Zacarías 2:1-13
2 (5) Tsaypitanami revelacioncho rikarqä cordilnin aptashqa juk mözuta.
2 (6) Paytami kayno tapurqä: “¿Maypataq aywaykanki?”
Tsaymi nimarqan: “Jerusalén markapa largun y anchun ayka kashqantapis musyanäpaq tupuqmi aywaykä”.*
3 (7) Tsaypitanami noqawan parlaq *ángel aywaykaptin juk ángel tinkurqan.
4 (8) Paymi kayno nirqan: “Warakayla aywar tupumuq mözuta kayno ninki: ‘Jerusalénchöqa tsaytsika runakunami tanqa. Uywankunapis atskami kanqa. Runakuna tsaytsika kaptinmi marka murällapis mana kanqanatsu.
5 (9) TAYTA DIOSMI kayno nin: “Jerusalénta imapitapis tsapänäpaq noqami kashaq intëru kuchunpa nina rataykaq murällano. Kikïmi Jerusaléncho taqkunawan kaykäshaq” ’ ”.*
6 (10) Israel runakunatami TAYTA DIOS kayno nin: “Noqami kay patsapa chuskun kuchunman qamkunata qarqushqä. ¡Kananqa norti kaq lädu nacionpa qarqushqa kaqkuna, Jerusalénman qeshpimuy!
7 (11) ¡Babiloniacho taq *Sión runakuna, Jerusalénman qeshpimuy!”
8 (12) Lapanta mandaq TAYTA DIOSMI kachamashqa imaykitapis apakuq nacionkunata kayno wilanäpaq: “Kuyashqä runakunata pipis nakatsirqa nawi ñïñüta pashtaqnömi karkaykan.
9 (13) Tsay nakatsiqkunataqa kikïmi castigashaq. Tsaynöpami kamakätsishaq kikinpa ashmayninkuna paykunata suwapänanpaq”.
Tsay nishqannöla pasaptinmi musyapäkunkipaq lapanta mandaq TAYTA DIOS kachamashqanta.
10 (14) Mastapis TAYTA DIOS kaynömi nin: “Sión runakuna, qamkunawanmi imaypis kaykäshaq. Tsayno kaptinqa kushishqa cantapäkuy.
11 (15) Tsay witsanmi atska nación runakuna sirvimanqapaq. Kuyashqä runakuna kaptinmi noqaqa paykunawan imaypis kaykäshaq”.
Tsay nishqannöla pasaptinmi musyapäkunkipaq lapanta mandaq TAYTA DIOS qamkunaman kachamashqanta.
12 (16) *Sagrädu nacioncho herencian kananpaqmi Judá runakunata TAYTA DIOS shuntanqapaq. Jerusalén markatapis yapaymi akranqa kikinpa kananpaq.
13 (17) Maytsaycho taq runakuna, TAYTA DIOSPA nawpancho upälakäriy.* Payqa jana patsapitami aywaykämun.
Ichic wilacuycuna
^ 2.1-2 Eze. 40.3-4; Apoc. 11.1; 21.15-17.
^ ángel Kay patsata manaraq kamarmi angilkunata Tayta Dios kamarqan payta sirvinanpaq. Angilkunaqa manami imaypis wanuntsu. Tayta Diospa nawpancho karmi imaypis alabarkaykan (Isa. 6.1-3; Apoc. 5.11-12).
^ 2.5 Isa. 4.5; Eze. 43.4-5; Apoc. 21.3, 23.
^ Sión Siónqa Jerusaléncho jirkanmi kaykan. Siónchömi Davidpa Markan karqan y templuta sharkatsipäkurqan (Sal. 2.6; 9.11; 132.13). Tsaymi Jerusalén markapa jukaq jutin Sión kaykan (2Crón. 5.2). Bibliachömi Siónta parlapan warmita parlapaqno (Isa. 49.15, 22; Lam. 2.1).
^ sagrädu Liyinki santupita tantiyatsikuyta.
^ 2.13 Hab. 2.20; Sof. 1.7.
