Deuteronomio 18:1-22
18 “Cürakunapa y lapan Leví trïbu runakunapapis manami chakrankuna kanqatsu. Tsaymi *levitakunaqa Israel mayinkuna TAYTA DIOSPAQ apashqan sacrificiukunalawan y ofrendakunalawan kawapäkunqa.
2 Israel nacioncho chakrata chaskinanpa trukanqa kikin TAYTA DIOSMI paykunata promitishqanno herencian kanqa.*
3 “Törukunata, carnishkunata y cabrakunata sacrificiupaq apapäkushqanpitami cürakunapa derëchun kanqa palitillan, chakawshan y cuwäjun.
4 Tsaynöpis paykunapaq kanqa *primiciata apapäkushqan trïgu, vïnu, aceiti y uyshakunapa punta kaq rutushqan milwan.
5 Tsayno chaskipäkunqa imaypis sirvipäkunanpaq TAYTA DIOS Israel trïbukunapita akrashqanpitami.
6 “Mayqan levitapis tashqan markapita TAYTA DIOS akrashqan sitiuman aywarqa
7 levita mayinkunanöla TAYTA DIOSTA tsaycho sirvinqa.
8 Mikuytapis chaskinqa wakin chaskishqannölami. Taytan kamaripashqan jananmanmi tsaykunata chaskinqa.
Mana ali costumbrikunata mana rurananpaq nishqan
9 “TAYTA DIOS qoykushunaykipaq kaykaq nacionman chayashpayki tsaycho taq runakunapa mana ali costumbrinkunata ama yachakärinkitsu.
10 Mayqaykipis olqu tsurikita ni warmi tsurikita sacrificiupaq ama rupatsipäkunkitsu. Ama adivinapakuq ni brüju ni rikakuqpis kapäkunkitsu.*
11 Majiquërupis ni chaqchapakuqpis ama kapäkunkitsu. Wanushkunapa almanta ama manakunkitsu ni tapukunkitsu.
12 Tsaykunata ruraqkunaqa TAYTA DIOSTA fiyupami rabyanätsin. Yaykunaykipaq kaq nacioncho taq runakuna tsayno rurashqanpitami TAYTA DIOS paykunata qarqur ushakätsinqa.
13 Qamkunaqa TAYTA DIOS munashqanno jutsaynaq kawapäkuy.*
14 Yaykunaykipaq nacioncho taq runakuna brüju y adivinakuq kaptinpis TAYTA DIOS manami munantsu qamkuna tsayno kapäkunaykita.
Moiséspa trukan juk profëtata Tayta Dios churananpaq nishqan
15 “TAYTA DIOSMI qamkunapita juk runata churanqa noqano profëta kananpaq. Payta cäsukärinki.*
16 Yarpapäkuy Horeb jirkacho juntakaykur TAYTA DIOSTA manakärishpayki kayno nishqaykita: ‘TAYTA DIOS nina rupaykaqpita rimamushqanta mayayta mantsakärïmi. Rimamushqanta mayarqa wanupäkushaqchari’.*
17 “Tsayno nipäkuptikimi TAYTA DIOS kayno nimarqan: ‘Paykuna nishqanqa alimi kaykan.
18 Tsayno kaykaptinqa Israel mayinkunapitami juk runata churashaq qamno profëta kananpaq. Wilakuynïta shiminman churaptïmi lapan nishqäkunata wilakunqapaq.
19 Tsay profëta noqapa jutïcho wilakushqanta pipis mana cäsukuptinqa kikïmi juzgashaqpaq’.
20 “Mayqan runapis profëta tukushpan ‘Tayta Diospa jutinchömi wilakuykä’ nir manakaqkunata wilakuptin o juk dioskunapa jutincho wilakuptinqa wanutsipäkunki.
21 Tsayno kaptinqa qamkuna capaz kayno nipäkunkipaq: ‘¿Imanöpataq musyashwan juk runa wilakushqan TAYTA DIOSPITA kashqanta o mana kashqantapis?’
22 Juk wilakuq runa ima pasananpaq kashqanta TAYTA DIOSPA jutincho wilakuptinpis nishqanno mana pasaptinqa musyapäkunkipaq TAYTA DIOSPITA mana kashqanta. Kikinpa yarpaynilanpita wilakushqanta tantiyashpayki ama cäsupankitsu.
Ichic wilacuycuna
^ levita Levita runakunaqa karqan Jacobpa tsurin Levípita miraq runakunami. Paykunami templucho cürakunata yanaparqan (Núm. 1.47-54; 3.5-39). Templu manaraq kaptinmi Dioswan Tinkuna Tolducho yanaparqan (1Crón. 24–26). Levitakunatami rey Josafat kacharqan markan markan Diospa leyninkunata yachatsipäkunanpaq (2Crón. 17.7-9).
^ 18.2 Núm. 18.20.
^ primicia Primiciaqa kaykan Israel runakuna qechpa kaqkunata y chakrancho punta poquqkunata Tayta Diospaq apashqanmi (Éxo. 23.19; Lev. 2.11-12; Deut. 14.23; 18.3-4; 26.1-11; 2Crón. 31.11-12; Neh. 10.35-37; 12.44; Eze. 44.30; Rom. 8.23; Apoc. 14.4).
^ 18.10 Éxo. 22.18; Lev. 19.26, 31.
^ 18.15 Hech. 3.22; 7.37.
^ 18.16 Éxo. 20.19.
