Deuteronomio 16:1-22
16 “*Abib killacho TAYTA DIOSTA adorar *Pascua fiestata rurapäkunki.* Tsay killachömi TAYTA DIOS Egiptupita tsakaypa jorqamushurqayki.
2 Pascua fiestata rurar maychöpis adoranaykipaq akrashqan sitiucho TAYTA DIOSPAQ sacrificiuta rupatsirqa wäkata karpis, uyshata karpis o cabrata karpis pishtapäkunki.
3 Sacrificiupaq pishtashqayki uywapa aytsanta mikupäkunki levadüraynaq tantantawan. Levadüraynaq tantata qanchis junaqyaq mikupäkunki Egiptucho nakashqaykipita apurädu yarqamur mikushqaykinömi. Tsaynöpami imaypis mana qonqaypa yarparankipaq Egiptupita yarqupäkamushqaykita.
4 Qamkuna tashqayki intëru nacioncho tsay qanchis junaqkuna wayikicho ama kanqatsu ima levadürapis. Fiesta qalaykunan tardi sacrificiupaq pishtashqayki uywapa aytsantapis waraynin* junaqpaqqa ama putsütsinkitsu.
5 “TAYTA DIOS qoykushunaykipaq kaykaq nacionman chayar lutalaqa maychöpis tsay Pascua fiestapaq sacrificiu mikuyta ama rurapäkunkitsu.
6 Tsaypa trukanqa TAYTA DIOSTA adorapäkunaykipaq akrashqan sitiulacho rurapäkunki. Inti jeqaykashqan höra uywata pishtar Pascua sacrificiuta rupatsipäkunki. Tsay hörami Egiptupita yarqupäkamurqayki.
7 Sacrificiupaq pishtashqayki aytsataqa TAYTA DIOS akrashqan sitiulacho kankarkur mikupäkunki. Waraynin tuta itsanqa wayikipa kutikärinki.
8 “Tsaypita soqta junaqyaq levadüraynaq tantata mikupäkunki. Qanchis kaq junaqchöqa TAYTA DIOSTA adorar lapayki juntakanki. Tsay junaqqa ama arupäkunkitsu.
Semäna fiestata rurapäkunanpaq nishqan
9 “Tsaki mikuy cosëchata qalaykushqaykipita qanchis semänata
10 Semäna fiestata* TAYTA DIOSTA adorar rurapäkunki. Bendicionninta churamushqan tupumi TAYTA DIOS akrashqan sitiuman voluntänikipita kaq ofrendata apapäkunki.
11 Tsaycho tsurikikunawan, ashmaynikikunawan, markaykicho taykaq *levitakunawan, jäpa runakunawan, waktsakunawan y viüdakunawan shuntakashpayki TAYTA DIOSPA nawpancho fiestata rurar kushikärinki.
12 Egiptucho ashmay kashqaykita yarpar kay tantiyatsishqäkunata lapanta chaskikäriy.
Ramäda fiestata rurapäkunanpaq nishqan
13 “Trïgu ërayta y üva palayta usharkur qanchis junaq *Ramäda fiestata rurapäkunki.*
14 Fiestata rurar kushikärinki tsurikikunawan, ashmaynikikunawan, *levitakunawan, jäpa runakunawan, waktsakunawan y markaykicho taq viüdakunawanpis.
15 Tsay fiestataqa akrashqan sitiulacho qanchis junaqyaq TAYTA DIOSTA adorar rurapäkunki. Lapanchöpis TAYTA DIOS bendicionta churaykämuptinqa lapan shonquykiwan kushikärinki.
16 “Tsay kimsa fiestakunapaqmi cada watacho kimsa kuti lapan olqu kaqkuna TAYTA DIOS akrashqan sitiuman aywaykur paypa nawpancho juntakanqa. Tsay fiestakuna kanqa Levadüraynaq Tantata Mikupäkunan fiesta*, Semäna fiesta y Ramäda fiesta. Tsay fiestakunaman pipis jinaylaqa ama aywanqatsu.
17 Tsaypa trukanqa TAYTA DIOS bendicionninta churamushqan tupu ofrendata apapäkunqa.
Shumaq arreglananpaq juezkunata nishqan
18 “TAYTA DIOS qoykushunaykipaq kaykaq markakunacho tashpayki cada trïbupa juezninkunata y mandaqninkunata churapäkunki runakuna quejanakuptin shumaq tantiyaykur arreglapäkunanpaq.
19 Juez karqa pitapis mana jananpaylapa lapanta shumaq arreglapäkunki. Rïcutapis waktsatapis sobornuta mana chaskipaylapa arreglapäkunki. Sobornuta chaskipakuq juezqa manami shumaq arreglantsu, sinöqa chaskipashqan runapa favornin sharkurmi runakuna ali yätsishqantapis mana chaskintsu.*
20 Tsawraqa imaypis shumaq tantiyaykur pitapis arreglapäkunki. Tsaynöpami TAYTA DIOS qoykushunaykipaq kaykaq nacioncho ali kawapäkunkipaq.
