Zacarías 3:1-10
3 Tsaypita TAYTA DIOS rikatsimarqan mandaq cüra Josuéta.* Payqa ichiraykarqan TAYTA DIOSPA *angilninpa nawpanchömi. Josuépa alawqa kaq nawpanchömi *Satanás kaykarqan payta acusashpan.*
2 Acusaptinmi TAYTA DIOSPA angilnin kayno nirqan: “¡TAYTA DIOSMI upälakunaykipaq nishunki, Satanás!* ¡Jerusalénta akraq TAYTA DIOSMI upälakunaykipaq nishunki! Kay runaqa ¿manaku kaykan rataykaq ninapita jorqushqa shanshaykaq carbonno?”
3 Josuéqa pasaypa qanra röpan jatishqami angilpa nawpancho ichiraykarqan.
4 Tsawraqa yanapaqninkunata ángel kayno nirqan: “Jatiraykashqan qanra röpata loqtipay”.*
Nirkurnami Josuéta kayno nirqan: “Lapan jutsa rurashqaykikunatami perdonashqä. Kananqa kuyaylapaq röpata jatipäshunaykipaqmi nishaq”.*
5 Tsaypitana yanapaqninkunata kayno nirqan: “Mandaq cüra jatikunan limpiu görrata Josuéta jatipay”.
Tsaymi taqshashqa görrata jatiparqan. Nirkurnami kuyaylapaq röpatapis jatiparqan. Tsayno jatipaptinmi TAYTA DIOSPA angilnin nawpancho ichiraykarqan.
6 Jatiparkuptinnami Josuéta TAYTA DIOSPA angilnin kayno nirqan:
7 “Lapanta mandaq TAYTA DIOS kaynömi nin: ‘Lapan nishqäkunata cäsukuptikiqa templüta y patiunta täpanaykipaqmi churashayki. Tsaynölami churashayki sirvimaq angilnïkunano kanaykipaq.
8 “ ‘Mandaq cüra Josué, qampis y cüra mayikikunapis shumaq mayapäkamay. Qamkunaqa señalnömi karkaykanki.* Tsaymi sirviykämaptiki Renuevo nishqan sirvimaqnï runata* kachamushaq.
9 “ ‘Nawpaykiman churashqä rumita rikay. Tsay rumiqa qanchis nawiyuqmi kaykan. Tsay rumimanqa kikïmi qelqashaq. Tsaymi juk junaqlacho runakunapa jutsankunata perdonashaq. Noqa lapanta mandaq TAYTA DIOSMI tsayno nï.
10 Tsay junaqmi cada ünuyki üva yöra sikincho y hïgus yöra sikincho vecïnuykikunawan kushishqa jamakärinkipaq.* Noqa lapanta mandaq TAYTA DIOSMI tsayno nï’ ”.
Ichic wilacuycuna
^ ángel Kay patsata manaraq kamarmi angilkunata Tayta Dios kamarqan payta sirvinanpaq. Angilkunaqa manami imaypis wanuntsu. Tayta Diospa nawpancho karmi imaypis alabarkaykan (Isa. 6.1-3; Apoc. 5.11-12).
^ Satanás Satanásqa supaykunapa mandaqninmi kaykan. Payqa manami Diosnötsu maytsaychöpis kaykan. Satanáspa wakin jutinkunami kaykan diablu y Beelzebú (Mar. 1.13; Hech. 13.10).
^ 3.1b 1Crón. 21.1; Job 1.6; Apoc. 12.10.
^ 3.2 1Juan 2.1; Jud. 9.
^ 3.4 Kay textucho qanra röpanqa jutsankunami kaykan. Loqtipashqanqa perdonashqanmi kaykan.
^ 3.4 Apoc. 19.8.
^ 3.8 Qamkunaqa señalnömi karkaykanki ninanqa qamkuna cüra kar sirvimaptikimi runakuna tantiyapäkunqa yanapaykashqäta ninanmi.
^ 3.8 Jer. 23.5-6; 33.15-16; Zac. 6.12.
