Apocalipsis 11:1-19
11 Tsaychömi shoqushpita rurashqa värata *ángel aptaparkamar kayno nimarqan: “Jerusalénpa ayway Tayta Diospa templunta y *altarta tupumunaykipaq.* Nirkur yupamunki tsaycho adoraq runakunata.
2 Templu waqtancho kaykaq patiuta itsanqa ama tupumunkitsu. Tsay patiuta kachariykushqä mana cäsukamaq runakuna munaynincho tsararänanpaqmi. Paykunami chusku chunka ishkay (42) killa* *sagrädu Jerusalén markata munaynincho tsararanqa.*
3 Tsay witsanmi ishkay wilakuqnïkunata noqa nishaq juk waranqa ishkay pachak soqta chunka (1,260) junaq* wilakuynïta wilakunanpaq. Paykunaqa qachqa röpan jatishqami wilakärinqa”.*
4 Tsay ishkay wilakuqkunaqa kay patsata kamaq Tayta Diospa nawpancho kaykaq ishkay olïvukuna y ishkay candelabrukunami kaykan.*
5 Pipis paykunata wanutsiyta munaptinqa shiminpita nina yarqamurmi rupar ushanqa. Tsaynömi wanunqa paykunapa contran sharkuqkunaqa.
6 Tsay ishkay wilakuqkunaqa munayniyuqmi kanqa tamyatapis mana tamyatsimunanpaq,* yakutapis yawarman tikratsinanpaq* y munashqan höra pesti qeshyawan runakunata ushakätsinanpaqpis.
7 Tayta Dios munashqanno wilakuyninta wilakur usharkuptinnami wanwanyaykaqpita *anticristo yarqamur* paykunapa contran sharkur wanutsinqa.*
8 Wanutsiptinmi ayankuna jatun markapa pläzancho jitaranqa. Tsay markachömi Señor Jesucristutapis wanutsipäkurqan. Tsay markatami Sodomano* y Egiptuno kashqanta nipäkun.
9 Kimsa junaq pulanyaqmi maytsay marka runakunapis, maytsay trïbu runakunapis, ima idiömata rimaq runakunapis y maytsay nación runakunapis wanushqa jitarpaykaqta rikapäkunqa. Ayankunatapis pampananta manami kachapanqatsu.
10 Tsay wilakuqkuna aläpa rabyanätsishqa kaptinmi runakuna kushikushpan regäluta jukninpis jukninpis aypunakunqa.
11 Wanushqa jitarpaykashqanpita kimsa junaq pulantami tsay ishkay wilakuqninkunata Tayta Dios kawaritsimunqa. Tsayta rikaqkuna lapanmi pasaypa mantsakanqa.
12 Kawarirkamurnami kayno nir jana patsapita qayakamuqta mayanqa: “¡Kayman shapäkamuy!” Chikiq runakuna rikarpaykaptinmi pukutay rurinpa jana patsaman aywakärinqa.*
13 Tsay höra patsa fiyupa siksikyaptinmi* tsay markacho cada chunka wayipita juk wayi juchunqa y qanchis waranqa (7,000) runakuna wanupäkunqa. Kawaykar quëdaqkunaqa pasaypa mantsakashqami Tayta Diosta alabapäkunqa.
14 Ishkay kaq nakay pasaptinpis juk masraqmi chayamunanpaq kaykan.
Qanchis kaq ángel cornëtata tukamushqan
15 Qanchis kaq *ángel *cornëtata tukamuptinmi jana patsacho *angilkuna qayakur kayno nimushqan mayakämurqan:“¡Lapan nacionkunapis Señornintsi Tayta Diospa y Cristupa makinchönami karkaykan!¡Paymi imayyaqpis rey kanqa!”*
16 Tsaymi Diospa nawpancho kaykaq ishkay chunka chusku (24) mayor runakuna trönunkunacho jamaraykashqanpita lätakuykur Tayta Diosta adorashpan
17 kayno nipäkurqan:“Lapanpaq munayniyuq Tayta Dios, qamtami agradëcikärï.Unaypitami kaykanki, kananpis kaykankimi [y shamunaykipaqnami kaykanki].Lapantami munaynikicho tsararaykanki.Kananqa qamnami mandayta qalaykushqanki.
18 Qamta cäsukuyta mana munarmi maytsaychöpis runakuna pasaypa rabyakärirqan.Kananqa kikikimi rabyakur wanushkunata juzgankipaq.*Tiempu chayamushqanami sirvishuqniki profëtakunata y qamman yärakur *mantsakushuqnikikunata rïcu kaptinpis waktsa kaptinpis premiuta qonaykipaq.*Runa mayinta wanutsiqkunataqa ushakätsinkipaqmi”.
