Daniel 6:1-28
6 (2) Nacionnin ali kananta munarmi rey Darío churarqan juk pachak ishkay chunka (120) mandäshiqninkunata.
2 (3) Tsay mandäshiqninkuna imata ruraykashqantapis rikananpaqnami kimsa ministrukunata churarqan. Tsay kimsanpita juk ministru karqan Daniel. Tsay ministrukunami mandäshiqnin runakunata imatapis rey nishqanta ruratsipäkuq.
3 (4) Danielqa wakin ministrukunapitapis mas tantiyakuq kaptinmi reyqa yarparqan lapan nacionta mandäshinanpaq.
4 (5) Tsayta musyaykurmi wakin ministrukuna y mandäshiqkunaqa Danielpa contran sharkurqan. Tsaymi ima achäquilatapis ashipäkurqan imatapis jitapänanpaq. Tsayno kaptinpis Danielqa cäsukuq karmi imatapis lutantaqa mana rurarqantsu ni qelanarqantsu. Tsaymi imatapis jitapayta mana kamäpakurqantsu.
5 (6) Tsayta tantiyarmi kayno nipäkurqan: “Manami imatapis paytaqa jitapayta kamäpakushuntsu. Itsanqa Diosninta adorashqalanwanmi ishkitsishun”.
6 (7) Tsayno nirmi ministrukuna y mandäshiqkuna comisionta churarqan reywan parlaq aywananpaq. Chayaykurmi kayno nipäkurqan: “Tayta rey Darío, ¡qamla imayyaqpis rey kaykulay!
7 (8) Lapan autoridäkunami juntakaykur wilanakärishqä juk leyta ruratsinaykipaq. Pipis qamta adorashunaykipa trukan juk diosta o juk runata adoraptinqa leonkuna wichqarashqanman qaykushqa katsun. Tsay ley katsun kananpita kimsa chunka (30) junaqyaq.
8 (9) Tsay leyta qelqarkur wilakatsiy lapanpis cäsukärinanpaq. Mandashqayki Media y Persia nacionkunapa leynincho niykashqanno tsay rurashqayki leyta manami pipis anulanqatsu ni trukatsinqatsu”.
9 (10) Tsayno nipäkuptinmi leyta qelqarkatsir rey Darío firmarqan.
10 (11) Tsay ley qelqaraykashqanta musyaykurmi Danielqa punushqan cuartunman witsarkur Jerusalén lädupa kaq ventänata kicharqan. Nirkurnami waran waran kimsa kuti imaypis manakushqanno qonqurpakuykur Tayta Diosta manakur alabarqan.
11 (12) Tsay acusaq runakuna chayaykurmi Danielta taripäkurqan Tayta Diosta manakuykaqta.
12 (13) Tsayno tariykurmi reyman aywashpan kayno nipäkurqan: “Tayta rey, musyashqaykinöpis qamta adorashunaykipa trukan ima diostapis o pï runatapis pipis adoraptinqa leonkuna wichqarashqanman qaykushqa kananpaqmi nishqanki. Kimsa chunka (30) junaq tsayno kananpaqmi leyta maytsaymanpis apatsishqanki”.
Tsaymi rey kayno nirqan: “Aw, tsayno cumplinanpaqmi ordenashqä. Mediapa y Persiapa leyninkunacho niykashqanno tsay ruratsishqä leyta manami pipis anulanqatsu ni trukatsinqatsu”.
13 (14) Niptinmi kayno nipäkurqan: “Judá nacionpita prësu apapäkamushqan Danielqa manami cäsukushunkitsu ni firmashqayki leytapis respitantsu. Payqa tsaynölami waran waran kimsa kuti Diosninta manakuykan”.
14 (15) Tsawraqa rey pasaypa mantsakar imaykanöpapis Danielta salvayta munar qoyayta yarpachakurqan.
15 (16) Tsaymi yapay kutiykur tsay runakuna reyta kayno nipäkurqan: “Musyashqaykinöpis Mediapa y Persiapa leynincho niykashqanno tsay ruratsishqayki leyta manami pipis anulanqatsu ni trukatsinqatsu”.
