Zacarías 8:1-23
8 Lapanta mandaq TAYTA DIOSMI kayno nimarqan:
2 “Noqa lapanta mandaq TAYTA DIOS karmi kayno nï: *Sióncho taq runakunata pasaypami kuyä. Tsaymi paykunapa contran sharkuq runakunata rikaytapis munätsu.
3 “Noqa TAYTA DIOSMI kayno nï: Sión jirkanmanmi kutimushaq. Jerusalénchömi täshaq. Tsay markataqa cäsukuq marka kashqantami nipäkunqa. Lapanta mandaq TAYTA DIOS akrashqan *sagrädu jirkan kashqantami nipäkunqa.*
4 “Lapanta mandaq TAYTA DIOS karmi kayno nï: Jerusalén markapa pläzankunachömi awkinkunapis y chakwankunapis yapay jamarpanqa. Paykunaqa pasaypa chachana karmi tukrulanwanna puripäkunqa.
5 Wamrakunapis cällicho juntakaykurmi puklapäkunqa.
6 “Lapanta mandaq TAYTA DIOS karmi kayno nï: Tsayno kananpaq kashqanta mana criyiptikipis noqapaqqa manami sasatsu kanqa.
7 “Lapanta mandaq TAYTA DIOS karmi kayno nï: Noqami kuyashqä runakunata jorqamushaq maytsay nacionman prësu apapäkushqanpita.
8 Paykunataqa Jerusaléncho tänanpaqmi maytsaypitapis shuntamushaq. Paykunami kuyashqä runakuna kanqa. Noqanami paykunapa Diosnin kashaq.* Lapan promitishqäta cumplirmi paykunata ali rikashaq.
9 “Lapanta mandaq TAYTA DIOS karmi kayno nï: Templüpa cimientunta altsayta qalaykärishqayki junaqpita patsami profëtakuna wilashurqayki sharkatsiyta ushapäkunaykipaq kashqanta. Tsayno kaykaptinqa mana qelanaypa arupäkuy.
10 Templuta sharkatsiyta manaraq qalaykäriptikiqa manami qellay kashqatsu aruqkunata pägapäkunaykipaq ni uywapa alquïlunta pägapäkunaykipaqpis. Jukniki juknikipis chikinakunaykipaq kachariptïmi nänipa purirpis mantsa mantsala puripäkurqayki.
11 Kananpitaqa manami tsaynönatsu kawapäkunkipaq. Lapanta mandaq TAYTA DIOSMI tsayno nï.
12 Tsaypa trukanqa lapaykimi jawkalana kawapäkunkipaq. Üvaykikunapis shumaqmi wayunqa. Chakraykikunacho alimi mikuynikikunapis wayunqa. Tamyapis tiempulanchömi tamyamunqa. Bendicionnïta churamuptïmi ali kawapäkunkipaq.
13 Judá runakuna y Israel runakuna, nawpataqa maytsay nacioncho taq runakunami nipäkurqan maldicionädu kapäkushqaykita. Tsayno niptinpis noqami salvashpä bendicionnïta qamkunaman churamushaq. ¡Mana mantsakuypa kawapäkuy!
14 “Lapanta mandaq TAYTA DIOS karmi kayno nï: Unay ayluykikuna rabyatsimaptin castiganäpaq nishqänölami paykunata castigarqä.
15 Qamkunamanmi itsanqa bendicionnïta churamushaq. Tsayno churamushaq Jerusaléncho taptikipis o Judácho kaykaq wakin markakunacho taptikipis. Tsayno yanapanäpaq kaykaptinqa ama mantsakäriytsu.
16 Ama lulapänakuytsu. Runakuna ali kawapäkunanpaq shumaq arreglapäkuy. Pïmaywanpis ali kawapäkuy.
17 Mayqaykipis runa mayikita ama nanaparaytsu. Tsaynöpis ama lulakäriytsu.* Tsayno kawarqa pasaypami rabyanätsimanki. Noqa TAYTA DIOSMI tsayno nï”.
