Deuteronomio 23:1-25
23 (2) “TAYTA DIOSTA adoranaykipaq juntakashqaykimanqa manami yaykunmantsu capashqa runakuna y pishqun roqushqa runakuna.
2 (3) “TAYTA DIOSTA adoranaykipaq juntakashqaykimanqa manami yaykunmantsu wachapakuykuna. Tsurinkunapis ni wilkankunapis ni paykunapita miraqkunapis manami yaykunmantsu chunka *generación kashqanyaq.
3 (4) “TAYTA DIOSTA adoranaykipaq juntakashqaykimanqa manami yaykunmantsu amonita runakuna ni moabita runakunapis. Tsurinkunapis ni wilkankunapis ni paykunapita miraqkunapis manami yaykunmantsu chunka generación kashqanyaq.
4 (5) Amonita runakuna y moabita runakunaqa Egiptupita yarqamur nacionninpa pasamuptintsi manami yakuta ni mikuytapis qaramarqantsitsu. Tsaypa trukanqa Mesopotamiacho kaykaq Petor markapita Beorpa tsurin Balaamtami qayatsimurqan maldicionamänantsipaq.
5 (6) Tsayno qayatsimuptinpis Balaam manakushqanta TAYTA DIOS manami cäsuparqantsu. Tsaymi Balaam maldicionayta munamaptintsipis TAYTA DIOS kuyamashpantsi tsay maldicionta bendicionman tikraratsirqan.
6 (7) Amonita y moabita runakunataqa imaypis qamkuna ama kuyapankitsu ni imachöpis ama yanapankitsu.
7 (8) “Edomita runakunataqa ama chikipäkunkitsu. Paykunaqa ayluykikunami karkaykan. Tsaynöla Egipto runakunatapis ama chikipäkunkitsu. Paykunapa markanchöqa atska watami tashqanki.
8 (9) Qamkunacho taq edomita runakunapa y Egipto runakunapa wilkankunami itsanqa TAYTA DIOSTA adorapäkunanpaq juntakashqaykiman yaykapäkamunqa.
Campamentucho limpiu kananpaq nishqan
9 (10) “Guërraman aywar imatapis *impüru kaqtaqa ama rurapäkunkitsu.
10 (11) Mayqan runapis punuykashqancho lëchin jutupakur impüru rikakurqa campamentupita yarqurir juk läducho qoyäkunqa.
11 (12) Tsay tardi armakurir inti jeqaykaptinraq campamentuman kutinqa.
12 (13) “Campamentupita karu niraqcho juk sitiu kanqa tsaycho ishpakärinaykipaq.
13 (14) Cada ünuyki estäcaykita puritsipäkunki tsaywan pampata uchkurir ishpakärinaykipaq. Ishpakurkur alpawan tsapanki.
14 (15) Campamentuykita tsayno limpiuta tsararanki kikin TAYTA DIOS campamentucho qamkunawan kaptinmi. Paymi campamentucho kaykan contraykikunawan pelyaptiki yanapashunaykipaq. Tsaymi qanrata mana rikananpaq campamentuykita limpiuta y *sagräduta tsararanki. Qanrata rikarqa kachariykushushpaykimi aywakunqa.
Israel nacioncho imano kawananpaqpis leykuna
15 (16) “Juk ashmay patronninpita qeshpimushpan nacionnikiman amparakamuptinqa ama patronninman kutitsipäkunkitsu.
16 (17) Tsaypa trukanqa may markachöpis munashqancho täkunanpaq kacharinki. Paytaqa pipis ama nakatsinqatsu.
17 (18) “Wakin nacionkunacho diosninkunata adorar jukwan jukwan kakuptinpis Israelchöqa ni warmipis ni olqupis tsaykunata ama ruranqatsu.
18 (19) Tsay runakuna y warmikuna gänapakushqan qellayta TAYTA DIOSPA wayinman ama apapäkunqatsu. Tsaynöpis tsay qellaytaqa promitishqan ofrendapaqpis ama churapäkunqatsu. Tsayno ruraqkunaqa TAYTA DIOSTA fiyupami rabyanätsin.
19 (20) “Qellayta karpis, mikuyta karpis o imata karpis Israel mayikita prestarqa qellaypa wawanta ama cobrankitsu.
20 (21) Prestashqayki qellaypa wawantaqa jäpa runakunalatami cobrapäkunki. Israel mayikita ama cobrankitsu. Tsaynöpami tänaykipaq kaykaq nacionman chayaptiki ima arushqaykimanpis TAYTA DIOS bendicionninta churamunqa.
21 (22) “TAYTA DIOSTA imatapis promitirqa imaykanöpapis mana qonqaypa cumplipäkunki. Mana cumpliptikiqa TAYTA DIOSMI juzgashunkipaq.
22 (23) Imatapis mana promitirqa manami jutsayuqtsu kanki.
23 (24) Tsayno kaptinpis voluntänikipita TAYTA DIOSTA imatapis promitirqa mana qonqaypa cumplipäkunki.
24 (25) “Pipa üva chakranpapis pasaykashqaykicho üvata munaparqa saksashqaykiyaq mikupäkunki. Itsanqa ama ni juklaylatapis wayikimanqa apapäkunkitsu.
25 (26) Trïgu chakranpa pasaykashqaykicho uchunaykipaq tupuyla palapäkunki. Ösiwanmi itsanqa mana achupäkunkitsu.
Ichic wilacuycuna
^ generación Juk generacionqa kaykan runa yurishqanpita hasta tsurin yurishqanyaqmi. Tsurinkuna yuriptinnami juk generación qalaykun. Wilkankuna yuriptinnami juk generación qalaykun. Wilkankunapa tsurinkuna yuriptinnami juk generación qalaykun. Tsaynölami imayyaqpis kanqa (Éxo. 20.6; Deut. 5.10; 7.9; 1Crón. 16.15; Sal. 105.8; Mat. 1.17).
^ püru, impüru Püru ninanqa ima qanrapis mana kashqan ninanmi. Tsaymi Tayta Dios munashqanno jutsaynaq kawaq runapis püru kashqanta Bibliacho nin (1Juan 3.3).
^ sagrädu Liyinki santupita tantiyatsikuyta.