16 (17) Tsaymi leonkuna kashqanman jitarpunanpaq rey ordenarqan. Nirkurnami Danielta rey kayno nirqan: “¡Yärakushqayki Diosniki qamta salvaykuläshunki!”
17 (18) Jitarpurmi jatun rumiwan punkuta tsaparkurqan. León kaykashqanman Danielta jitatsinanpaq cumplishqanta musyapäkunanpaqmi rey y autoridäkuna sëllapäkurqan.
18 (19) Nirkur palaciunman rey aywakurmi mikuytapis mana munarqantsu ni tukapaptinpis mayayta mana munarqantsu. Tsaynöpis waraytami punuyta mana tarirqantsu.
19 (20) Patsa waraykaptinnami leonkuna wichqaraykashqan kaqman rey warakayla aywarqan.
20 (21) Chayaykurnami pasaypa lakishqa qayakurqan kayno nir: “Imayyaqpis kawaq Diosta sirviq Daniel, imaypis sirvishqayki Dios ¿leonkunapita salvaykushushqankiku?”
21 (22) Qayakuptinmi Daniel kayno nimurqan: “¡Qamla imayyaqpis rey kaykulay!
22 (23) Jutsaynaq kashqäta musyarmi *angilninta Tayta Diosnï kachamushqa leonkunapa shiminta tsapaptin mana mikamänanpaq. Tayta rey, qampa contrayki manami imatapis lutanta rurashqätsu”.
23 (24) Tsawraqa pasaypa kushikushpanmi Danielta jukla jorqatsimurqan leonkuna wichqaraykashqanpita. Jorqarkatsimur rikananpaqqa manami leonkuna ni aspiylapis aspishqatsu kashqa. Tsayno sänu karqan Tayta Diosman yärakushqanpitami.
24 (25) Tsaypitanami Danielpa contran sharkuq runakunata, warminkunata y tsurinkunata leonkuna wichqarashqan kaqman jitarpunanpaq prësu apatsimurqan. Manaraqpis pampaman chayaptinmi leonkunaqa tsaripäkur tulunkunatapis chipyaq qapchuchuyla ushapäkurqan.
25 (26) Tsaypitanami rey Darío juk leyta qelqarkur apatsirqan may markacho y may nacioncho taqkunaman y ima idiömata rimaqkunamanpis. Tsay leychömi kayno nirqan:“Qamkunacho ali kaway kaykulätsun.
26 (27) Noqami kanan ordenä mandashqä lapan nacionkunacho Daniel adorashqan Diosta *mantsakuypa adorapäkunaykipaq.Paymi imayyaqpis kawaq Tayta Dios kaykan.Mandaq kashqanqa manami imaypis ushakanqatsu.Tsaynölami munayniyuq kashqanqa imayyaqpis kaykanqa.
27 (28) Paymi rikamantsi y ima mana alipitapis tsapämantsi.Paymi jana patsacho mantsariypaq kaqkunata rikakätsimun.Kay patsachöpis milagrukunatami ruran.Paymi leonkunapitapis Danielta tsapashqa”.
28 (29) Tsaymi Persia nacionpa mandaqnin rey Darío mandashqan witsan y rey Ciro mandashqan witsan Danielqa respitashqa karqan.
Ichic wilacuycuna
^ ángel Kay patsata manaraq kamarmi angilkunata Tayta Dios kamarqan payta sirvinanpaq. Angilkunaqa manami imaypis wanuntsu. Tayta Diospa nawpancho karmi imaypis alabarkaykan (Isa. 6.1-3; Apoc. 5.11-12).
^ mantsakuy, Diosta mantsakuy Tayta Diosta mantsakurqa tantiyantsi kuyakuq y perdonakuq karpis jutsa rurayta mana kachariqkunata castigashqantami (Éxo. 34.6; Heb. 10.31). Tayta Dios munayniyuq kashqanta rikar Israel runakunapis payta mantsakurqanmi (Éxo. 14.31; Jos. 4.24; 1Sam. 12.18). Tsaymi Tayta Diosta mantsakur payta adorar cäsukuntsi (Deut. 5.29; 10.12-13; Jos. 24.14) y runa mayintsiwan ali kawantsi (Lev. 25.17, 36, 43). Tayta Diosqa payta mantsakuqkunapa amïgunmi kaykan (Sal. 25.14).
