaq runakunaqa manami lutanta ruranqanatsu.Paykunaqa manami lulakunqanatsu ni pitapis engañanqanatsu.*Tranquïlu mikukuq uyshakunanömi kawapäkunqa.Manami pipis paykunata mantsakatsinqanatsu”.*
14 ¡*Sión runakuna, cantapäkuy!¡Israel runakuna, kushikuypita qaparpay!¡Jerusalén runakuna, lapan shonquykiwan kushikäriy!
15 TAYTA DIOS manami castigashunkipaqnatsu.Chikishuqnikikunatapis qarqunqami.TAYTA DIOSMI mandaqniki rey kaykan.*Qamkunawan kaykaptinqa manami imapitapis mantsakärinkinatsu.
16 Tsay witsanmi Jerusalén runakunata kayno nipäkunqa:“Sión runakuna, mantsakunaykipa trukanqa ¡valurapäkuy!”
17 Qamkunawanmi TAYTA DIOS kaykan.Munayniyuq karmi salvashunkipaq.Kuyashushpaykimi mushuq kawayta qoshunki.Qamkunapita pasaypa kushikurmi
18 fiestata ruraqno cantanqa.Tayta Diosmi kayno nin:“Manana nakapäkunaykipaqmi yanapashayki.Manami penqaypaqnatsu kapäkunkipaq.
19 Tsay witsanqa nakatsishuqnikikunata kikïmi ushakätsishaq.Nirkurmi oqrakashqa uyshata shuntaqno maytsaypitapis shuntamushaykipaq.Pakikushqa uyshata jampiqnömi qamkunata jampishayki.*Manami pipis jamurpäshunkipaqnatsu.Tsaypa trukanqa yanapashayki maytsaychöpis respitashqa y alabashqa kapäkunaykipaqmi.
20 Tsay witsanmi maytsaypitapis shuntamushayki.Jäpa nacionkunaman apashuqnikikuna rikaykaptin qamkunata kutitsimuptïmi pïmaypis kushikur respitashunkipaq.*Noqa TAYTA DIOSMI tsayno nï”.
Ichic wilacuycuna
^ sagrädu Liyinki santupita tantiyatsikuyta.
^ püru, impüru Püru ninanqa ima qanrapis mana kashqan ninanmi. Tsaymi Tayta Dios munashqanno jutsaynaq kawaq runapis püru kashqanta Bibliacho nin (1Juan 3.3).
^ 3.4 Templuta impüruyätsin Tayta Dios prohibishqanta tsaycho rurarmi. Tsaypita masta musyanaykipaq liyinki Lev. 20.3; 21.12; Núm. 19.13, 20.
^ mantsakuy, Diosta mantsakuy Tayta Diosta mantsakurqa tantiyantsi kuyakuq y perdonakuq karpis jutsa rurayta mana kachariqkunata castigashqantami (Éxo. 34.6; Heb. 10.31). Tayta Dios munayniyuq kashqanta rikar Israel runakunapis payta mantsakurqanmi (Éxo. 14.31; Jos. 4.24; 1Sam. 12.18). Tsaymi Tayta Diosta mantsakur payta adorar cäsukuntsi (Deut. 5.29; 10.12-13; Jos. 24.14) y runa mayintsiwan ali kawantsi (Lev. 25.17, 36, 43). Tayta Diosqa payta mantsakuqkunapa amïgunmi kaykan (Sal. 25.14).
^ sagrädu Liyinki santupita tantiyatsikuyta.
^ 3.13a Apoc. 14.5.
^ 3.13b Sal. 23.2-4; Eze. 34.14-16.
^ Sión Siónqa Jerusaléncho jirkanmi kaykan. Siónchömi Davidpa Markan karqan y templuta sharkatsipäkurqan (Sal. 2.6; 9.11; 132.13). Tsaymi Jerusalén markapa jukaq jutin Sión kaykan (2Crón. 5.2). Bibliachömi Siónta parlapan warmita parlapaqno (Isa. 49.15, 22; Lam. 2.1).
^ 3.19 Miq. 4.6-7.
^ 3.20 Gén. 12.2-3; Zac. 10.8-12.