18 Mastapis lapanta mandaq TAYTA DIOS kaynömi nimarqan:
19 “Chusku kaq killacho, pitsqa kaq killacho, qanchis kaq killacho y chunka kaq killacho lakikur ayunapäkunanpa* trukanqa Judá runakuna kushikushpan fiestata rurar alabapäkamanqa. Tsayno kananpaq kaykaptinqa mana lulapänakuypa alila kawapäkutsun”.
20 Lapanta mandaq TAYTA DIOS karmi kayno nï: Juk lädu nacionkunapita y juk lädu markakunapitami runakuna Jerusalénman shapäkamunqa.
21 Shamunanpaqmi juk markaman juk markaman aywar kayno nipäkunqa: “¡Aywashun TAYTA DIOSTA ruwakunantsipaq! ¡Lapanta mandaq TAYTA DIOSTA *ashishun!”
Tsaymi wakin runakuna kayno nipäkunqa: “¡Noqakunapis aywapäkushaqmi!”
22 Tsayno wilanakurmi markankunapita y nacionninkunapitapis lapanta mandaq TAYTA DIOSTA ashir manakärinanpaq Jerusalénman shapäkamunqa.
23 Lapanta mandaq TAYTA DIOS karmi kayno nï: Tsay witsanmi maytsay nacionpita karpis y ima idiömata parlaq karpis chunka runakuna Judá nación juk runata röpanpita tsarirkur ruwakärinqa kayno nir: “Qamwan aywaytami munarkaykä. Mayapäkushqä Tayta Dios qamkunawan kaykashqantami”.
Ichic wilacuycuna
^ Sión Siónqa Jerusaléncho jirkanmi kaykan. Siónchömi Davidpa Markan karqan y templuta sharkatsipäkurqan (Sal. 2.6; 9.11; 132.13). Tsaymi Jerusalén markapa jukaq jutin Sión kaykan (2Crón. 5.2). Bibliachömi Siónta parlapan warmita parlapaqno (Isa. 49.15, 22; Lam. 2.1).
^ sagrädu Liyinki santupita tantiyatsikuyta.
^ 8.8 Jer. 31.33; 32.38; Eze. 37.23, 27.
^ 8.19 Chunka kaq killacho ayunapäkurqan tsay killa Babilonia soldädukuna Jerusalénta atacayta qalaykushqanta yarparmi (2Rey. 25.1). Chusku kaq killacho ayunapäkurqan tsay killa Jerusalénta tsaparaq murällata Babilonia soldädukuna uchkushqanta yarparmi (2Rey. 25.3-4). Pitsqa kaq killacho ayunapäkurqan tsay killa Babilonia soldädukuna Jerusalénta y templuta rupatsishqanta yarparmi (2Rey. 25.8-9). Qanchis kaq killacho ayunapäkurqan tsay killa Judácho kaykaq gobernador Gedalíasta wanutsishqanta yarparmi (2Rey. 25.25).
^ ashiy, Diosta ashiy Tayta Diosta ashirqa lapan shonquntsiwanmi payta manakuntsi (Sal. 105.3-4; 2Crón. 7.13-14). Manami templulachötsu Tayta Diosta Israel runakuna ashipäkurqan, sinöqa maytsaychöpis ashipäkurqanmi (Deut. 4.27-31; Jer. 29.12-14). Tayta Diosta ashirqa jutsata rurashqantsipita perdonta manakuntsi (Ose. 3.5) y payta imaypis cäsukuntsi (Sof. 2.3). Tayta Diosta ashirqa tarishunpaqmi (Deut. 4.29-31; 2Crón. 15.2; Isa. 45.19). Tayta Dios nimantsi payta ashinantsipaq (1Crón. 16.10-11; 22.19; Amós 5.4). Mana ashirqa manami pay munashqannötsu kawantsi (2Crón. 12.14).
