Zacarías 6:1-15
6 Tsaypitanami yapay rikarqä juk mas revelacionta. Tsaychömi rikarqä ishkay jirka puntan chawpinpita chusku carrëtakuna yarqaykämuqta. Tsay jirka puntakunaqa broncipitami karqan.
2 Punta yarqamuq carrëtatami puka cawallukuna qaracharqan. Tsaypa qepanta yarqamuq carrëtatanami yana cawallukuna qaracharqan.
3 Tsaypa qepanta yarqamuq carrëtatami yoraq cawallukuna qaracharqan. Ultimu yarqamuq carrëtatanami bäyu cawallukuna qaracharqan.*
4 Tsaykunata rikarmi parlapämaq *angilta tapurqä kayno nir: “Rikatsimashqaykikuna ¿imataq kaykan, tayta?”
5 Tapukuptïmi ángel kayno nimarqan: “Tsaykunaqa kaykan kay patsata kamaq Tayta Diospa nawpanpita chuskun lädupa aywaq wayrakunami.*
6 Yana cawallukunami norti kaq lädupa carrëtata qaracharkaykan. Yoraq cawallukunami inti jeqanan kaq lädupa carrëtata qaracharkaykan. Bäyu cawallukunami sur kaq lädupa carrëtata qaracharkaykan”.
7 Manaraq yarqurmi tsay cawallukunaqa atipakuykarqan intëru kay patsapa jukla cörriyta munashpan. Tsay cawallukunatami ángel kayno nirqan: “Tumamuy intëru patsata”.
Tsaymi cawallukunaqa intëru patsapa tumamurqan.
8 Tsaypitanami ángel qayaykamar kayno nimarqan: “¡Rikay! Norti kaq lädupa aywaq cawallukunami castïgüta tsayman chayatsipäkushqa.* Tsaymi kanan mana rabyanänatsu”.
9 Nirkurnami TAYTA DIOS kayno nimarqan:
10 “Heldai, Tobías y Jedaíasmi Babiloniacho tashqanpita chayamushqa. Paykuna apamushqan qorita y qellayta manakurir tsay junaqla Sofoníaspa tsurin Josíaspa wayinman ayway.
11 Chayaykur apashqayki qellaypita y qoripita corönata rurarkatsir jatipanki Josadacpa tsurin mandaq cüra Josuéta.
12 “Jatiparkur kayno ninki: ‘Lapanta mandaq TAYTA DIOS kaynömi nin: “Kaychömi kaykan Renuevo nishqan runa.* Paymi templüta sharkatsinqa.
13 Templüta sharkatsiptinmi rey kananpaq churapäkunqa. Trönunman jamaykur mandaptinmi nawpanman juk cürapis jamakunqa mandäshinanpaq. Paykunaqa ishkanpis tsay yarpaylami kanqapaq.
14 Tsay corönaqa templuchömi churaranqa. Tsayta rikarmi runakuna yarpapäkunqa Heldai, Tobías, Jedaías kamaripäkuq kashqanta y Sofoníaspa tsurin Josías corönata rurashqanta”.
15 “ ‘TAYTA DIOSNINTSITA cäsukäriptikiqa juk nacionpita patsami templuta arüshishunaykipaq runakuna shapäkamunqa. Nishqäno kamakaptinmi musyapäkunkipaq qamkunaman lapanta mandaq TAYTA DIOS kachamashqanta’ ”.
Ichic wilacuycuna
^ 6.2-3 Zac. 1.8; Apoc. 6.2-5.
^ ángel Kay patsata manaraq kamarmi angilkunata Tayta Dios kamarqan payta sirvinanpaq. Angilkunaqa manami imaypis wanuntsu. Tayta Diospa nawpancho karmi imaypis alabarkaykan (Isa. 6.1-3; Apoc. 5.11-12).
^ 6.8 Tsayno nirqan Babilonia runakunata Tayta Dios castigaptinmi.
^ 6.12 Jer. 23.5; 33.15; Zac. 3.8.
