Daniel 4:1-37
4 (3.31) Rey Nabucodonosormi maytsay markakunaman, nacionkunaman y ima idiömata rimaq runakunaman cartata apatsirqan kayno nir:
Qamkunacho ali kaway kaykulätsun.
2 (3.32) Munayniyuq Tayta Diosmi mantsariypaq kaqkunata rurashpan shumaq tantiyatsimashqa. Tsayta musyanaykipaqmi kay cartata apaykätsimü.
3 (3.33) ¡Pay rurashqankunaqa mantsariypaqmi kaykan! ¡Milagru rurashqankunaqa kushikuypaqmi kaykan! ¡Paymi imayyaqpis mandaq kaykan! ¡Munayniyuq kashqanqa manami imaypis ushakanqatsu!
4 (1) Noqa Nabucodonosormi yarpashqäno lapanpis ali kaptin palaciücho kushishqa ali kawarqä.
5 (2) Juk tsakay punuykarmi mana alita sueñuykur pasaypa mantsakarqä.
6 (3) Tsaymi Babiloniacho taq lapan yachaq runakunata qayatsirqä sueñushqä imapaq kashqantapis tantiyatsipäkamänanpaq.
7 (4) Musyakuqkuna, brüjukuna, qoylarta estudiaqkuna y rikakuqkuna chaykamuptinmi wilarqä sueñushqäta. Wilaptïpis manami mayqanpis tantiyatsimayta kamäpakurqantsu.
8 (5) Tsaypitanami Daniel chayamurqan. Paypa jukaq jutinmi kaykan Beltsasar. Tsayno jutinta churapashqä adorashqä diospa jutin kashqanno kananpaqmi. Payta lapan dioskuna yanapaptinmi imata sueñushqätapis wilapar kayno nirqä:
9 (6) “Beltsasar, yachaq runakunapa mandaqnin kaptikimi musyä lapan dioskuna yanapashushqaykita. Tsaymi qampaqqa mana imapis sasatsu kaykan imata sueñushqätapis y sueñushqä imapaq kashqantapis wilamänaykipaq.
10 (7) “Cämächo punuykarmi sueñuynïcho rikashqä kay patsa chawpincho jatunkaray yöra ichiraykaqta.
11 (8) Tsay yöra winaylanta rakuyar copösuyaptinmi rämankunapis jana patsayaq chayashqa. Tsaymi maytsaymanpis rikakarqan.
12 (9) Tsay yörapaqa raprankunapis kuyaylapaqmi kashqa. Lapan runakuna mikunanpaq wayuyninpis atskami kashqa. Lapan jirka uywakunapis yörapa sikinchömi lantukärishqa. Tsaynöpis rämankunachömi pishqukuna qeshwanta rurapäkushqa. Tsay yörapa wayuynintami lapan uywakunapis mikupäkushqa.
13 (10) “Cämächo punuykarmi sueñuynïcho rikashqä jana patsapita juk *ángel uraykämuqta.
14 (11) Tsay angilmi qayakamurqan kayno nir: ‘Tsay yörata muturishpayki lapan rämankunata lawmapäkuy. Nirkur raprankunatapis lapanta sipichapäkuy. Wayuyninkunatapis tapsipäkuy. Yöra sikincho lantukuykaq uywakunatapis lapanta qarqapäkuy. Pishqukunapis qeshwanta kachariykur aywakäritsun.
15 (12) Troncuntaqa sapintinta jinalancho fiërru y bronci cadinakunawan wataykuy. Qewakunapa chawpilancho uywakunawan iwal kawatsun. Shulyapis jinalancho ushmatsun.
16 (13) Yarpaynin ali kaykashqanpita uywapa yarpayninno rikakutsun. Tsayno katsun qanchis watayaq’.
17 (14) “Tsayno kananpaq kaqtami angilkuna wilakushqa. Tsayno pasaptinmi pïmaypis musyanqa lapan mandaqkunapitapis Tayta Dios mas munayniyuq kashqanta. Paymi nacionta mandananpaq pitapis munashqan kaqta churan. Munarqa mas humildi kaqtapis mandaq kananpaq churan.
18 (15) “Tsaytami noqa Nabucodonosor sueñuynïcho rikashqä. Beltsasar, kanan wilamay imapaq tsay suëñu kashqantapis. Kay mandashqä nacioncho manami mayqan musyakuqkunapis tantiyatsimayta kamäpakuntsu. Musyämi lapan dioskuna yanapashuptiki qam tantiyatsimänaykipaq kashqanta”.
Rey Nabucodonosor imapaq sueñushqantapis Daniel wilashqan
19 (16) Tsayno wilapashqä mantsariypaq kaptinmi Beltsasar jutiyuq Daniel juk hörano pasaypa mantsakashqa rikakurqan. Tsaymi kayno nirqä: “Beltsasar, ama mantsakaytsu tsay sueñushqäpita”.
Tsayno niptïmi Daniel kayno nimarqan: “Tsay sueñuynikicho rikashqaykiqa contraykikunata pasananpaq kaykulätsun, tayta.
20 (17-19) Sueñuynikicho rikashqayki yöraqa kikikimi kaykanki. Tsay yöra winaylanta rakuyashqannömi qampis munayniyuq rikakushqanki. Copösuyashpan rämankuna jana patsayaq chayashqannömi qampis munayniyuq rikakur jana patsacho kaykaq angilno kaykanki. Yörapa raprankuna kuyaylapaq kashqanno y wayuynin lapan runakuna mikunanpaq atska kashqannömi qampis atska runakunata yanapaykanki. Jirka uywakuna yörapa sikincho lantukushqanno y rämankunacho pishqukunapis qeshwanta rurashqannömi lapan runakunapis munaynikicho kaykan. Tsay yöra kay patsacho maytsaymanpis rikakashqannömi lapan nacionkunapis makikicho kaykan.
