Deuteronomio 15:1-23
15 “Pipis jaqayki kaptin cada qanchis watacho perdonar amana cobrapäkunkitsu.*
2 Tsay wata chayamuptin mayqaykipis Israel mayikita prestashqaykita perdonar amana cobrapäkunkitsu. Tsay wataqa kanqa TAYTA DIOSTA cäsukur jaqakunata perdonanayki watami.
3 Israel runa mayikita perdonarpis mana Israel runatami itsanqa jaqaykita cobrapäkunki.
4 “Tsayno ruraptikimi qoykushunaykipaq kaykaq nacioncho TAYTA DIOS bendicionninta churamunqapaq. Tsaymi qamkunacho waktsakuna mana kanqapaqtsu.
5 Bendicionninta TAYTA DIOS tsayno churamunqapaq kanan tantiyatsishqä mandamientukunata cumplipäkuptikimi.
6 Promitishqanno bendicionninta qoshuptikimi wakin nación runakunata prestanaykipaqpis kanqapaq. Qamkunaqa manami pitapis prestashunaykipaq manakunkipaqtsu. Atska nacionkunatami munaynikicho tsararankipaq. Qamkunataqa manami pipis munaynincho tsararäshunkipaqtsu.
7 “TAYTA DIOS qoykushunaykipaq kaykaq nacionchöna taykashpayki marka mayiki waktsa kaptinqa yanapanki. Mana kuyapäkuqqa ama kapäkunkitsu.
8 Tsaypa trukanqa imatapis manakushuptiki manaykunki.*
9 Jaqakunata perdonanan wata chayamunanpaq kashqantana tantiyar ama yarpapäkunkitsu manana prestanaykipaq kashqanta, sinöqa manakushuptiki prestapäkunki. Mana prestaptikiqa nisidächo kaykaq runa TAYTA DIOSMAN quejakuptin jutsayuqmi kankipaq.
10 Tsayno kaptinqa lapan voluntänikiwan waktsakunata yanapanki. Tsayraqmi TAYTA DIOS bendicionninta churamunqa lapan arushqaykikunaman.
11 Kay patsachöqa waktsakuna imaypis kanqami.* Tsaymi noqa nï marka mayikikuna pishipakuptin yanapanaykipaq.
Ashmayninkunata libri kacharinanpaq nishqan
Éxodo 21.1-11
12 “Hebreo mayiki olqu o warmi karpis ashmayniki kananpaq qampita qellayta jorquptinqa* soqta watayaqlami arupäshunkipaq. Qanchis kaq watachöqa librinami yarqukunqa.
13 Yarqukurqa manami jinaylaqa aywakunqatsu.
14 Tsaypa trukanqa TAYTA DIOS bendicionninta qoshushqaykipita uywakunata janchaparkunki y mikuyta y vïnutapis qepiparkunki.
15 Ama qonqapäkunkitsu qamkunapis Egiptucho ashmay kashqaykipita TAYTA DIOS jorqapäkamushushqaykita. Tsaymi qamkunata nï ashmaynikikunata librina kacharinaykipaq.
16 “Itsanqa ashmayniki qamkunawan y ayluykikunawan yachakashqa kar aywakuyta mana munaptinqa
17 punkupa quiciunman apaykur rinrinta alisnawan uchkupanki. Tsaynöpami wanushqanyaq ashmayniki kanqa. Tsaynöla rurapäkunki ashmayniki warmi kaptinpis.
18 “Ashmayniki librina aywakuptin ama rabyanankitsu. Tantiyakäriy arupakuqta päganaykipaq kashqanpita mënusta pägashqaykita. Soqta watami barätulapaq arupäshushqanki. Ashmaynikikunata tsayno kachariptikiqa TAYTA DIOS bendicionninta churamunqapaq lapan arushqaykikunamanmi.
Uywankunapa punta yuriq orqu wawankuna Tayta Diospaq nishqan
19 “Wäkaykipa, uyshaykipa y cabraykipa punta yuriq orqu wawantaqa TAYTA DIOSPAQ rakipäkunki.* Wäkaykipa punta kaq orqu wawanta ama arutsinkitsu. Uyshaykipa punta kaq orqu wawanpa milwantapis ama rutupäkunkitsu.
20 Tsay punta yuriqkunataqa TAYTA DIOS akrashqan sitiuman apaykur cada wata lapan ayluykikunawan sacrificiuta rupatsir paypa nawpancho mikupäkunki.
21 Weqruta, qaprata o imanpis däñashqa uywataqa TAYTA DIOSPAQ sacrificiuta ama rurapäkunkitsu.
22 Tsaypa trukanqa markalaykicho mikupäkunki.
“Püru karpis *impüru karpis tarushta y luychuta tsarir mikupäkushqaykinöla mikupäkunki.
23 Yawarnintami itsanqa mikunaykipa trukanqa pampaman jicharinki.*
Ichic wilacuycuna
^ 15.1-6 Lev. 25.1-7.
^ 15.7-8 Lev. 25.35.
^ 15.11 Mat. 26.11; Mar. 14.7; Juan 12.8.
^ 15.12-18 Lev. 25.39-46.
^ 15.19 Éxo. 13.12.
^ püru, impüru Püru ninanqa ima qanrapis mana kashqan ninanmi. Tsaymi Tayta Dios munashqanno jutsaynaq kawaq runapis püru kashqanta Bibliacho nin (1Juan 3.3).
^ 15.23 Gén. 9.4; Lev. 7.26-27; 17.10-14; 19.26; Deut. 12.16, 23.
