Deuteronomio 29:1-29
29 (28.69) Moisés tsayno niptinmi Horeb jirkacho *pactuta rurashqannöla Israel runakunawan TAYTA DIOS Moab nacionchöpis pactuta rurarqan.
2 (1) Tsaymi lapan Israel runakunata qayaykatsir Moisés kayno nirqan: “Egiptucho kaykashpayki rikapäkurqaykimi Faraónta, mandäshiqninkunata y Egipto runakunata TAYTA DIOS castigashqanta.
3 (2) Kikikikunami rikapäkurqayki milagrukunata, señalkunata y espantaypaq kaqkunata rurashqanta.
4 (3) Tsayno kaptinpis TAYTA DIOS upatakätsishuptiki kananyaq manami tantiyapäkunkiraqtsu. Rikaykarpis mana rikaqnömi karkaykanki y wiyaykarpis mana wiyaqnömi karkaykanki.*
5 (4) “Chusku chunka (40) watami chunyaq jirkapa qamkunata pushamushqä. Tsay watakunacho manami mayqanintsipapis röpantsi ni lanqintsipis ushakarqantsu.
6 (5) Mikunantsipaq tanta mana kaptinpis y upunantsipaq vïnu ni aswa mana kaptinpis TAYTA DIOS *maná nishqan mikuytami kamaripämarqantsi. Tsayno rurarqan TAYTA DIOSNINTSI kashqanta tantiyakur payta cäsukunantsipaqmi.
7 (6) “Kayman chaykamuptintsimi soldädunkunawan atacamänantsipaq shamurqan Hesbón markacho taq rey Sehón* y Basán nacionpa mandaqnin rey Og.* Jina kaqtami paykunata lapanta ushakätsirqantsi.
8 (7) Nacionninta qechurkurmi aypurqantsi Rubén trïbu runakunata, Gad trïbu runakunata y pulan Manasés trïbu runakunata.*
9 (8) Tsayno kaykaptinqa TAYTA DIOS pactu rurashqanta mana qonqaypa cumplipäkunki. Cumplipäkuptikiqa ima rurashqaykikunapis alimi kanqapaq.
10 (9) “Cada trïbupa mandaqninkuna karpis, mayor runakuna karpis, autoridäkuna karpis o común runakuna karpis lapaykimi TAYTA DIOSNINTSIPA nawpancho karkaykanki.
11 (10) Tsaynölami tsurikikunapis y warmikipis kaycho karkaykan. Yantata y yakuta apapämushuqniki ashmay jäpa runakunapis kaychömi karkaykan.
12 (11) Lapaykimi kaycho karkaykanki TAYTA DIOS rurashqan pactuta chaskipäkunaykipaq. Imayyaqpis cumplinanpaq jurarmi tsay pactuta Tayta Dios kanan junaq noqantsiwan ruraykan.
13 (12) Tsaymi unay ayluntsikunata TAYTA DIOS promitishqannöla kuyashqan runakuna karkaykanki. Tsaynöpis qamkunapa Diosnikiqa kikin TAYTA DIOSMI kaykan.
14 (13-14) TAYTA DIOSNINTSIPA nawpancho kaykar paywan rurapäkushqayki pactuqa manami qamkunalapaqtsu, sinöqa tsurikikunapaq, wilkaykikunapaq y paykunapita miraqkunapaqwanmi kaykan.
15 -
16 (15) “Qamkuna musyapäkunkimi Egiptucho imano kawashqantsitapis. Tsaynöpis musyapäkunkimi kayman chayamunantsiyaq atska nacionkunata imano pasamushqantsita.
17 (16) Tsaynöpis rikapäkushqankimi qerupita, rumipita, qellaypita y qoripita rurashqa ïdulukunata tsay nación runakuna adorapäkushqanta.
18 (17) Qamkunachöqa manami olqupis ni warmipis ni mayqan aylupis ni mayqan trïbupis TAYTA DIOSNINTSITA qonqaykur ïdulukunata adoranmantsu. Ïdulukunata adoraqkuna kaptinqa venënuyuq asqaq jachanömi* qamkunacho kanqa.
19 (18) “Kay pactuta rurar ama yarpapäkuytsu mana cumpliptikipis TAYTA DIOS mana castigashunaykipaq kashqanta. Mana cumpliptikiqa TAYTA DIOS lapaykitami ushakätsishunkipaq.
20 (19) TAYTA DIOSQA manami perdonashunkipaqtsu, sinöqa pasaypa rabyashpanmi kay librucho qelqaraykaq lapan maldicionkunawan castigashunkipaq qamkunapita miraqkunapis ushakänanyaq.
