Zacarías 4:1-14
4 Tsaypitanami noqawan parlaykaq *ángel kutimur punukashqa runata rikchatsiqno rikchatsimarqan.
2 Nirkurmi tapumarqan kayno nir: “¿Imatataq rikaykanki?”
Tsawraqa kayno nirqä: “Qoripita fundiypa rurashqa candelabrutami rikaykä. Tsay candelabrupa puntanchömi aceitita winananpaq tazonpis kaykan. Tsay tazonpa wirpanchömi qanchis lamparinkuna kaykan. Cada lamparinpa mëchanman tübulapami aceiti yaykuykan.
3 Candelabrupa nawpanchömi ishkay olïvu yörakuna kaykan.* Jukaq olïvumi kaykan alawqa kaq läduncho. Jukaq olïvunami kaykan itsuq kaq läduncho”.
4 Tsawraqa noqawan parlaykaq angilta tapurqä kayno nir: “¿Imatataq tsaykunawan tantiyaykätsimanki, tayta?”*
5 Tsawraqa ángel kayno nimarqan: “¿Manaku musyanki imapaq kashqantapis?”
Nimaptinmi kayno nirqä: “Manami musyätsu, tayta”.
6 Mastapis kayno nimarqan: “Zorobabelta TAYTA DIOS kaynömi nin:* ‘Manami soldädukunatatsu ni kalpatatsu munanki, sinöqa Espïritütami. Noqa lapanta mandaq TAYTA DIOSMI tsayno nï’.*
7 “Jatunkaray puntano problëmakuna kaptinpis Zorobabelpaqqa manakaqnölami kanqa. Tsaymi templuta ushananpaq ultimu kaq rumita churaptin kayno nipäkunqa: ‘¡Achalaw, kuyaylapaqmi kaykan!’ ”
8 Nirkurnami TAYTA DIOS kayno nimarqan:
9 “Templuta Zorobabel sharkatsiyta qalaykurqa ushatsinanyaqmi arutsinqa”.
Tsay nishqanno templuta arutsir ushatsiptinmi musyapäkunkipaq lapanta mandaq TAYTA DIOS qamkunaman kachamashqanta.
10 Plomädata churapaylapa templuta Zorobabel sharkaykätsiqta rikarmi manakaqman churaqkunapis kushikärinqapaq.
Candelabrupa qanchis mechërunkunaqa TAYTA DIOSPA nawinkunami kaykan. Tsay nawinkunawanmi rikaykan intëru kay patsata.*
11 Masta tapurmi kayno nirqä: “Candelabrupa ishkan läduncho kaykaq olïvu ¿imata kaykan?”*
12 Tsaynöpis tapurqä kayno nir: “Olïvupa ishkan rämankuna ¿imataq kaykan? Tsay rämankunapitami qoripita rurashqa tübupa candelabruman aceiti yaykuykan”.
13 Tsayno tapuptïmi ángel kayno nimarqan: “¿Rasunpaku mana tantiyanki?”
Tsawraqa kayno nirqä: “Manami, Tayta”.
14 Tsaymi kayno nimarqan: “Tsaykunaqa kaykan kay patsata kamaq Tayta Dios akrashqan ishkay runakunami.* Paykunaqa Tayta Diostami sirvirkaykan”.
Ichic wilacuycuna
^ ángel Kay patsata manaraq kamarmi angilkunata Tayta Dios kamarqan payta sirvinanpaq. Angilkunaqa manami imaypis wanuntsu. Tayta Diospa nawpancho karmi imaypis alabarkaykan (Isa. 6.1-3; Apoc. 5.11-12).
^ 4.3 Apoc. 11.4.
^ 4.4 Tsay tapukuypa respuestan qelqaraykan 4.10b-pita 4.14-yaqmi.
^ 4.11-14 Apoc. 11.4.
^ 4.14 Tsay runakunaqa rey Davidpita miraq Zorobabel y mandaq cüra Josuémi.
