Zacarías 9:1-17
9 Kaychömi qelqaraykan TAYTA DIOSPA wilakuynin Hadrac markacho y Damasco markacho taq runakunapaq.* Lapan trïbu Israel runakuna imano kawapäkushqanta TAYTA DIOS rikashqannömi Siriacho taq runakunatapis rikaykan.
2 Damascupa lindëruncho taykaq Hamat runakunata, Tiro runakunata y Sidón runakunatapis mayjina yachaq kaptinpis paymi juzgananpaq rikaykan.*
3 Tiro runakunaqa markanta tsapananpaq altu murällatami sharkatsipäkushqa. Pasaypa rïcuyashpanmi alpatanöraq qellayta shuntapäkushqa y shalatanöraqmi qoritapis shuntapäkushqa.
4 Tsayno kaykaqtami Tayta Dios waktsayätsinqa. Imaykantapis lamarman jitarirmi markankunata chipyaq rupatsinqa.
5 Tsayta rikarmi Ascalón markacho taq runakuna fiyupa mantsakanqa. Gaza runakunapis fiyupa lakikärishpanmi siksikyanqa. Pipis yanapananpaq manana kaptinmi Ecrón runakunapis fiyupa lakikärinqa. Gaza markapa mandaqnintapis wanutsipäkunqami. Ascalón markapis chunyaqmi rikakunqa.
6 Asdod markachöpis jäpa runakunami tanqa.
Tayta Dios kaynömi nin: “Ali chölu tukärishqanpitami filisteo* runakunata castigashaq.*
7 Yawartashqa aytsata mikurkaykashqantapis shiminpitami qechushaq. Ïdulukunapaq kankashqan sacrificiuta mikurkaykaptinmi qechushaq.
“Kawaykar quëdaq runakunaqa noqatana sirvimashpanmi Judá runakunanöna kanqapaq. Ecrón runakunaqa jebuseo* runakunanömi kapäkunqa.
8 “Templüta pipis mana atacananpaq kikïmi tsapäshaq. Kuyashqä runakunata pipis mana nakatsinanpaq kikïmi rikashaq”.
Siónman rey chayaptin alabashqan
9 “¡*Sión runakuna, pasaypa kushikäriy!¡Jerusalén runakuna, kushishqa cantapäkuy!*Rikapäkuy mandaqniki rey aywaykämuqta.Paymi alilata ruraq salvashuqniki kaykan.Humildi karmi bürrun muntashqa aywaykämun.Manta bürrun muntashqami aywaykämun.*
10 “Paymi Efraín runakunapa guërra carrëtankunatapis ushakätsinqa.Jerusaléncho guërrapaq kaq cawallukunatapis ushakätsinqami.Guërrata rurapäkunanpaq flëchankunatapis lapantami ushakätsinqa.Paymi maytsay nacioncho taq runakunapaq ali kawayta apamunqa.Lamarpa jukaq kuchunpita jukaq kuchunyaqmi kay patsacho taqkunata mandanqa.Tsaynöpis mandanqa Éufrates mayupita kay patsa kuchunyaqmi.*
11 “Jerusalén runakuna, yawarta jichar *pactu rurashqantsita yarparmi yanapashaykipaq.*Yakuynaq jatun pözuchöno prësu kaykashqaykipitami jorqamushaykipaq.
12 ¡Jäpa nacioncho tarpis kutimuyta yarparqa nacionnikiman kutikamuyna!Aläpa nakashqaykipita ishkay kuti mastami bendicionnïta churamushaq.
13 Judá runakuna, flëcha arcünömi kankipaq.Efraín runakuna, flëchänömi kankipaq.Sión runakuna, espädänömi kankipaq.Qamkunatami kachashayki Grecia runakunata munaynikiman churapäkunaykipaq”.
14 Kuyashqan runakunaman TAYTA DIOS shamurmi flëchankunatapis räyutanöraq contrankunaman jitanqa.Munayniyuq TAYTA DIOSMI *cornëtanta tukar sur kaq lädupita löcu wayrano shamunqa contrankunata ushakätsinanpaq.