21 (20) Lapan Israel trïbukunapita jorqushuptiki tukuy desgraciakunami pasashunkipaq. Lapanpis tsay maldicionkuna pasashunkipaq kay *pactu librucho qelqaraykashqanömi.
22 (21) “Tashqayki nacionchöpis desgraciakunawan y qeshyakunawan TAYTA DIOS castigashushqaykitami qepa yuriq Israel runakuna y karu nacionpita shamuq jäpa runakunapis rikapäkunqapaq.
23 (22) Tsaymi pasaypa mantsakashpan kayno nipäkunqa: ‘¡Tsay chakrakunachöqa kachi y azufrilami mashtaraykan! Manami imapis tsaycho wayunqatsu ni qewapis winamunqatsu. Sodomata, Gomorrata, Admata y Zeboimta TAYTA DIOS castigar ushakätsiptin imapis mana quëdashqannömi tsaychöpis mana quëdanqatsu’.
24 (23) “Tsawraqa lapan nación runakunami kayno nipäkunqa: ‘¿Imanirraq kay nacionta tsayno TAYTA DIOS castigaykushqa? ¿Imanirraq fiyupa rabyakushqa?’
25 (24) Niptinmi kayno nipäkunqa: ‘Unay aylunkuna yärakushqan TAYTA DIOSMI tsayno castigashqa paykunawan pactu rurashqanta mana cumplipäkushqanpita. Tsay pactuta rurarqan Egiptupita jorqamurmi.
26 (25) Tsay runakunaqa TAYTA DIOSTA adorananpa trukanmi mana reqipäkushqan y imachöpis mana yanapakuq dioskunata adorapäkushqa.
27 (26) Tsaymi TAYTA DIOSTA rabyanätsiptin kay librucho qelqaraykaq lapan maldicionkunawan tsay runakunata castigashqa.
28 (27) Nirkurmi rikashqantsinöpis fiyupa rabyashpan juk lädu nacionkunaman qarqushqa’.
29 (28) “Manami lapan yarpashqankunatatsu TAYTA DIOSNINTSI musyatsimantsi. Leyninkunata y mandamientunkunatami itsanqa musyatsimashqantsi kikintsi y tsurintsikuna imayyaqpis cumplinantsipaq”.
Ichic wilacuycuna
^ pactu Pactuqa promitinakushqanta cumplinanpaq nishqanmi kaykan. Unay Testamentuchöqa Israel runakunawanmi pactuta Tayta Dios rurarqan. Tsaymi Tayta Dios promitirqan Israel runakunapa Diosnin kar paykunata imaypis yanapananpaq. Israel runakunanami Tayta Diosta promitirqan mandamientunkunata y leyninkunata cumplipäkunanpaq (Éxo. 6.7; 19.5-6; Lev. 26.3-12). Pactuta rurarmi uywata pishtar shuntashqan yawarta Israel runakunaman Moisés tsaqtsuparqan (Éxo. 24.8). Tsaynölami Jesucristo noqantsi rayku wanur yawarninta jichashpan mushuq pactuta rurarqan payta chaskikuqkunata jutsankunapita perdonar salvananpaq (Luc. 22.20; Heb. 10.16-17).
^ maná Manáqa karqan culandrupa murunno y jachapa weqin niraq qarwashlami. Tsay mikuytami Israel runakunata Tayta Dios kamariparqan chunyaq tsaki jirkacho. Tsaytami ankaypapis machkaypapis y tantata ruraykurpis mikupäkurqan. Israel runakunaqa chusku chunka (40) watami tsay mikuyta mikupäkurqan (Éxo. 16; Núm. 11.4-9; Juan 6.31).
^ 29.7a Núm. 21.21-30.
^ 29.7b Núm. 21.31-35.
^ 29.8 Núm. 32.33.
^ 29.18 Heb. 12.15.
^ Pactu Libru Pactu Libruqa Israel runakuna cumplinanpaq kaq leykunata qelqashqan librumi karqan (Éxo. 24.7). Tsay leykunaqa karqan paykunawan Tayta Dios rurashqan pactuta cumplinanpaqmi. Tsaynölami tsay pactuta cumplir Tayta Dios promitirqan Israel runakunapa Diosnin kar paykunata yanapananpaq kashqanta y paykuna kuyashqan runakuna kananpaq kashqanta (Hech. 20.28; Efe. 1.22; 5.23).
