Daniel 10:1-21
10 Kimsa watana Persia nacionpa mandaqnin rey Ciro kaykaptinmi Beltsasar jutiyuq Danielta Tayta Dios revelarqan. Tsay revelacioncho wilashqankuna rasunpa pasananpaqmi kaykan. Sasa tantiyay kaptinpis imapaq kashqantapis Danielqa tantiyarqanmi.
2 Tsay witsanmi noqa Daniel yarpachakur kimsa semäna fiyupa lakikurqä.
3 Tsayno lakikurmi ali mikuyta ni aytsatapis mikurqätsu ni vïnutapis upurqätsu ni perfümitapis winakurqätsu.
4 Punta kaq killacho* ishkay chunka chusku (24) kaq junaqchömi Tigris mayu kuchuncho kaykarqä.
5 Nukirkushqächömi rikarqä lïnu fïnu röpan jatishqa runa nawpächo ichiraykaqta. Paypa wachkunqa alinnin kaq qoripitami karqan.
6 Cuerpunpis berilo ruminöraqmi chipchipyarqan. Qaqlanpis elquynöraqmi chipchipyarqan. Nawinkunapis atskinöraqmi atsikyarqan. Rikrankuna y chakinkuna chipchipyaykaq broncinömi karqan. Atska runakuna rimashqannömi rimashqanpis mayakarqan.*
7 Japalämi tsay revelacionta rikarqä. Noqawan kaykaq runakunaqa manami imatapis rikapäkurqantsu. Mana rikarpis pasaypa mantsakurmi pakakärirqan.
8 Tsay revelacionta rikashqä höra manami pipis yanaqämarqantsu. Pasaypa almatashqa kaptïmi kalpäpis mana karqantsu.
9 Parlashqanta mayaykurmi pitir pampaman upaksakaypa tunirqä.
10 Tsay hörami sharkarkatsimaptin qonqurpakuykur siksikyashpä maki paltaläwan tuknakurqä.
11 Tsawraqa kayno nimarqan: “Daniel, sharkuy. Tayta Dios kuyashushpaykimi qamwan parlanäpaq kachamashqa. Kanan nishqäta shumaq mayamay”.
Tsayno nimaptinmi siksikyaykar ichirkurqä.
12 Tsawraqa kayno nimarqan: “Daniel, ama mantsakuytsu. Revelación rikashqaykita tantiyanaykipaq ayunayta y manakuyta qalaykushqayki junaqpita patsami Tayta Dios mayashushqanki. Tsaymi shamushqä tantiyatsinäpaq.
13 “Ishkay chunka juk (21) junaqmi Persia nacionpa mandaqnin ángel tsapata churapämashqa. *Angilkunapa mandaqnin Miguel yanapamänanpaq shamuptinmi* Persia nacionpa mandaqnin angilwan pelyananpaq tsaycho kacharishqä.
14 Revelacionta rikashqaykiqa kaykan Israel runakunata ultimu tiempucho pasananpaq kaqkunami. Tsayta tantiyatsinäpaqmi shamushqä”.
15 Tsayno parlapämaptinmi lakikushpä upälala uysuräkurqä.
16 Tsayno kaykaptïmi juk runa niraq elaqpita yurirkamur shimïta yataykamarqan. Tsaymi parlapaykämaq runata kayno nirqä: “Revelacionta rikashqäpita pasaypa lakikuptïmi kalpäpis kannatsu, tayta.
17 Parlanäpaqpis manami valornï kannatsu. Wanuy wanuytami rikchakuykä”.
18 Tsawraqa tsay runa niraq yapay yataykamaptin valornï yurirkurqan.
19 Nirkurmi kayno nimarqan: “Tayta Dios kuyaykäshuptikiqa ama mantsakuytsu. ¡Valurashpayki kushikuy!”
Tsayno parlapaykämaptinmi kalpä yurirkurqan. Tsawraqa kayno nirqä: “Valorta qoykämaptikiqa listumi kaykä parlapämashqaykita mayanäpaq, tayta”.
20 Niptïmi kayno nimarqan: “Imapaq shamushqätapis ¿musyankiku? Kananqa Persia nacionpa mandaqnin angilwan pelyanäpaqmi kutishaq. Tsaypitanami Grecia nacionpa mandaqnin ángel shamunqa.
21 Tsay mandaq angilkunawan pelyaptï qamkunata tsapäshuqniki ángel Miguelmi yanapaman. Paypita masqa manami pipis kantsu yanapamänanpaq. Pelyaq manaraq aywarmi Libru de la Verdadcho ima qelqaraykashqantapis tantiyatsishayki”.
Ichic wilacuycuna
^ 10.4 Punta kaq killapa jutinmi karqan Nisán. Nisán killaqa aybësis qalaykun marzu ushanan junaqkunacho y aybësis qalaykun abril qalaykunan junaqkunachömi. Tsay killachömi Israel runakuna Pascua fiestata y Levadüraynaq Tantata Mikupäkunan fiestata rurapäkurqan. Tsay fiestakunapita masta musyanaykipaq liyinki Éxo. 12.1-20.
^ 10.5-6 Apoc. 1.13-15; 19.12.
^ ángel Kay patsata manaraq kamarmi angilkunata Tayta Dios kamarqan payta sirvinanpaq. Angilkunaqa manami imaypis wanuntsu. Tayta Diospa nawpancho karmi imaypis alabarkaykan (Isa. 6.1-3; Apoc. 5.11-12).
^ 10.13 Apoc. 12.7.