15 Kuyashqan runakunatami lapanta mandaq TAYTA DIOS tsapanqa.Tsapaptinmi contrankuna warakarpis mana chayatsinqatsu.Tsaymi kuyashqan runakuna kushikushpan shinkashqa runanöraq büllata rurapäkunqa.Contrankunata wanutsirmi yawarninwan pichukärinqa.Sacrificiupaq shuntashqan yawar tazoncho junta winaraykaqnömi y *altarpa waqrankunacho yawar pichuraykaqnömi contrankunapa yawarninwan pichushqa kanqapaq.
16 Tsay junaqqa TAYTA DIOSMI kuyashqan runakunata salvanqa.Mitsikuq runa uyshankunata salvashqannömi paykunatapis salvanqa.Kuyashqan runakunaqa corönacho kuyaylapaq adornunömi nacionnincho kanqapaq.
17 Tashqan nacionmi maypis täkuypaq y kuyaylapaq kanqa.Trïgupis y mushuq vïnupis atskami kanqa.Tsaychömi olqu wamrakunapis y warmi wamrakunapis kuyaylapaq winapäkunqa.*
Ichic wilacuycuna
^ 9.6 Ascalón, Gaza, Ecrón y Asdod markakunaqa filisteo runakuna tashqan markami karqan.
^ 9.7 Jebuseo runakunaqa Jerusaléncho tarqan Israel runakuna tsaycho manaraq taptinmi. Jebuseo runakunata ushakätsinanpa trukanqa Israel runakuna kacharirqan paykunawan juntu tänanpaq. Tsaypita masta musyanaykipaq liyinki 2Sam. 5.6-7; 24.18; 1Rey. 9.20-21.
^ Sión Siónqa Jerusaléncho jirkanmi kaykan. Siónchömi Davidpa Markan karqan y templuta sharkatsipäkurqan (Sal. 2.6; 9.11; 132.13). Tsaymi Jerusalén markapa jukaq jutin Sión kaykan (2Crón. 5.2). Bibliachömi Siónta parlapan warmita parlapaqno (Isa. 49.15, 22; Lam. 2.1).
^ 9.9a Sof. 3.14-15.
^ 9.9b Mat. 21.5-6; Juan 12.14-15.
^ pactu Pactuqa promitinakushqanta cumplinanpaq nishqanmi kaykan. Unay Testamentuchöqa Israel runakunawanmi pactuta Tayta Dios rurarqan. Tsaymi Tayta Dios promitirqan Israel runakunapa Diosnin kar paykunata imaypis yanapananpaq. Israel runakunanami Tayta Diosta promitirqan mandamientunkunata y leyninkunata cumplipäkunanpaq (Éxo. 6.7; 19.5-6; Lev. 26.3-12). Pactuta rurarmi uywata pishtar shuntashqan yawarta Israel runakunaman Moisés tsaqtsuparqan (Éxo. 24.8). Tsaynölami Jesucristo noqantsi rayku wanur yawarninta jichashpan mushuq pactuta rurarqan payta chaskikuqkunata jutsankunapita perdonar salvananpaq (Luc. 22.20; Heb. 10.16-17).
^ cornëta Cornëtaqa carnipa waqranpita rurashqami karqan. Cornëtata cüra tukashqanta rikanaykipaq rikanki Lev. 25.9 versïculucho kaykaq dibüjuta. Qellaypita rurashqa cornëtapis karqanmi (Núm. 10.1-10).
^ altar Altarkunaqa karqan rumiwan perqashqa y qerupita ruraykur jananpa y rurinpa bronciwan enchapashqami. Tsay altarkunachömi uywakunata rupatsir runakuna jutsankunapita perdonashqa kananpaq cürakuna Tayta Diosta manakäriq. Tsaynölami templu rurincho qoripita rurashqa taksha altarpis karqan. Tsaychömi cürakuna inciensuwan qoshtatsiq. Rumipita perqashqa altar imano kashqanta musyanaykipaq rikanki 2Sam. 24.18-cho kaq dibüjuta. Tayta Diosta mana cäsukuq runakunapis altarkunata ruraykurmi ïdulukunata adorapäkuq (Éxo. 30.1-10; Deut. 27.5-6; 2Rey. 16.10-16; 2Crón. 4.1).
^ 9.17 Jer. 31.12.
