Deuteronomio 25:1-19
25 “Piwanpis rimanakurqa autoridäman ishkan aywanqa. Autoridäkunanami jutsaynaq kaqta kacharinqa y jutsayuq kaqta castiganqa.
2 Astashqa kananpaq kaptinqa pampaman lätaykatsirmi jutsata rurashqanman tupu juez astatsinqa.
3 Ima kaptinpis chusku chunka (40) makipita mastaqa ama astapäkunkitsu.* Masta astaptikiqa penqaypaqmi kanqa.
4 “Ëracho arutsir töruta ama shenqalwankitsu.*
5 “Tsay wawqila juk wayicho taykaptin wawqin tsuriynaq wanuptinqa wawqinmi viüdawan tanqa. Tsaynöpami cumplinqa wawqinpa viüdanwan tänanpaq kaykaq leyta. Tsay viüda manami juk runawanqa tanmantsu.
6 Tsay viüdacho punta kaq tsurinmi wanuq wawqinpa jutinta aparanqa. Tsaynöpami wanuqpa jutin Israelcho mana qonqakanqatsu.*
7 “Tsay runa cuñädanwan tayta mana munaptinqa marka punkuman aywaykur mayor runakunaman cuñädan quejakunqa. Paykunatami kayno ninqa: ‘Cuñädü manami munantsu wawqinpa jutin Israel nacioncho aywaränanta. Manami munantsu ley nishqanno noqawan tayta’.
8 Tsawraqa mayor runakuna qayaykatsir cuñädunta ninqa cuñädanwan tänanpaq. Paykuna niptinpis tayta mana munaptinqa
9 cuñädan viüda mayor runakunapa nawpancho cuñädunpa lanqinta qechunqa. Nirkur qaqlanman toqaparkur kayno ninqa: ‘Kaynömi rurantsi pï runapis wawqinpa jutinta aparänanta mana munaq kaqtaqa’.
10 Tsaypita patsami tsay runata y paypita miraqkunatapis ‘qara chakikuna’ nipäkunqa.
11 “Ishkay runakuna pelyaykaptin jukninpa warmin chayaykur runanta washashpan contranpa runtunpita aptakurkuptinqa
12 tsay warmipa makinta mana kuyapaypa roqupäkunki.
13 “Imata rantirpis o imata rantikurpis balanzaykiwan ama engañankitsu.
14 Tsaynöla tupuykipis complëtu kanqa.
15 Balanzayki exactu kaptin y tupuykipis complëtu kaptinmi TAYTA DIOS qoykushunaykipaq kaykaq nacioncho atska wata ali kawapäkunkipaq.
16 Balanzawan y tupukunawan suwakuptikiqa TAYTA DIOS pasaypami rabyakun.*
Amalecita runakunata ushakätsinanpaq nishqan
17 “Qamkuna ama qonqapäkuytsu Egiptupita shapäkamuptiki amalecita runakuna contrayki kashqanta.
18 Yarpapäkuy utikashqa karkaykaptiki taripaykushushpayki qepakashqa kaykaq runakunata atacashqanta. Amalecita runakunaqa Tayta Diostapis mana *mantsakuypami tsayno atacashurqayki.
19 Qoykushunaykipaq kaykaq nacioncho contraykikunata ushakätsinaykipaq TAYTA DIOS yanapashuptiki amalecita runakunatapis mana qonqaypa ushakätsinki.*
Ichic wilacuycuna
^ 25.3 2Cor. 11.24.
^ 25.4 1Cor. 9.9; 1Tim. 5.18.
^ 25.5-6 Mat. 22.24; Mar. 12.19; Luc. 20.28.
^ 25.13-16 Lev. 19.35-36; Prov. 11.1; 20.10; Amós 8.5; Miq. 6.11.
^ mantsakuy, Diosta mantsakuy Tayta Diosta mantsakurqa tantiyantsi kuyakuq y perdonakuq karpis jutsa rurayta mana kachariqkunata castigashqantami (Éxo. 34.6; Heb. 10.31). Tayta Dios munayniyuq kashqanta rikar Israel runakunapis payta mantsakurqanmi (Éxo. 14.31; Jos. 4.24; 1Sam. 12.18). Tsaymi Tayta Diosta mantsakur payta adorar cäsukuntsi (Deut. 5.29; 10.12-13; Jos. 24.14) y runa mayintsiwan ali kawantsi (Lev. 25.17, 36, 43). Tayta Diosqa payta mantsakuqkunapa amïgunmi kaykan (Sal. 25.14).
^ 25.17-19 Éxo. 17.8-14; 1Sam. 15.2-9.
