Daniel 8:1-27
8 Belsasar kimsa wata rey kaykaptinmi noqa Daniel yapay revelacionta rikarqä.
2 Tsay revelacionchömi kaykarqä Elam provinciacho kaykaq Susa markacho y Ulai mayu kuchuncho.
3 Rikchakushqächömi rikarqä ishkay largu waqrayuq carni mayu kuchuncho kaykaqta. Jukaq waqran qepataraq winamushqa kaykarpis mas largumi karqan.
4 Tsaychömi rikarqä inti jeqanan kaq lädupa, norti kaq lädupa y sur kaq lädupa tsay carni atacaykaqta. Manami ima uywapis ichipayta kamäpakurqantsu. Tsaynöpis manami munayninpita pipis salvakurqantsu. Tsay carni munashqanta rurarmi lapanpitapis mas munayniyuq rikakurqan.
5 Tsaykunapaq yarpachakuykaptïmi inti jeqanan kaq lädupita juk yayan chïvu urkuncho jatunkaray waqrayuq yurirkamurqan. Tsay chïvumi patsata mana jaruylapa maytsaypapis aywarqan.
6 Mayu kuchuncho rikashqä ishkay waqrayuq carniman chayaykur lapan kalpanwan rabyashqa takarqan.
7 Rikaykaptïmi takaptin carnipa ishkan waqran pakirqan. Chïvu saqtarir pasaypa jarur ushaptin carni ima ruraytapis mana kamäpakurqantsu. Tsayno atacaptin manami pipis carnita washayta kamäpakurqantsu.
8 Tsaymi chïvuqa waranlan waranlan mas kalpayuq rikakurqan. Pasaypa munayniyuq kaykaptinmi jatunkaray waqran pakikäkurqan. Tsay pakiq waqrapa trukanmi chusku jatusaq waqrankuna winamurqan. Tsay waqrankunami chuskun lädupa toqriraykarqan.
9 Jukaq waqrapitami taksha waqra winar mas jatunkaray rikakurqan. Tsay waqrami winarqan sur kaq lädupa, inti jeqamunan kaq lädupa y kuyaylapaq nacionnintsi kaq lädupa.*
10 Tsaynöpis winarqan jana patsacho kaykaq *angilkuna kashqanyaqmi. Tsaymi wakin angilkunata y qoylarkunata qarparkamur jarur usharqan.*
11 Angilpa mandaqninpita mas munayniyuq kashqanta yarparmi sacrificiuta templucho waran waran rupatsipäkunanta mana kachaparqantsu y templutapis *impüruyätsirqan.*
12 Tsayno kaptinmi waran waran rupatsinanpaq kaq sacrificiuta mana rupatsipäkurqannatsu y Diosman yärakuqkuna tsaycho mana adorapäkurqannatsu. Tsay waqraqa Tayta Dios nishqantapis lapantami manakaqman churarqan. Waqra munashqannömi lapanpis karqan.
13 Tsaypitami mayarqä ángel mayinta juk ángel kayno tapuykaqta: “¡Imayyaqraq waran waran rupatsinanpaq kaq sacrificiuta mana rupatsipäkunqatsu! ¡Imayyaqraq Tayta Diosta mana cäsukur templuta manakaqman churapäkunqa! ¡Imayyaqraq Tayta Diosman yärakuqkunata nakatsipäkunqa!”
14 Tapuptinmi jukaq ángel kayno nirqan: “Tsayno kanqa ishkay waranqa kimsa pachak (2,300) tardiyaq y tutayaqmi. Tsaypitaraqmi templu purificashqa kanqapaq”.
Revelacioncho Daniel rikashqan imapaq kashqanpis
15 Noqa Daniel revelacionta rikashqäpita yarpachakuykaptïmi elaqpita nawpächo runa niraq yurirkamurqan.
16 Tsaypitami mayarqä Ulai mayupita tsay runa niraq kayno nimuqta: “*Ángel Gabriel, tantiyatsiy rikashqankuna imapaq kashqantapis”.*
17 Ángel Gabriel nawpäman shamuptinmi pasaypa mantsakur lätakaypa patsaman tunirqä. Tsawraqa kayno nimarqan: “Runapa tsurin, shumaq tantiyakuy. Lapan rikashqaykikunaqa pasanqa ushakänanpaq kaq tiempu chayamuptinraqmi”.