21 “*Asera diösata adorananpaq raku qerukunatapis TAYTA DIOSPA *altarninpa nawpanman ama jawipäkunkitsu.*
22 Adorapäkunaykipaq wanka rumitapis ama ichitsipäkunkitsu. Tsaykunata ichitsipäkuptikiqa TAYTA DIOS fiyupami rabyakun.*
Ichic wilacuycuna
^ Pascua fiesta Pascua fiestata Israel runakuna rurapäkun Tayta Dios Egiptupita jorqamushqanta yarpapäkurmi. Moisés qelqashqan leykunacho nishqannölami lapan olqu kaqkuna chunka ishkay watayuqpita janaman tsay fiestaman aywapäkuq. Warmikunapis tsay fiestaman aywapäkuqmi (Éxo. 12.1-28; Deut. 16.1-8; Mar. 14.12; 1Cor. 5.7).
^ 16.1-8 Éxo. 12.1-20; Lev. 23.5-8; Núm. 28.16-25.
^ Abib killa Abib killa imay qalaykushqanta runakuna musyananpaq shuyararqan trïgu shikshiyta qalaykuptin killa ushashqanyaq. Tsay junaqnami karqan Abib killa qalaykunan.
^ 16.4 Wakin runakunaqa warantin nipäkun.
^ 16.9-12 Lev. 23.15-21; Núm. 28.26-31.
^ levita Levita runakunaqa karqan Jacobpa tsurin Levípita miraq runakunami. Paykunami templucho cürakunata yanaparqan (Núm. 1.47-54; 3.5-39). Templu manaraq kaptinmi Dioswan Tinkuna Tolducho yanaparqan (1Crón. 24–26). Levitakunatami rey Josafat kacharqan markan markan Diospa leyninkunata yachatsipäkunanpaq (2Crón. 17.7-9).
^ 16.13-15 Lev. 23.33-36, 39-43; Núm. 29.12-38.
^ Ramäda fiesta Trïgu cosëchata y üva cosëchata usharkurmi Ramäda fiestata qanchis junaq rurapäkurqan (Lev. 23.34-36; Deut. 16.13). Tsay karqan octubri killa qalaykunanchömi. Tsay fiestata rurananpaqmi lapan olqu kaqkuna Jerusalénman aywapäkurqan (Deut. 16.16). Tsay fiestachömi ramädakunalacho punupäkurqan (Lev. 23.42). Tsaycho punupäkurqan Egiptupita Israel runakunata Tayta Dios jorqamuptin ramädalacho tashqanta yarpänanpaqmi (Lev. 23.43). Jesucristupis Ramäda fiestaman aywarmi runakunata yachatsirqan (Juan 7.37-39).
^ levita Levita runakunaqa karqan Jacobpa tsurin Levípita miraq runakunami. Paykunami templucho cürakunata yanaparqan (Núm. 1.47-54; 3.5-39). Templu manaraq kaptinmi Dioswan Tinkuna Tolducho yanaparqan (1Crón. 24–26). Levitakunatami rey Josafat kacharqan markan markan Diospa leyninkunata yachatsipäkunanpaq (2Crón. 17.7-9).
^ 16.16 Pascua fiesta y Levadüraynaq Tantata Mikupäkunan fiestataqa juntarkurmi rurapäkurqan.
^ 16.19 Éxo. 23.6-8; Lev. 19.15.
^ Asera Aseraqa cananeo runakuna adorashqan diösami karqan. Paykunaqa yarpapäkurqan tsay diösa imatapis miratsiq kashqantami. Aserata adorananpaqmi raku qerukunata jawipäkuq. Cananeo runakunaqa yarpapäkurqan tsay jawishqan qerukunacho Asera kashqantami (Éxo. 34.13; Deut. 7.5; 12.3; 16.21; 1Rey. 16.33; 18.19; 2Rey. 13.6).
^ altar Altarkunaqa karqan rumiwan perqashqa y qerupita ruraykur jananpa y rurinpa bronciwan enchapashqami. Tsay altarkunachömi uywakunata rupatsir runakuna jutsankunapita perdonashqa kananpaq cürakuna Tayta Diosta manakäriq. Tsaynölami templu rurincho qoripita rurashqa taksha altarpis karqan. Tsaychömi cürakuna inciensuwan qoshtatsiq. Rumipita perqashqa altar imano kashqanta musyanaykipaq rikanki 2Sam. 24.18-cho kaq dibüjuta. Tayta Diosta mana cäsukuq runakunapis altarkunata ruraykurmi ïdulukunata adorapäkuq (Éxo. 30.1-10; Deut. 27.5-6; 2Rey. 16.10-16; 2Crón. 4.1).
^ 16.21 Éxo. 34.13.
^ 16.22 Éxo. 23.24; Lev. 26.1.
