Zacarías 13:1-9
13 “Tsay witsanmi pukyupita pashtamuq yakuwan maylaqno Davidpita miraqkunata y Jerusaléncho taq runakunata jutsankunapita perdonashaq”.*
2 Lapanta mandaq TAYTA DIOSMI kayno nin: “Tsay witsanmi intëru kay nacioncho ïdulukunata ushakätsishaq. Tsaymi qepa yuriqkuna tsay ïdulukunapa jutinkunatapis manami musyanqanatsu. Tsaynölami lula profëtakunatapis y lutanta yarpätsiq *supaykunatapis ushakätsishaq.
3 Noqapa jutïcho pipis lulakur wilakuptinqa kikinkunapa taytan y mamanmi kayno nipäkunqa: ‘¡Qamqa kikikipa yarpaynilaykipitami Tayta Diospa wilakuqnin kashqaykita niykanki! Tsayno nishqaykipitami wanunkipaq’. Tsayno nirmi lutanta wilakuykaqta kikinpa maman y taytan tuksipäkunqa.
4 “Tsay witsanmi lapan lula profëtakuna lulakur wilakushqanpita pasaypa penqakärinqa. Tsaymi profëta aylukushqan qaratsapita rurashqa mantunta imaypis aylukärinqanatsu ni profëta tukärinqanatsu.
5 Tsaypa trukanqa kaynömi nipäkunqa: ‘Noqaqa manami profëtatsu kä. Chakra runala karmi wamra kashqäpita patsa noqaqa chakralacho winashqä’.
6 Pipis ‘¿imanirtaq cuerpuyki kutsushqa kaykan?’* nir tapuptin kaynömi nipäkunqa: ‘Tsaytaqa amïgükunapa wayincho arurmi malograkushqä’ ”.
7 Lapanta mandaq TAYTA DIOS kaynömi nin:“Espäda, uyshata mitsinanpaq churashqä amïgüpa contran rikakuy.Uysha mitsiqta wanuykatsiptï uyshankuna wakpa kaypami aywakärinqa.*Uysha malwakunatapis ushakätsishaqmi.
8 Tsaymi kay nacioncho taqkunaqa pulanpita mas wanupäkunqa.Wakilannami kawapäkunqa.
9 Kawaykar quëdaqkunataqa jutsaynaq kananpaqmi purificatsishaq.Qellayta ninawan fundiqno y qorita ninawan qanranta jorquqnömi paykunata purificashaq.*Paykuna manakamaptinqa mayashaqmi.*Tsaymi kayno nishaq: ‘Qamkunaqa kuyashqä wamräkunami karkaykanki’.Paykunanami kayno nipäkamanqa: ‘Noqakunapa Diosnïqa QAMMI kanki’ ”.
Ichic wilacuycuna
^ supay Supaykunaqa Tayta Diosta mana cäsukuq angilkunami kaykan. Paykunami Satanás mandashqanta rurar runakunata qeshyatsin, löcuyätsin, chikinakatsin y yarpayninta pantakätsin Tayta Diospa ali wilakuyninta mana tantiyapäkunanpaq (Mat. 12.43-45; Mar. 1.23-26; Luc. 8.2). Masta musyanaykipaq liyinki Satanáspita tantiyatsikuyta.
^ 13.6 Baalpa profëtankuna kutsukushqanta musyanaykipaq liyinki 1Rey. 18.28.
^ 13.7 Mat. 26.31; Mar. 14.27.
^ 13.9a Isa. 1.25; 48.10.