18 Tsayno parlapaykämaptinmi lätaraykashqalächo wanushqano rikakurqä. Sharkarkatsimarmi
19 kayno nimarqan: “Kananmi tantiyatsishayki Tayta Dios rabyakushpan castiganan tiempu ima pasananpaq kashqantapis. Tsayqa ushanan tiempuchömi kanqa.
20 “Ishkay waqrayuq carnita rikashqaykiqa Mediapa y Persiapa mandaqnin reykunami kaykan.
21 Rikashqayki chïvuqa Grecia nacionpa mandaqnin reymi kaykan. Chïvupa urkuncho jatunkaray waqrata rikashqaykiqa Grecia nacionpa punta kaq mandaqnin reymi kaykan.
22 Tsay waqra pakiptin chusku waqrakuna winamushqanta rikashqaykiqa tsay nación chusku nacionman rakikänanpaqmi kaykan. Itsanqa rakikashqa nacionkunapa munaynin manami puntata kashqannötsu kanqa.
23 “Tsay chusku nacionkuna munayniynaq rikakuptin y runakuna jutsasapa kaptinnami mana kuyapäkuq astütu runa rey kananpaq yaykunqa.*
24 Tsay reyqa pasaypa munayniyuqmi rikakunqa. Itsanqa manami kikinpa munayninwantsu tsayno kanqa, sinöqa jukpa munayninwanmi. Munashqanta rurarmi imaykatapis pasaypa ushakätsinqa. Tsaynölami munayniyuqkunata y Tayta Diosman yärakuq *santu runakunatapis ushakätsinqa.
25 “Pasaypa astütu kashpanmi pitapis engañanqa. Orgullösu kashpanmi atska runakunatapis elaqpita wanutsinqa. Tsaynöpis mandaqkunapa mandaqnin Tayta Diospa contranmi sharkunqa. Tsayno kaykashqanchömi castïguwan wanunqapaq. Tsay castïguqa manami runapitatsu kanqa.
26 “Tutapa y tardipa sacrificiuta mana rupatsipäkunanpaq kashqanta revelashushqaykiqa rasunpami pasanqa. Itsanqa ama pitapis tsayta wilaytsu. Atska wata pasarkuptinraqmi tsaykunaqa cumplikanqa”.
27 Tsayno nimaptinmi noqa Daniel pasaypa mantsakaywan kalpaynaq rikakur atska junaq qeshyarqä. Tsaypita aliyarkurnami rey nimashqankunata yapay rurarqä. Itsanqa tsay rikashqäkuna imapaq kashqantapis mana tantiyarmi fiyupa lakikurqä.
Ichic wilacuycuna
^ 8.9 Tsay waqraqa Antíoco IV Epífanes jutiyuq reymi karqan. Payqa mandayta qalaykurqan revelacionta Daniel rikashqanpita kimsa pachak qanchis chunka (370) watatanöraqmi.
^ ángel Kay patsata manaraq kamarmi angilkunata Tayta Dios kamarqan payta sirvinanpaq. Angilkunaqa manami imaypis wanuntsu. Tayta Diospa nawpancho karmi imaypis alabarkaykan (Isa. 6.1-3; Apoc. 5.11-12).
^ 8.10 Apoc. 12.4.
^ püru, impüru Püru ninanqa ima qanrapis mana kashqan ninanmi. Tsaymi Tayta Dios munashqanno jutsaynaq kawaq runapis püru kashqanta Bibliacho nin (1Juan 3.3).
^ 8.11 Templuta impüruyätsin Tayta Dios prohibishqanta tsaycho rurarmi. Tsaypita masta musyanaykipaq liyinki Lev. 20.3; 21.12; Núm. 19.13, 20. Antíoco IV Epífanes jutiyuq rey templuta impüruyätsir imata rurashqanta musyanaykipaq liyinki 1 Macabeos 1.20-24, 44-50.
^ ángel Kay patsata manaraq kamarmi angilkunata Tayta Dios kamarqan payta sirvinanpaq. Angilkunaqa manami imaypis wanuntsu. Tayta Diospa nawpancho karmi imaypis alabarkaykan (Isa. 6.1-3; Apoc. 5.11-12).
^ 8.16 Luc. 1.19, 26.
^ 8.23 Tsay astütu runaqa Antíoco IV Epífanes jutiyuq reymi karqan.
^ santu; sagrädu Tayta Dios santu kashqanta nirqa jutsaynaq kashqanta y pipis ni imapis payman mana tinkushqantami niykan (Isa. 5.16; 6.3; Apoc. 4.8; 15.4).
