Deuteronomio 21:1-23
21 “TAYTA DIOS qoykushunaykipaq kaykaq nacioncho tashpayki maychöpis runapa ayanta tarir y pï wanutsishqantapis mana musyarqa
2 mayor runakunata y juezkunata wilapäkunki rikaq aywapäkunanpaq. Paykuna aywarmi aya jitaraykashqanpita mayqan marka mas cerca kashqantapis tantiyakunqa.
3 Nirkur cercan markacho taq mayor runakunata wilapäkunqa manaraq aruq ternërata akrarkur
4 yaku pashtaykaq purun chakraman apapäkunanpaq. Tsay chakrachömi ternërapa kunkanta pakinqa.
5 “*Levita cürakunapis tsayman aywapäkunqa. Paykunatami TAYTA DIOS akrashqa payta sirvinanpaq y jutincho runakunata bendicionta qonanpaq. Tsaynöpis paykunami kaykan runakuna rimanakuptin y imapis kaptin arreglananpaq.
6 “Nirkurnami aya jitaraykaq cercan markacho taq mayor runakuna kunkan pakishqa ternërapa jananman makinta maylakurir
7 kayno nipäkunqa: ‘Noqakunaqa manami tsay runata wanutsipäkushqätsu. Tsaynöpis manami rikapäkushqätsu pï wanutsishqantapis.
8 TAYTA DIOS, runata kaycho wanutsishqanpita Israel runakunata perdonaykulay. Egiptupita jorqamashqayki runakuna kaykaptïqa tsay runa wanushqanpita ama tumpaykalämaytsu’. Tsayno manakuptinqa tsaycho taq runakunata Tayta Dios manami castiganqatsu.
9 TAYTA DIOS munashqanno rurashpaykiqa manami jutsayuqtsu kankipaq runa tsaycho wanushqanpita.
Guërrapita prësu apamushqan warmipaq nishqan
10 “Aybësis cäsu kanmanmi contrayki runakunawan guërrata ruraptiki TAYTA DIOS makikikunaman churamushqan prësukunacho
11 kuyaylapaq warmita rikapäkushqayki. Warmikipaq munarqa
12 wayikiman apakärinki. Tsaychöna aqtsanta qara putuypa rutupanki y shilluntapis rutupanki.
13 Nirkur röpanta trukapanki. Tsaypita papäninpaq y mamanpaq lakikur juk killa lüturkuptin tsay warmiwan tankipaq.
14 Nirkur tsay warmi mana gustashuptikiqa libri aywakunanpaq kacharinki. Warmiki kaptinqa manami rantikunkimantsu ni ashmayniki kananpaqpis quëdatsikunkimantsu.
Qechpa tsurinpa derëchun kananpaq nishqan
15 “Pï runapis ishkay warmiyuq kar mana kuyashqan warmicho qechpa tsurin kaptinqa
16 tsay kaq tsurintami qechpa kay derëchunta qoykunqa. Kuyashqan kaq warmipa wawan qechpa mana kaptinqa manami qechpa wawqinpa derëchunta qoykunqatsu.
17 Tsayno mana kananpaqmi mana kuyashqan warmipa wawan kaptinpis qechpa kay derëchunta qoykunqa. Tsay derëchunta chaskirqa wakin wawqinkuna chaskishqanpita ishkay kuti mastami chaskinqa.
Mana cäsukuq tsurinta wanutsinanpaq nishqan
18 “Pipapis tsurin mana cäsukuq, mana wiyakuq, yätsiptinpis mana chaskikuq y astaptinpis mana wanakuq* kaptinqa
19 taytan y maman marka yaykunacho juntakaq mayor runakunaman apapäkunqa.
20 Chayaykatsirna mayor runakunata kayno nipäkunqa: ‘Kay tsurïqa manami wiyakamantsu ni cäsukamantsu. Tsaynöpis lutan ruraykunaman y upyalaman churakashqami kakun’.
21 Tsawraqa markacho taq lapan runakuna juntakar saqmaypa tsay mözuta wanutsipäkunqa. Israel nacioncho tsay niraq runakunata tsayno ushakätsishqaykita musyarmi lutankunata pipis mana ruranqanatsu.
Wakin leykuna imano kashqanpis
22 “Pitapis jutsata rurashqanpita autoridäkuna wanurkatsir qeruman warkatsishqalancho
23 ama warätsitsuntsu. Runapa ayan qerucho warkaraptin maldicionashqami kanqa.* Tsayno kaykaptinqa wanushqan junaq jukla pampapäkunki. Warkaraykaqta warätsirqa TAYTA DIOS qoykushunaykipaq kaykaq naciontami *impüruyätsinki.
Ichic wilacuycuna
^ levita Levita runakunaqa karqan Jacobpa tsurin Levípita miraq runakunami. Paykunami templucho cürakunata yanaparqan (Núm. 1.47-54; 3.5-39). Templu manaraq kaptinmi Dioswan Tinkuna Tolducho yanaparqan (1Crón. 24–26). Levitakunatami rey Josafat kacharqan markan markan Diospa leyninkunata yachatsipäkunanpaq (2Crón. 17.7-9).
^ 21.18 Wakin runakunaqa wiyakuq nipäkun.
