Apocalipsis 1:1-20
1 Kay libruchömi qelqaraykan Jesucristuta Tayta Dios revelashqan. Jesucristumi *angilninta kachamur tsay revelacionta sirviqnin Juanta revelarqan. Tsayno revelarmi sirviqninkunata imapis pasananpaqna kaqkunata tantiyatsirqan.
2 Juannami tsay revelacionta qelqar Tayta Dios nishqankunata, Jesucristo nishqankunata y lapan rikashqankunata qelqashqa.
3 Kushishqami kanqa kay qelqaraykaqkunata liyiqkuna y liyipashqanta mayar cäsukuqkunaqa. Kay qelqaraykaqkunaqa cumplikänanpaqnami kaykan.
Qanchis iglesiakunacho juntakaykaq wawqi panikunata winchikushqan
4 Asia provinciacho kaykaq qanchis *iglesiakunacho juntakaq wawqi panikuna:
Noqa Juanmi qamkunapaq qelqaykämü. Unaypita kawaq, kananpis kaykaq y shamunanpaq kaykaq Tayta Dios y trönunpa nawpancho kaykaq qanchis espïritukunapis* kuyapäshushpayki ali kawapäkunaykipaq yanapaykuläshunki.*
5 Jesucristupis ali kawapäkunaykipaq qamkunata yanapaykuläshunki. Paymi Tayta Dios munashqannöla wilakuyninta wilakushqa y wanushkunapita puntata kawarimushqa.* Kay patsacho lapan reykunapitapis mas munayniyuqmi kaykan.* Paymi kuyamashpantsi yawarninta jichar lapan jutsantsita maylamashqantsi.
6 Mandamaqnintsi rey kashpanmi shuntamashqantsi makincho kanantsipaq. Tsaynöpis churamashqantsi Papänin Tayta Diosta sirviq cürakuna kanantsipaq.* ¡Jesucristo imaypis alabashqa kaykulätsun! ¡Pay japalan mandamaqnintsi kaykulätsun! Amén.
7 ¡Pukutay jananchömi Jesucristo kutimunqa!*Kutiykämuqtami lapan runakuna rikanqa.Payta tuksir wanutsiqkunapis rikanqami.*Kutimuqta rikarmi maytsaychöpis runakuna waqapäkunqa.Tsaynömi kanqa. Amén.
8 Unaypita kawaq, kananpis kaykaq y shamunanpaq kaykaq munayniyuq Tayta Dios kaynömi nin: “Alfa y Omegami noqa kaykä.* [Qalaykunan y ushananmi kaykä]”.*
Jesucristuta Juan rikashqan
9 Noqaqa Jesucristuman yärakuq mayiki Juanmi kaykä. Qamkunanölami Jesucristo *mandaykashqancho kaykä. Nakatsishushqaykinölami noqatapis Jesucristuman yärakushqäpita nakatsipäkaman. Qamkunanölami mana ajayaypa shuyäkuykä paypa nawpanman chayanäpaq. Tayta Diospa wilakuyninta wilakushqäpita y Jesucristo salvamaqnintsi kashqanta wilakushqäpitami Patmos islacho prësu kaykä.
10 Tsaycho kaykarmi domingu junaq Espíritu Santupa munaynincho kar mayarqä *cornëta tukamuqnöraq qepächo kayno nimuqta:
11 “[Alfa y Omegami noqa kaykä. Qalaykunan y ushananmi kaykä.] Revelacioncho rikatsishqäkunata juk rölluman qelqarkur apatsiy [Asia provincia] qanchis markakunacho kaykaq *iglesiakunapaq. Tsay markakuna kaykan Éfeso, Esmirna, Pérgamo, Tiatira, Sardis, Filadelfia y Laodiceami”.
12 Qepächo parlamuqta mayarmi tikraykurqä pï kashqantapis rikanäpaq. Tsaychömi rikarqä qoripita rurashqa qanchis candelabrukuna rataykaqta.*
13 Tsay candelabrukuna chawpinchömi rikarqä runapa tsurin niraqta.* Paymi chaki puntanyaq röpan jatishqa kaykarqan. Qasqunpami qoripita rurashqa wachkuwan wataraykarqan.*
14 Aqtsanpis yoraq milwano y rajuno yoraqmi karqan.* Nawinnami ninanöraq atsikyarqan.
15 Chakinkunapis warishqa broncinöraqmi chipchipyarqan.* Parlashqanpis atska yaku aywar qaparaqnöraqmi karuman mayakarqan.*
16 Alawqa kaq makinchömi qanchis qoylarkunata tsarararqan. Shiminpitanami ishkan lädunpa afilashqa espäda yarqamurqan. Qaqlanpis intinöraqmi chipchipyarqan.