21 –
22 -
23 (20) “Tsaynöpis sueñuynikicho rikashqanki jana patsapita wilakuq *ángel uraykämuqta. Paymi kayno nirqan: ‘Tsay yörata muturir lapanta ushakätsiy. Troncuntaqa sapintinta jinalancho kachaykuy. Nirkur fiërru y bronci cadinakunawan watarkur jirkacho qewakunapa chawpilancho kachaykuy. Shulyapis jinalancho ushmatsun. Uywakunawan iwal kawatsun qanchis wata pasashqanyaq’.
24 (21) “Tayta rey, munayniyuq Tayta Dios sueñuynikicho rikatsishushqaykiqa qamta pasashunaykipaqmi kaykan. Kanan wilashayki tsay sueñushqayki imapaq kashqantapis.
25 (22) Runakuna tashqanpita qarqushuptikimi uywakunawan juntu kawankipaq. Törunömi qewata mikunkipaq y shulyami ushmashunkipaq. Qanchis watami tsayno kankipaq Tayta Dios lapanpaq munayniyuq kashqanta tantiyakunaykiyaq. Paymi pitapis munashqan kaqta mandaq kananpaq churan.
26 (23) “Sapintin troncu jinalancho quëdashqanqa mandaq kayman kutinaykipaq kashqanmi kaykan. Tsayno kutinki Tayta Dios lapanpaq munayniyuq kashqanta tantiyakushqayki hörami.
27 (24) “Tsayno mana pasashunaykipaq kanan yätsishayki, tayta rey. Jutsa ruraykunata kacharir runa mayikita kuyapay. Fiyu kayta kacharir waktsakunata yanapay. Tsayno rurashpaykiqa capazchari alipis kawaykunkiman”.
28 (25) Daniel wilamashqannölami lapanpis pasamarqan.
29 (26) Tsay sueñushqäpita juk wata pasarkuptinnami Babiloniacho kaykaq palaciücho puriykar
30 (27) kayno nirqä: “¡Noqami munayniyuq kar kay jatunkaray Babilonia markata sharkatsishqä mandashqä nacionkunapa capitalnin kananpaq! Tsaynöpami maytsay nacioncho munayniyuq kashqäta musyapäkunqa”.
31 (28) Parlaytapis manaraq ushaptïmi jana patsapita kayno nimushqan mayakämurqan: “Rey Nabucodonosor, nishqäta shumaq mayamay. Kananpitaqa mananami reynatsu kankipaq.
32 (29) Runakuna tashqanpita qarqushuptikimi uywakunawan juntu kawankipaq. Törunömi qewata mikunkipaq. Qanchis watami tsayno kankipaq Tayta Dios lapanpaq munayniyuq kashqanta tantiyakunaykiyaq. Paymi pitapis munashqanta mandaq kananpaq churan”.
33 (30) Jinan hörami nimushqanno yarpaynï upatakarqan. Tsaymi runakuna tashqanpita qarqamaptin törukunano qewa mikuyta qalaykurqä. Cuerpütanami shulya ushmamarqan. Aqtsäpis ankapa plümanno y shillüpis ankapa shillunnömi winarqan.
34 (31) Qanchis wata pasarkuptinmi noqa Nabucodonosor ciëlupa nukirkur Tayta Diosta perdonta manakurqä. Tsaymi yapay juiciüman kutirkur imayyaqpis kawaq munayniyuq Tayta Diosta alabarqä y agradëcikurqä.Mandaq kayninqa mana ushakaqmi kaykan.Mandaq kaynintaqa manami pipis qechunqatsu.
35 (32) Paypaqqa mayqan nacionpis manakaqlami kaykan.Tayta Diosqa jana patsachöpis y kay patsachöpis munashqantami imatapis ruran.Paytaqa manami pipis tsapata churapantsu.Paytaqa manami pipis “¿imanirtaq tsayno ruraykanki?” nintsu.
36 (33) Tsay hörami nawpata kashqämanno juiciüman kutirqä. Mandaq kayman yapay kutir nawpata munayniyuq kashqänömi yapay munayniyuq karqä. Tsaynami nawpata mandäshimaqkunapis yanapamänanpaq yapay kutipäkamurqan. Trönüman kutiykurmi punta kashqäpita mas munayniyuq rikakurqä.
37 (34) Tsaymi noqa Nabucodonosor jana patsacho kaykaq Tayta Diosta alabä. Pay rurashqankunaqa lapanpis alimi kaykan. Yachaq tukuqkunataqa penqaymanmi churan.
Ichic wilacuycuna
^ ángel Kay patsata manaraq kamarmi angilkunata Tayta Dios kamarqan payta sirvinanpaq. Angilkunaqa manami imaypis wanuntsu. Tayta Diospa nawpancho karmi imaypis alabarkaykan (Isa. 6.1-3; Apoc. 5.11-12).
^ ángel Kay patsata manaraq kamarmi angilkunata Tayta Dios kamarqan payta sirvinanpaq. Angilkunaqa manami imaypis wanuntsu. Tayta Diospa nawpancho karmi imaypis alabarkaykan (Isa. 6.1-3; Apoc. 5.11-12).
