Daniel 1:1-21
1 Judá nacioncho kimsa watana Joacim rey kaykaptinmi Babilonia nacionpa mandaqnin rey Nabucodonosor soldädunkunawan Jerusalénman chayaykur jiruruypa tsapapäkurqan.
2 Tayta Diosmi kachaparirqan rey Joacimta Nabucodonosor prësu tsarinanpaq y Diospa templuncho kaykaq wakin manëjukunata apakunanpaq. Tsaykunatami Babiloniaman apaykur diosninkunapa templuncho kaq almacén cuartuman churarqan.*
3 Nirkurnami *eunucukunapa mandaqnin Aspenazta Nabucodonosor nirqan prësu apamushqan wakin Israel mözukunata palaciuman pushananpaq. Wakin mözukunaqa Israel rey aylumi karqan y wakinnami Israelcho rïcu runakunapa aylun karqan.*
4 Tsay akrashqan mözukunami karqan sänu, kuyaylapaq, shumaq tantiyakuq, yachatsiptin jukla yachakuq y ali yachaq. Tsaymi paykuna ali karqan reypa palaciuncho sirvipäkunanpaq, Babilonia* runakuna qelqashqankunata estudiapäkunanpaq y rimashqan idiömata yachakärinanpaq.
5 Rey Nabucodonosormi ordenarqan palaciucho yanukushqan mikuykunata tsay mözukuna waran waran mikupäkunanpaq y vïnuta upupäkunanpaq. Tsaynöpis ordenarqan kimsa wata shumaq yachakurkur palaciucho payta sirvipäkunanpaq.
6 Tsay akrashqan mözukunawanmi karqan Daniel, Ananías, Misael y Azarías. Paykunaqa Judápitami karqan.
7 Paykunapa jutinta Aspenaz trukatsirmi Danielpa jutinta churaparqan Beltsasar kananpaq, Ananíaspa jutinta churaparqan Sadrac kananpaq, Misaelpa jutinta churaparqan Mesac kananpaq y Azaríaspa jutintana churaparqan Abed-nego kananpaq.
8 Danielmi *impüru kayta mana munar yarpachakurqan reypa mikuyninta mana mikunanpaq y vïnuntapis mana upunanpaq. Tsaymi Aspenazta ruwakurqan tsay mikuykunata mana qarananpaq.
9 Tayta Dios yanapaptinmi Danielqa Aspenazwan yachanakurqan.
10 Tsayno ruwakuptinmi Aspenaz kayno nirqan: “Itsanqa reytami mantsakü. Paymi nimashqa qamkunata ali mikuyta qaranäpaq y ali vïnuta kamaripänäpaq. Wakin mözukuna weray weray kaykaqta rikashpan qamkunata upishyashqa kaykaqta rikaykurqa noqatachari wanutsimanqa”.
11 Tsayno niptinmi cuidaqnin runatana Daniel ruwakurqan. Tsay runatami mandaq Aspenaz churarqan Danielta, Ananíasta, Misaelta y Azaríasta cuidananpaq. Ruwakur Daniel kayno nirqan:
12 “Ruwakuläshayki, tayta. Verdüralata y yakulata chunka junaq qaraykalämay.
13 Tsay chunka junaq pasarkuptinna reypa mikuyninta mikuq mözukunaman tinkutsimanki imano kaykashqätapis. Paykunapita mas ali kaptïqa manakushqänöla qarapäkamanki”.
14 Tsaymi cuidaq runa awnishpan manakushqannöla chunka junaq qararqan.
15 Chunka junaq cumplirkuptinnami rey kamaripashqan mikuyta mikuqkunapitapis mas weray werayla karkaykarqan.
16 Tsaymi mözukunata cuidaq runaqa reypa mikuyninta mana qararqantsu y vïnunta tsay mözukunata mana kamariparqannatsu. Tsaypa trukanqa verdüralatami qararqan.
17 Tsay chuskun mözukunata Tayta Dios yachayta qormi yanaparqan Babilonia runakuna qelqashqan röllukunata liyipäkunanpaq y yachatsishqankunata shumaq yachakärinanpaq. Tsaynöpis Danieltami yanaparqan pipis revelación chaskishqanta tantiyananpaq y runakuna imapaq sueñushqantapis musyananpaq.
18 Rey Nabucodonosor nishqanno kimsa wata yacharkatsirnami reypa nawpanman tsay mözukunata Aspenaz pusharqan.
19 Danielwan, Ananíaswan, Misaelwan y Azaríaswan parlarkurnami rey tantiyakurqan lapan mözukunapitapis mas yachaq kapäkushqanta. Tsaymi paykunata churarqan yanapaqninkuna kananpaq.
20 Mayjina sasa kaqkunata rey tapuptinpis maytsaycho kaq brüjukunapita y rikakuqkunapitapis chunka kuti masmi tantiyapäkurqan.
21 Tsaynöpami Danielqa Babiloniacho tarqan rey Ciro punta kaq wata mandashqan witsanyaq.
Ichic wilacuycuna
^ 1.1-2 2Rey. 24.1; 2Crón. 36.6-7.
^ eunucu Eunucu runakunaqa capashqa runakunami karkaykan. Tsay witsanmi runakunata akraykur reykuna capatsiq warmikunata mana munapänanpaq. Nirkurnami tsay capashqa runakunata churaq reypa warminkunata cuidananpaq karpis o mandäshinanpaq karpis (Est. 2.3, 14; Hech. 8.27).
^ 1.3 2Rey. 20.18; 24.10-16; Isa. 39.7.
^ 1.4 Hebreo idiömachöqa Caldea ninmi. Caldeaqa Babiloniapa jukaq jutinmi kaykan.