17 Payta rikaykurmi nawpanman wanushqano ishkirqä. Tsaymi alawqa kaq makinwan yataykamar kayno nimarqan: “Ama mantsakamaytsu. Noqami qalaykunan y ushanan kaykä.*
18 Imayyaqpis kawaqmi kaykä. Tsayno kawanäpaqmi wanutsimashqanpita kawarimushqä. [Amén.] Noqami tsararaykä wanushkunapa almankuna kaykashqan llävita.*
19 Lapan rikashqaykita qelqay. Kanan pasaykashqanta y pasananpaq kaqkunatapis lapanta qelqay.
20 “Kananmi tantiyatsishayki alawqa kaq makïcho rikashqayki qanchis qoylarkuna y qoripita qanchis candelabrukuna ima kashqantapis. Qanchis qoylarkuna kaykan tsay qanchis iglesiakunapa *angilninkunami. [Rikashqayki] qanchis candelabrukuna kaykan tsay qanchis markakunacho kaykaq iglesiakunami”.
Ichic wilacuycuna
^ ángel Kay patsata manaraq kamarmi angilkunata Tayta Dios kamarqan payta sirvinanpaq. Angilkunaqa manami imaypis wanuntsu. Tayta Diospa nawpancho karmi imaypis alabarkaykan (Isa. 6.1-3; Apoc. 5.11-12).
^ iglesia Iglesiaqa manami Diosta alabana wayilatsu, sinöqa Jesucristuta chaskikuqkunami kaykan (Hech. 13.1; 14.23; 20.28; Rom. 16.1; Efe. 1.22; 5.23).
^ 1.4 Manami shumaq musyakantsu qanchis espïritukuna ima kashqanpis. Capaz karqan qanchis angilkuna o Espíritu Santupis.
^ 1.5a Hech. 26.23; Col. 1.18.
^ 1.5b Sal. 89.27.
^ 1.7b Zac. 12.10; Juan 19.34, 37.
^ 1.8 Alfa nishqanqa griego alfabëtucho punta kaq letrami kaykan. Omega nishqanqa ushanan kaq letrami kaykan. Tsaymi Alfa y Omegami noqa kaykä nishqanqa qalaykunan y ushananmi kaykä ninan.
^ 1.8 Isa. 41.4; 44.6; Apoc. 1.17; 22.13.
^ mandaykashqan, Tayta Dios mandaykashqan Tayta Dios mandaykashqan nishqanqa Tayta Dios shamur fiyu runakunata ushakätsinanpaq y ali kawayta apamunanpaq kashqantami niykan (Isa. 13.9-10; 65.17-25; Joel 1.14-16; Zac. 14.9). Tayta Dios mandaykashqantami Israel runakuna atska wata shuyarqan (Mar. 15.43).
^ cornëta Cornëtaqa carnipa waqranpita rurashqami karqan. Cornëtata cüra tukashqanta rikanaykipaq rikanki Lev. 25.9 versïculucho kaykaq dibüjuta. Qellaypita rurashqa cornëtapis karqanmi (Núm. 10.1-10).
^ iglesia Iglesiaqa manami Diosta alabana wayilatsu, sinöqa Jesucristuta chaskikuqkunami kaykan (Hech. 13.1; 14.23; 20.28; Rom. 16.1; Efe. 1.22; 5.23).
^ 1.12 Éxo. 27.21; Lev. 24.1-4; Zac. 4.10.
^ 1.15 Eze. 1.24; 43.2.
^ 1.17 Isa. 41.4; 44.6-8; 48.12; Apoc. 1.8; 2.8; 22.13.
^ 1.18 Wanushkunapa almankuna kaykashqan llävita tsararaykashqanta nirmi Jesucristo tantiyatsirqan wanushkunata kawaritsimunanpaq munayniyuq kashqanta.
^ ángel Kay patsata manaraq kamarmi angilkunata Tayta Dios kamarqan payta sirvinanpaq. Angilkunaqa manami imaypis wanuntsu. Tayta Diospa nawpancho karmi imaypis alabarkaykan (Isa. 6.1-3; Apoc. 5.11-12).
