Deuteronomio 22:1-30
22 “Marka mayikipa wäkan o uyshan o cabran pantakashqa puriykaqta rikar pipa kashqantapis musyarqa ämunman qatipanki.
2 Tsay uywa pipa kashqantapis mana musyarqa ämun ashishqanyaq mitsinki. Ämun chayamuptinqa ‘katay uywayki’ ninki.
3 Tsaynöla runa mayikipa bürrunta, röpanta o ima oqrashqantapis tarir ämunta entreganki.
4 “Runa mayikipa bürrun o wäkan nänicho tunishqa kaykaqta tarirqa kachariykur ama aywakunkitsu, sinöqa sharkatsïshinki.*
5 “Warmikunaqa olqupa röpanta ama jatikunqatsu. Olqukunapis warmipa röpanta ama jatikunqatsu. Tsayno rurarqa TAYTA DIOSTAMI rabyanätsin.
6 “Puriykashqaykicho pishqupa qeshwanta yöracho o pampacho tarirqa runtu kaptinpis ni pushapa kaptinpis mamantintaqa ama apakärinkitsu.
7 Tsaypa trukanqa mamanta qarqurir wawalanta apakunki. Tsayno rurashpaykiqa atska wata alimi kawapäkunkipaq.
8 “Mushuq wayita sharkatsirqa janancho taksha murällata intëru tumariq sharkatsipäkunki.* Tsayno rurashqa kaptikipis wayiki jananpita pipis wanuqpaq jeqaptin manami jutsayuqtsu kankipaq.
9 “Üva rurinmanqa ima mikuytapis ama murunkitsu. Tsayno mururqa tsay chakrapita lapan cosechashqaykitami Tayta Diospaq apapäkunki.
10 “Töruta bürruwan majatsarkur ama arutsipäkunkitsu.
11 “Milwawan lïnuta talurkur awashqa röpataqa ama jatikärinkitsu.*
12 “Jatirashqayki tünicaykipa chuskun kuchunman hïlukunata churapäkunki.*
Jipashkuna runawan tänanyaq virginla kananpaq nishqan
13 “Pï runapis jipashwan taykashqancho payta ajayashpan:
14 ‘Manami kay jipashta virgintatsu tarishqä’ nir jitapaptinqa
15 warmi tsurinwan punushqan säbanasta maman y taytan apapäkunqa marka yaykunacho juntakaq mayor runakuna rikatsinanpaq.
16 Rikatsirmi jipashpa taytan kayno ninqa: ‘Kay runatami tsurïta entregarqä warmin kananpaq. Kananqa tsurïta ajayarnami mana munantsu.
17 Tsaymi lulakushpan kayno nir rimaykan: “Tsurikita manami virgintatsu tarishqä”. Tsayno niptinpis kay säbanasta rikaykuy tsurï rasunpa virgen kashqanta o mana kashqantapis musyapäkunaykipaq’.
“Tsayno nirmi tsay jipash runanwan punushqan säbanasta yawarlatana mayor runakunata rikatsinqa.
18 Tsayno rikatsiptinmi jipashpa runanta prësu tsarirkur astapäkunqa.
19 Nirkurmi Israel jipashta mala fämaman churashqanpita pägatsinqa pachak (100) yoraq qellayta. Tsay qellaytami jipashpa papäninta entregaykur mana rakikaypana jipashwan tanqa hasta wanunanyaq.
20 “Itsanqa runa nishqanno tsay jipash juk runawan punushqana kaptinqa
21 taytanpa wayi punkunman jorqurkur saqmaypa wanutsipäkunqa. Tsayno wanutsipäkunqa Israel nacioncho mana alita rurashqanpita y manaraq runayuq kar jukwan punushpan taytanta penqayman churashqanpita. Tsaynöpami mana ali ruraykuna qamkunacho mana kanqatsu.*
22 “Pï runatapis runayuq warmiwan adulteriu jutsata ruraykaqta tarirqa ishkanta wanutsipäkunki. Tsaynöpami mana ali ruraykuna Israel nacioncho mana kanqatsu.
23 “Mayqan jipashpis virgen kaykar runawan tänanpaq parlakushqana kaykaptin juk runa markacho tsaripakuptinqa
24 ishkantami marka yaykuna punkuman apapäkunki. Tsaychöna saqmaypa wanutsipäkunki.* Tsay jipashta wanutsipäkunki markacho kaykar ausiliuta mana manakushqanpita. Tsay runatana wanutsipäkunki parlakushqana kaykaptin tsaripakushqanpita. Tsaynöpami mana ali ruraykuna qamkunacho mana kanqatsu.*
25 “Mözuwan tänanpaq jipash parlakushqana kaykar jäkuqcho tinkur tsaripakuptinqa tsay runalatami wanutsipäkunki.
26 Jipashtaqa ama wanutsipäkunkitsu. Payqa manami jutsayuqtsu kanqa wanutsishqa kananpaq. Tsay runaqa jipashta elaqpita tsaripakushqanqa juk runata wanutsishqannömi kanqa.
27 Jipashta jäkuqcho tsaripakuptin qaparaptinpis manami pipis mayanmantsu karqan.
28 “Piwanpis tänanpaq manaraq parlakushqa kaykaq jipashta juk runa tsaripakushqan musyakaptinqa
29 jipashpa papänintami tsay runa päganqa pitsqa chunka (50) yoraq qellayta. Tsaynöpis perdicionta rurashqanpita tsay jipashta warminpaqna jorqur mana rakikaypa wanunanyaq tanqa.*
30 (23.1) “Mädistanwan pipis ama kakutsuntsu. Mädistanwan kakurqa papänintami manakaqman churaykan.*
Ichic wilacuycuna
^ 22.1-4 Éxo. 23.4-5.
^ 22.8 Israel nacionchöqa wayita qatananpa trukanqa terrädu jananman tsaqlarkurmi mituwan lashtapäkuq. Tsay jananchönami awakäriq, aqakäriq y trïgutapis akrapäkuq.
^ 22.11 Lïnuwan milwa awashqa tëlaqa Tinkuna Tolduta qatananpaq y cürakuna jatikunalanpaqmi karqan. Tsaypita masta musyanaykipaq liyinki Éxo. 26.1, 31, 36; 28.5; Lev. 19.19.
^ 22.12 Núm. 15.37-41.
^ 22.21 1Cor. 5.13.
^ 22.22-24 Lev. 20.10; Juan 8.5.
^ 22.24 1Cor. 5.13.
^ 22.28-29 Éxo. 22.16-17.
^ 22.30 Lev. 18.8; 20.11; Deut. 27.20.
