Deuteronomio 6:1-25
6 “TAYTA DIOSNINTSIMI kachamashqa mandamientunkunata, estatütunkunata y leyninkunata qamkunata yachatsinäpaq. Chaskinaykipaq kaq nacionman chayaykur tsay mandamientukunata cäsukärinki.
2 TAYTA DIOSTA *mantsakur tantiyatsishqä lapan estatütunkunata y mandamientukunata imaypis cumplirqa qamkunapis, tsurikikunapis y wilkaykikunapis atska watami kawapäkunkipaq.
3 “Israel runakuna, kay tantiyatsishqä leykunata cumplinaykipaq shumaq mayapäkamay. Cäsukamashpaykiqa unay ayluntsikunata TAYTA DIOS promitishqanno nacionnikicho ali kawashpayki tsaytsikaman mirapäkunkipaq. Tsaychöqa lëchipis abëjapa mishkinpis yakunöraqmi atska kaykan.
4 “Israel runakuna, shumaq wiyakäriy. TAYTA DIOSNINTSIQA juklaylami.*
5 “TAYTA DIOSTA *kuyanki lapan shonquykiwan, lapan voluntänikiwan y lapan kalpaykiwan.*
6 “Kanan junaq wilashqä leykunata shonquykicho imaypis yarparanki.
7 Mana qonqaypa wamraykikunata yachatsipäkunki wayikichöpis, nänikunachöpis, manaraq punurpis y punushqaykipita sharkurpis.
8 Makikiman y urkuykiman watakurkur puritsipäkunki.
9 Tsaynöla qelqapäkunki wayi punkupa quiciunkunaman y marka yaykuna punkukunamanpis”.*
Tayta Diosta cäsukärinanpaq nishqan
10 “Unay ayluntsi Abrahamta,* Isaacta* y Jacobta* promitishqan nacionmanmi TAYTA DIOS chayatsishunkipaq. Tsay nacionchöqa mana sharkatsishqayki kuyaylapaq jatusaq markakunami listu kaykan.
11 Tsay markakunachöqa imatapis mana pirwakuykarmi wayi juntata imaykatapis taripäkunkipaq. Yaku pözukunatapis uchkushqalatanami taripäkunkipaq. Üvatapis olïvutapis listu plantashqalatanami taripäkunkipaq. Tsayta saksaqpaq mikur
12 cuidädu Egiptucho ashmay kashqaykipita jorqamushuqniki TAYTA DIOSTA qonqapäkunkiman.
13 “TAYTA DIOSLATA *mantsakärinki. Pay japalanta sirvipäkunki.* Jurarpis paypa jutilancho jurapäkunki.
14 Juk lädu markakunacho taq runakuna adorashqan dioskunata ama adorapäkunkitsu.
15 Noqantsiwan kaykaq TAYTA DIOSQA pay japalanta adoranaykitami munan. Juk dioskunata adoraptikiqa rabyar chipyaqmi ushakätsishunkipaq.
16 “Masahcho tentashqaykino* TAYTA DIOSNINTSITA ama tentapäkunkitsu.*
17 TAYTA DIOSNINTSIPA mandamientunkunata, leyninkunata y estatütunkunata tantiyatsishqäta lapanta cumplipäkunki.
18 TAYTA DIOS munashqanno imaypis kawapäkunki. Tsaynöpami unay ayluntsikunata TAYTA DIOS promitishqan nacionman yaykur kushishqa kawapäkunkipaq.
19 Tsaynöpis promitishqannölami lapan contraykikunata qarqur TAYTA DIOS ushakätsinqa.
20 “Wara warantin tsurikikuna ‘¿imapaqtaq TAYTA DIOSNINTSI kay leykunata, estatütukunata y mandamientukunata qomashqantsi?’ nir tapushuptiki
21 kayno tantiyatsinki: ‘Egiptucho Faraónpa ashmaynin kaykaptintsimi TAYTA DIOS munayninwan jorqamarqantsi.
22 Jorqamänantsipaqqa Faraónta y aylunkunata TAYTA DIOS mantsariypaq castigashqantami rikarqantsi.
23 Jorqarkamashpantsimi pushamarqantsi unay ayluntsita promitishqan nacionta qoykamänantsipaq.
24 Tsaymi TAYTA DIOSNINTSI nimarqantsi payta mantsakur lapan estatütunkunata cäsukunantsipaq. Tsaynöpami kananyaq waran waran ali kawayta qoykämantsi.
25 TAYTA DIOSNINTSI munashqanno ali kawanantsipaqqa yachatsimashqantsinöla lapan mandamientunkunata imaypis cumplishun’ ”.
Ichic wilacuycuna
^ mantsakuy, Diosta mantsakuy Tayta Diosta mantsakurqa tantiyantsi kuyakuq y perdonakuq karpis jutsa rurayta mana kachariqkunata castigashqantami (Éxo. 34.6; Heb. 10.31). Tayta Dios munayniyuq kashqanta rikar Israel runakunapis payta mantsakurqanmi (Éxo. 14.31; Jos. 4.24; 1Sam. 12.18). Tsaymi Tayta Diosta mantsakur payta adorar cäsukuntsi (Deut. 5.29; 10.12-13; Jos. 24.14) y runa mayintsiwan ali kawantsi (Lev. 25.17, 36, 43). Tayta Diosqa payta mantsakuqkunapa amïgunmi kaykan (Sal. 25.14).
^ 6.4 Mar. 12.29.
^ kuyay, Diosta kuyay Tayta Diosta kuyarqa lapan nishqankunatami cäsukuntsi (Deut. 6.5; 11.1; Juan 14.15, 21; 1Juan 5.3). Tsaynöpis Tayta Diosta kuyarqa runa mayintsitapis kuyantsimi (1Juan 4.20-21; 5.1).
^ 6.6-9 Deut. 11.18-20.
^ 6.10c Gén. 28.13.
^ mantsakuy, Diosta mantsakuy Tayta Diosta mantsakurqa tantiyantsi kuyakuq y perdonakuq karpis jutsa rurayta mana kachariqkunata castigashqantami (Éxo. 34.6; Heb. 10.31). Tayta Dios munayniyuq kashqanta rikar Israel runakunapis payta mantsakurqanmi (Éxo. 14.31; Jos. 4.24; 1Sam. 12.18). Tsaymi Tayta Diosta mantsakur payta adorar cäsukuntsi (Deut. 5.29; 10.12-13; Jos. 24.14) y runa mayintsiwan ali kawantsi (Lev. 25.17, 36, 43). Tayta Diosqa payta mantsakuqkunapa amïgunmi kaykan (Sal. 25.14).
^ 6.13 Mat. 4.10; Luc. 4.8.
^ 6.16a Éxo. 17.1-7.
