Zacarías 5:1-11
5 Tsaypitami rikarqä juk röllu päriykaqta.*
2 Tsaymi *ángel kayno tapumarqan: “¿Imatataq rikaykanki?”
Tsawraqa kayno nirqä: “Päriykaq röllutami rikaykä. Tsay röllupa largunmi kaykan chunka metru y anchunnami pitsqa metru”.
3 Tsawraqa kayno nimarqan: “Tsaychömi qelqaraykan kay patsaman castïgu chayamunanpaq kashqan. Tsay röllupa jukaq waqtancho qelqaraykan suwakuqkuna wanutsishqa kananpaq kashqan. Jukaq kaq waqtanchönami qelqaraykan jutïcho promitirpis mana cumpliqkuna wanutsishqa kananpaq kashqan.
4 Lapanta mandaq TAYTA DIOS kaynömi nin: ‘Tsay castïgutami kachamushqä suwakunapa wayinman yaykunanpaq y jutïcho promitirkurpis mana cumpliqkunapa wayinmanpis yaykunanpaq.* Tsay castïguwanmi tsaycho taqkuna wanupäkunqa. Tsaymi ushakanqa wayi perqakuna y qerukunapis’ ”.
Canastacho warmi kaykaqta revelacioncho rikashqan
5 Tsaypitanami noqawan parlaykaq ángel witiykamur kayno nimarqan: “Taqay aywaykämuqta rikay”.
6 Rikärirmi kayno tapurqä: “¿Imataq tsay kaykan?”
Angilnami kayno nimarqan: “Tsayqa kaykan jatun canastami. Tsaychömi winaraykan maytsaychöpis taq runakunapa jutsankuna”.
7 Tsay jatun canastaqa plömupita rurashqa tsapanawan tsapashqami kaykarqan. Tsapananta kicharkuptinmi rikarqä rurincho juk warmi unchuraykaqta.
8 Tsawraqa ángel kayno nimarqan: “Kay warmiqa runakunapa jutsankunami kaykan”.
Tsayno nirkushpanmi warmita ruriman tsumurkur plömu tsapanawan yapay tsaparkurqan.
9 Yapay nukirkushqächömi rikarqä *cigüeñapa älantano älashqa ishkay warmikunata. Tsay älankunata wayra joqariptinmi pärir aywakärirqan. Tsaymi tsay canastata joqarkur altulapa apapäkurqan.
10 Tsayta rikarmi angilta tapurqä kayno nir: “¿Maymantaq aparkaykan tsay jatun canastata?”
11 Paynami kayno nimarqan: “Babiloniachömi tsay canastapaq templuta sharkatsipanqa. Templuta sharkatsiyta usharkurnami tsayman churapäkunqa”.
Ichic wilacuycuna
^ 5.1-2 Eze. 2.9-10; Apoc. 5.1; 10.9.
^ ángel Kay patsata manaraq kamarmi angilkunata Tayta Dios kamarqan payta sirvinanpaq. Angilkunaqa manami imaypis wanuntsu. Tayta Diospa nawpancho karmi imaypis alabarkaykan (Isa. 6.1-3; Apoc. 5.11-12).
^ 5.3-4 Éxo. 20.7, 15.
^ cigüeña Cigüeñaqa wachwa niraqmi kaykan. Itsanqa älanpis, chankanpis, kunkanpis y tupshinpis mas jatulanmi kaykan. Tsaynöpis shumaqmi pärin (Lev. 11.19; Deut. 14.18; Job 39.13; Sal. 104.17; Jer. 8.7; Zac. 5.9).
