Deuteronomio 34:1-12
34 Tsaypitanami Moab pampapita Moisés aywar Nebo jirkacho kaykaq Pisga nishqan puntaman witsarqan. Tsay puntaqa Jericó tsimpanchömi kaykan. Tsay puntapitami TAYTA DIOS rikatsirqan Galaad partipita hasta Dan partiyaq.
2 Tsaynöpis rikatsirqan Neftalí partita, Efraín partita, Manasés partita y Judá partita hasta Mediterráneo Lamaryaq.
3 Tsaynöpis rikatsirqan *Neguevta y Jordán mayupa aywaraq pampata y Jericó markapita hasta Zoar markayaq. Jericópa jukaq jutinmi karqan Palmëra Marka.
4 Nirkurmi TAYTA DIOS kayno nirqan: “Taqay rikaykashqayki nacionqa Abrahamta,* Isaacta,* Jacobta* y tsurinkunata promitishqä nacionmi kaykan. Nawilaykiwanpis rikärinaykitami munashqä. Kikikiqa mananami tsayman chayankipaqnatsu”.
5 TAYTA DIOS nishqannölami sirviqnin Moisés tsay puntacho wanurqan. Tsay puntaqa Moab nacionchömi kaykan.
6 Wanuykuptinmi Bet-peor cercancho kaykaq Moab pampacho pampakurqan. Kananyaq manami pipis musyantsu maynincho pamparashqantapis.
7 Pachak ishkay chunka (120) watayuq kaykarmi Moisés wanurqan. Wanunanyaqpis nawinqa manami tsakarqantsu ni kalpanpis manami ushakarqantsu.
8 Wanushqanta musyaykurmi Israel runakuna juk killayaq Moab pampacho lütupäkurqan.
9 Manaraq wanurmi Nunpa tsurin Josuépa umanman makinta churaykur Tayta Diosta Moisés manakurqan tantiyakuq kananpaq. Tsaymi TAYTA DIOS nishqannöla Moiséspa trukan Josuétana Israel runakuna respitar cäsukärirqan.*
10 Tayta Diospa wilakuqnin Moisésnöqa manami pipis karqantsu. Paywanmi Tayta Dios imaypis parlaq.*
11 Paytami TAYTA DIOS kacharqan Egipto runakunata mantsariypaq castïgukunawan castigananpaq. Tsay castïgukunawanmi TAYTA DIOS castigarqan Faraónta, mandäshiqninkunata y lapan Egipto nacionta.
12 Lapan Israel runakuna rikaykaptinmi Tayta Dios poderninwan mantsariypaq castïgukunawan castigarqan.
Ichic wilacuycuna
^ Neguev Neguevqa Israel nacionpa sur kaq lädunchömi kaykan. Neguevcho kaykan Beerseba, Siclag, Gerar y Arad markakunami. Neguevcho shumaq mana tamyaptinmi aläpaqa mana murukärintsu. Tsaymi tsay partichöqa uyshata y cabrata ashmakular täkärin (Gén. 24.62; Núm. 13.17; Jos. 11.16).
^ 34.4c Gén. 28.13.
^ 34.9 Núm. 27.18, 23; Jos. 1.16-18.
^ 34.10 Éxo. 33.11; Núm. 12.6-8.