19 Tsaymi jana patsacho kaykaq templu kichakaptin rikarqä tsaycho kaykaq *Pactu Babulta. Elquypis, räyupis y runtu tamyapis fiyupami karqan. Kay patsapis fiyupami siksikyarqan.*
Ichic wilacuycuna
^ altar Altarkunaqa karqan rumiwan perqashqa y qerupita ruraykur jananpa y rurinpa bronciwan enchapashqami. Tsay altarkunachömi uywakunata rupatsir runakuna jutsankunapita perdonashqa kananpaq cürakuna Tayta Diosta manakäriq. Tsaynölami templu rurincho qoripita rurashqa taksha altarpis karqan. Tsaychömi cürakuna inciensuwan qoshtatsiq. Rumipita perqashqa altar imano kashqanta musyanaykipaq rikanki 2Sam. 24.18-cho kaq dibüjuta. Tayta Diosta mana cäsukuq runakunapis altarkunata ruraykurmi ïdulukunata adorapäkuq (Éxo. 30.1-10; Deut. 27.5-6; 2Rey. 16.10-16; 2Crón. 4.1).
^ 11.1 Eze. 40.3; Zac. 2.1-2.
^ ángel Kay patsata manaraq kamarmi angilkunata Tayta Dios kamarqan payta sirvinanpaq. Angilkunaqa manami imaypis wanuntsu. Tayta Diospa nawpancho karmi imaypis alabarkaykan (Isa. 6.1-3; Apoc. 5.11-12).
^ 11.2 Chusku chunka ishkay (42) killaqa kimsa wata soqta killami kaykan.
^ sagrädu Liyinki santupita tantiyatsikuyta.
^ 11.2 Dan. 7.25; 12.7; Luc. 21.24.
^ 11.3 Waranqa ishkay pachak soqta chunka (1,260) junaqpis kimsa wata soqta killami kaykan.
^ 11.4 Zac. 4.1-14.
^ 11.6a 1Rey. 17.1.
^ 11.6b Éxo. 7.17-19.
^ 11.7a Dan. 7.7; Apoc. 13.5-7; 17.8.
^ anticristo Anticristuqa Jesucristupa contran runami kaykan. Tsay runami Señor Jesucristo kutimunanpaqna kaptin yurimunqa. Nirkurmi runakunata lulapar kayno ninqa: “Noqami Cristo kaykä”. Milagrukunatapis rurarmi Jesucristuman yärakuqkunata engañanqa. Jesucristo kutimurnami azufriwan talushqa nina rupaykaq qochaman anticristuta qaykunqa (Mat. 24.4-5; Mar. 13.5-6; Luc. 21.8; 2Tes. 2.8-10; Apoc. 13.2; 13.13-14; 16.13; 19.20).
^ 11.8 Isa. 1.9-10.
^ 11.12 2Rey. 2.11.
^ 11.13 Apoc. 6.12; 16.18.
^ ángel Kay patsata manaraq kamarmi angilkunata Tayta Dios kamarqan payta sirvinanpaq. Angilkunaqa manami imaypis wanuntsu. Tayta Diospa nawpancho karmi imaypis alabarkaykan (Isa. 6.1-3; Apoc. 5.11-12).
^ cornëta Cornëtaqa carnipa waqranpita rurashqami karqan. Cornëtata cüra tukashqanta rikanaykipaq rikanki Lev. 25.9 versïculucho kaykaq dibüjuta. Qellaypita rurashqa cornëtapis karqanmi (Núm. 10.1-10).
^ ángel Kay patsata manaraq kamarmi angilkunata Tayta Dios kamarqan payta sirvinanpaq. Angilkunaqa manami imaypis wanuntsu. Tayta Diospa nawpancho karmi imaypis alabarkaykan (Isa. 6.1-3; Apoc. 5.11-12).
^ 11.15 Éxo. 15.18; Dan. 2.44; 7.14, 27.
^ mantsakuy, Diosta mantsakuy Tayta Diosta mantsakurqa tantiyantsi kuyakuq y perdonakuq karpis jutsa rurayta mana kachariqkunata castigashqantami (Éxo. 34.6; Heb. 10.31). Tayta Dios munayniyuq kashqanta rikar Israel runakunapis payta mantsakurqanmi (Éxo. 14.31; Jos. 4.24; 1Sam. 12.18). Tsaymi Tayta Diosta mantsakur payta adorar cäsukuntsi (Deut. 5.29; 10.12-13; Jos. 24.14) y runa mayintsiwan ali kawantsi (Lev. 25.17, 36, 43). Tayta Diosqa payta mantsakuqkunapa amïgunmi kaykan (Sal. 25.14).
^ 11.18b Sal. 115.13.
^ Pactu Babul Pactu Babulqa jananpa y rurinpa qoriwan enchapashqa cajonmi karqan. Tsay babulpa jananchönami qoripita rurashqa ishkay angilkuna kaykarqan. Tsay babulchömi churaraykarqan ishkay läjaman Tayta Dios qelqashqan chunka mandamientukuna, Aarónpa tukrun y Tayta Dios kamaripashqan maná mikuypis. Pactu Babultami Tayta Dioswan Tinkuna Toldu ruriman churarqan. Castellänuchöqa Pactu Babultami “arca del pacto” nipäkuq (Éxo. 25.10-22; 37.1-9).
^ 11.19 Apoc. 8.5; 16.18-21.
