Daniel 12:1-13
12 “Tsay witsanmi Israel runakunata cuidaq y *angilkunapa mandaqnin Miguel Israel runakunapa favornin sharkunqa. Runakuna fiyupa nakaycho karmi lakikärinqa. Kay patsacho nacionkuna kashqanpita patsa imaypis manami tsayjinanpa nakaykuna y lakikuykunapis kashqatsu.* Librucho jutinkuna apuntaraykaqlami Israel mayikikuna salvakärinqa.
2 “Tsay junaqmi pamparaykashqanpita tsaytsika runakuna kawarimunqa. Wakinnami kawarimunqa imayyaqpis kawapäkunanpaq y wakinnami kawarimunqa imayyaqpis nakapäkunanpaq. Nakananpaq kawarimuqkunami jutsata rurashqanpita pasaypa penqaycho kanqa.*
3 Tantiyakuq runakunaqa chipchipyaykaq ciëlunömi atsikyanqa. Runakuna ali kawananpaq yachatsiqkunaqa qoylarkunanömi imayyaqpis chipchipyanqapaq.
4 “Daniel, wilapashqäkunata tiempu chayamushqanyaq pitapis ama wilapaytsu. Qelqaraykaq rölluta cërawan shumaq laqaykur churay.* Runakunaqa maytsaypapis aywar yachakushpanmi mas yachaq rikakärinqa”.
5 Tsaypitanami noqa Daniel rikarqä ishkay runakunata. Jukaq runami ichiraykarqan mayu kay tsimpancho y jukaqnami ichiraykarqan wak tsimpancho.
6 Yaku janancho ichiraykaq lïnu röpan jatishqa runatami jukaq runa tapurqan kayno nir: “Mantsariypaq nishqaykikuna pasananpaq ¿ayka tiemputaq pishiykan?”
7 Tsayno niptinmi lïnu röpan jatishqa runa mayu janancho kaykashqanpita ishkan makinta joqarkur imayyaqpis kawaq Tayta Diospa jutincho jurashpan kayno nirqan: “Lapan tsaykuna cumplinanpaq kimsa wata pulanmi pishiykan. Tsay witsanmi Diosman yärakuqkuna munayniynaqna rikakärinqa”.
8 Tsayno nishqankunata manami shumaqlaqa tantiyarqätsu. Tsawraqa tapurqä kayno nir: “Tayta, tsaypita ¿imataq mas pasanqa?”
9 Tsawraqa kayno nimarqan: “Daniel, lapan tsaykuna sëllaraptinmi pipis mana musyanqatsu hasta tiempu chayamushqanyaq. Qamqa imaypis alita rurar kaway.
10 Atska runakunami tantiyakärinqa imano nakarpis Tayta Diosman yärakur jutsata mana ruraypa kawapäkunanpaq. Jutsa ruraqkunaqa jina jutsata rurar kawapäkutsun. Paykuna mana tantiyakäriptinpis Dios munashqanno kawaq runakunami itsanqa tantiyakärinqa.
11 “Waran waran sacrificiuta rupatsinanta mana kachapashqanpita hasta Dios mana munashqan kaqta templuman churashqanyaqmi juk waranqa ishkay pachak isqun chunka (1,290) junaq kanqa.*
12 Kushishqami kawapäkunqa juk waranqa kimsa pachak kimsa chunka pitsqa (1,335) junaqyaq mana ajayaypa shuyaraqkunaqa.
13 “Qamqa wanushqaykiyaq Tayta Dios munashqanno kaway. Ushanan junaqchömi kawarirkamur herenciaykita chaskinkipaq”.
Ichic wilacuycuna
^ ángel Kay patsata manaraq kamarmi angilkunata Tayta Dios kamarqan payta sirvinanpaq. Angilkunaqa manami imaypis wanuntsu. Tayta Diospa nawpancho karmi imaypis alabarkaykan (Isa. 6.1-3; Apoc. 5.11-12).
^ 12.1 Mat. 24.21; Mar. 13.19; Apoc. 12.7.
^ 12.2 Mat. 25.46; Juan 5.29.
^ 12.4 Apoc. 22.10.
^ 12.11 Mat. 24.15; Mar. 13.14.
