Deuteronomio 24:1-22
24 “Aybësis cäsu kanmanmi juk runa warminwan taykashqancho penqakuypaq kaqkunata warmi rurashqan y tsayno rurashqanpita rakikaykashqan papilta firmaparkur wayinpita runa qarqushqan.*
2 Tsay warmi aywakur juk runawan yapay taykashqancho
3 tsay runanpis rakikaykashqan papilta ruraparkur wayinpita qarquptin o tsay runan wanuptinqa
4 manami punta kaq runanwan kutipänakunmantsu. Tsay warmiqa punta kaq runanpaq *impüru karmi yapay kutipänakurqa TAYTA DIOSTA fiyupa rabyanätsinqa. Tsayno rurarqa TAYTA DIOS qoykushunaykipaq kaykaq naciontami impüruyätsinqa.
Mas leykunata tantiyatsishqan
5 “Juk runa tsayraq warmiwan taykaptinqa guërraman ama kachapäkunkitsu ni ima autoridä kananpaqpis ama churapäkunkitsu. Juk watayaqmi tsayno libri tanqa warminta yachakätsinanpaq.
6 “Pipa tunaynintapis ni maraynintapis prenda ama tsarikurkunkitsu. Tsaykunata prenda apakuptikiqa aqakunanpaq mana kaptin mikunanpaqpis manami kanqatsu.
7 “Israel mayinta ashmayninpaq o rantikunanpaq pipis suwaptinqa tsay runata wanutsipäkunki.* Tsaynöpami Israel nacioncho tsay niraq runakunata elqätsinki.*
8 “Pitapis *lepra tsariptinqa *levita cürakunaman aywanqa rikapäkunanpaq. Paykunaqa musyaykanmi leprapita lapan nishqäkunata. Tsayno kaptinqa lepra tsarishuptiki imatapis ruranaykipaq nishushqaykita lapanta rurapäkunki.*
9 Qamkuna ama qonqankitsu Egiptupita aywaykämuptintsi Maríata TAYTA DIOS leprawan castigashqanta.*
10 “Runa mayikita qellayta prestashpaykiqa wayinman ama yaykapäkunkitsu imantapis prenda apakunaykipaq.
11 Yaykunaykipa trukanqa wayi punkulancho shuyaranki prendata kikin churamushqanyaq.
12 Waktsa kar punchunta o jakunta prenda churamuptinqa waraynin* junaqyaq ama tsararäkunkitsu.
13 Tsaypa trukanqa tsay tardila kutiykatsinki qatakurkur punukunanpaq. TAYTA DIOS munashqanta tsayno ruraptikimi kushikur payta manakunqa bendicionninta qoykushunaykipaq.*
14 “Markaykicho taq Israel mayiki kaptinpis o jäpa runa kaptinpis waktsa kar arupäshuptiki jukla pägapäkunki.
15 Tsay tardila pägapäkunki mikuyninta rantipakunanpaq. Mana pägaptikiqa Tayta Diosta quejakuptin castigashunkipaqmi.*
16 “Tsurinpa jutsanpita ama mamanta ni papäninta wanutsipäkunkitsu. Tsaynöpis mamanpa o papäninpa jutsanpita tsurinta ama wanutsipäkunkitsu. Tsaypa trukanqa jutsa ruraq kaqta wanutsipäkunki.*
17 “Jäpa kaptinpis waktsa kaptinpis lapan runakunata shumaq arreglapäkunki. Viüdakunapa röpantapis prenda ama tsarikurkunkitsu.
18 Ama qonqapäkuytsu qamkunapis Egiptucho ashmay kar nakarkaykaptiki TAYTA DIOS jorqamushushqaykita. Tsaymi qamkunata yätsiykä imano kaptinpis lapan runakunata shumaq arreglapäkunaykipaq.*
19 “Trïgu achushqaykicho juk manöjuta qonqaykushpaykipis shuntamunaykipaq ama kutipäkunkitsu. Tsaytaqa kachaykunki markaykicho tarkaykaq jäpa runakunapaq, waktsakunapaq y viüdakunapaq. Tsayno ruraptikimi ima arushqaykimanpis TAYTA DIOS bendicionninta churamunqa.
20 Aceitünasta cosecharpis ashi ashiykurqa ama palapäkunkitsu. Putsuq kaqqa kanqa jäpa runakunapaq, waktsakunapaq y viüdakunapaqmi.
21 Üvata palarpis tikrapaylapaqa ama shuntapäkunkitsu. Quëdaq kaqqa kanqa markaykicho taq jäpa runakunapaq, waktsakunapaq y viüdakunapaqmi.*
22 Egiptucho ashmay kashqaykita ama qonqapäkuytsu. Tsaymi kanan nï jäpa runakunata, waktsakunata y viüdakunata kuyapänaykipaq.
Ichic wilacuycuna
^ 24.1 Mat. 5.31; 19.7; Mar. 10.4.
^ püru, impüru Püru ninanqa ima qanrapis mana kashqan ninanmi. Tsaymi Tayta Dios munashqanno jutsaynaq kawaq runapis püru kashqanta Bibliacho nin (1Juan 3.3).
^ 24.7a Éxo. 21.16.
^ 24.7b 1Cor. 5.13.
^ lepra Lepra qeshyaqa runapa qarancho tukuy casta qerikunami karqan. Israel nacioncho lepra qeshyawan qeshyaykaqkunaqa markapita juk läduchömi täkäriq (Lev. 13.45-46). Paykunataqa runakuna manami yataylapis yataqtsu (Lev. 22.5). Tsayno kaptinpis Jesucristo munayniyuq karmi leprawan qeshyaykaqkunata yataykur aliyätsirqan (Mar. 1.40-43).
^ levita Levita runakunaqa karqan Jacobpa tsurin Levípita miraq runakunami. Paykunami templucho cürakunata yanaparqan (Núm. 1.47-54; 3.5-39). Templu manaraq kaptinmi Dioswan Tinkuna Tolducho yanaparqan (1Crón. 24–26). Levitakunatami rey Josafat kacharqan markan markan Diospa leyninkunata yachatsipäkunanpaq (2Crón. 17.7-9).
^ 24.8 Lev. 13.1—14.57.
^ 24.9 Núm. 12.10-15.
^ 24.12 Wakin runakunaqa warantin nipäkun.
^ 24.10-13 Éxo. 22.26-27.
^ 24.14-15 Lev. 19.13.
^ 24.17-18 Éxo. 23.9; Lev. 19.33-34; Deut. 27.19.
^ 24.19-21 Lev. 19.9-10; 23.22.
