Deuteronomio 26:1-19
26 “TAYTA DIOS qoykushunaykipaq kaykaq nacionman yaykur tsaycho tashpayki
2 murushqaykipita punta poquqta canastawan apapäkunki TAYTA DIOSTA adoranaykipaq akrashqan sitiuman. Tsayqa *primiciami kanqa.*
3 Tsayman chayaykurmi tsaycho kaykaq cürata kayno nipäkunki: ‘Unay ayluntsita promitishqanta cumplirmi kay nacionta TAYTA DIOS entregamarqantsi. Tsaymi kay primiciata apamushqä’.
4 Tsayno niptikimi cüraqa canastata chaskirkur TAYTA DIOSPA *altarnin nawpanman churanqa.
5 “Churaykuptinnami TAYTA DIOSPA nawpancho kayno nipäkunki: ‘Unay ayluntsikunaqa kay lädupa wak lädupa purikuq arameo runakunami karqan. Tsayno puriykashqanchömi Egiptuman aywakur atskaman mirarqan jatun nación rikakunanyaq.
6 Tsaychömi Egipto runakuna pasaypa nakatsimashpantsi maqa maqarkur fiyupa arutsimarqantsi.
7 Tsaymi unay ayluntsikuna yärakushqan TAYTA DIOSTA manakurqantsi kuyapämänantsipaq. Manakushqantsita mayarmi rikamarqantsi pasaypa arushqantsita y nakashqantsita.
8 Tsaymi Egipto runakunata mantsariypaq castigashpan TAYTA DIOSQA munayninwan jorqamarqantsi.
9 Nirkurmi kay nacionman pushamarqantsi atska lëchipis abëjapa mishkinpis kashqanman.
10 Tsaymi kananqa TAYTA DIOS kamaripämashqantsi chakrakunapita primiciata apamushqä’.
“Tsayno nirkushpayki canastata aptarkur yapay churaykunki altar nawpanman. Nirkurmi TAYTA DIOSPA nawpanman qonqurpakunki.
11 Tsaypitana qamtapis ayluykikunatapis TAYTA DIOS yanapashushqaykipita kushikur fiestata rurapäkunki. Fiestata rurashpayki qayatsinki markaykicho taq *levitakunata y jäpa runakunatapis.
Diezmuta apapäkunanpaq nishqan
12 “Cada kimsa watacho lapan murushqaykipita *diezmuta aypupäkunki markaykicho taq *levitakunata, jäpa runakunata, waktsakunata y viüdakunata. Tsaynöpami markaykicho pipis mana muchunqatsu.*
13 Paykunata aypurkur TAYTA DIOSTA kayno nir manakärinki:
“ ‘Nimashqaykinölami wayïpita apaykur levitakunata, jäpa runakunata, waktsakunata y viüdakunata rakipänäpaq kaqta aypushqä. Imatapis mana qonqaypami lapan nishqaykikunata cumplishqä.
14 Wanupakurpis *impüru karpis tsay rakishqä diezmutaqa manami mikushqätsu. Wanushkunapaqpis tsaykunataqa manami tätsikushqätsu. Nimashqaykitaqa lapantami rurashqä, TAYTA DIOS.
15 Kananqa jana patsacho kaq templuykipita patsa bendicionnikita churaykalämuy lapan Israel runakunaman y qoykamashqayki nacionmanpis. Unay aylükunata promitishqaykinölami yakunöraq atska lëchipis abëjapa mishkinpis kashqan nacionta kamaripämarqayki’.
Israel runakuna Tayta Diosta imaypis cäsukunanpaq yätsishqan
16 “Kanan junaqmi estatütunkunata y leyninkunata cumplipäkunaykipaq TAYTA DIOS nishunki. Tsayno kaptinqa lapan shonquykiwan y lapan voluntänikiwan cumplipäkuy.
17 Kananmi nipäkushqanki TAYTA DIOSMAN yärakur y pay munashqanno kawar estatütunkunata, mandamientunkunata y leyninkunata imaypis cumplipäkunaykipaq kashqanta.
18 TAYTA DIOS promitishushqaykinölami kuyashqan runakuna kapäkushqaykita kanan junaq nishushqanki.* Tsayno kaykaptinqa lapan mandamientunkunata cumplipäkuy.
19 Lapan mandamientunta cumpliptikiqa Tayta Diosmi qamkunata yanapashunki lapan nacionkunapitapis mas respitashqa y reqishqa kapäkunaykipaq. Tsaynöpis promitishqannölami kuyashqan *sagrädu nación kapäkunkipaq”.
Ichic wilacuycuna
^ primicia Primiciaqa kaykan Israel runakuna qechpa kaqkunata y chakrancho punta poquqkunata Tayta Diospaq apashqanmi (Éxo. 23.19; Lev. 2.11-12; Deut. 14.23; 18.3-4; 26.1-11; 2Crón. 31.11-12; Neh. 10.35-37; 12.44; Eze. 44.30; Rom. 8.23; Apoc. 14.4).
^ 26.2 Éxo. 23.19.
^ altar Altarkunaqa karqan rumiwan perqashqa y qerupita ruraykur jananpa y rurinpa bronciwan enchapashqami. Tsay altarkunachömi uywakunata rupatsir runakuna jutsankunapita perdonashqa kananpaq cürakuna Tayta Diosta manakäriq. Tsaynölami templu rurincho qoripita rurashqa taksha altarpis karqan. Tsaychömi cürakuna inciensuwan qoshtatsiq. Rumipita perqashqa altar imano kashqanta musyanaykipaq rikanki 2Sam. 24.18-cho kaq dibüjuta. Tayta Diosta mana cäsukuq runakunapis altarkunata ruraykurmi ïdulukunata adorapäkuq (Éxo. 30.1-10; Deut. 27.5-6; 2Rey. 16.10-16; 2Crón. 4.1).
^ levita Levita runakunaqa karqan Jacobpa tsurin Levípita miraq runakunami. Paykunami templucho cürakunata yanaparqan (Núm. 1.47-54; 3.5-39). Templu manaraq kaptinmi Dioswan Tinkuna Tolducho yanaparqan (1Crón. 24–26). Levitakunatami rey Josafat kacharqan markan markan Diospa leyninkunata yachatsipäkunanpaq (2Crón. 17.7-9).
^ diezmu Diezmuqa cada chunkapita jukta Tayta Diospaq rakishqanmi kaykan. Tsaytaqa rakin qellaypita, uywakunapita y mikuykunapitami (Gén. 14.17-20; Deut. 14.22; Mat. 23.23).
^ levita Levita runakunaqa karqan Jacobpa tsurin Levípita miraq runakunami. Paykunami templucho cürakunata yanaparqan (Núm. 1.47-54; 3.5-39). Templu manaraq kaptinmi Dioswan Tinkuna Tolducho yanaparqan (1Crón. 24–26). Levitakunatami rey Josafat kacharqan markan markan Diospa leyninkunata yachatsipäkunanpaq (2Crón. 17.7-9).
^ 26.12 Deut. 14.28-29.
^ püru, impüru Püru ninanqa ima qanrapis mana kashqan ninanmi. Tsaymi Tayta Dios munashqanno jutsaynaq kawaq runapis püru kashqanta Bibliacho nin (1Juan 3.3).
^ 26.18 Éxo. 19.5; Deut. 7.6; 14.2; Tito 2.14; 1Ped. 2.9.
^ sagrädu Liyinki santupita tantiyatsikuyta.
