Deuteronomio 7:1-26
7 Tsaypita mastapis Moisés kayno nirqan: “Tänaykipaq kaq nacionman TAYTA DIOS chayaykatsir tsaycho taykaq atska nación runakunata ushakätsinqa.* Tsay runakunami kaykan heteo runakuna, gergeseo runakuna, amorreo runakuna, cananeo runakuna, ferezeo runakuna, heveo runakuna y jebuseo runakuna. Tsay qanchis nacionkunaqa qamkunapita mas atska y mas munayniyuqmi karkaykan.
2 Tsayno kaptinpis qamkunapa munaynikiman tsay runakunata TAYTA DIOS churamuptin paykunawan ima *pactutapis ama rurapäkunkitsu. Tsaypa trukanqa mana kuyapaypa lapanta ushakätsinki.
3 “Paykunawanqa ama tankitsu. Tsaynöla warmi tsurikikunata ni olqu tsurikikunatapis paykunapa tsurinwanqa ama tätsinkitsu.
4 Tsurikikuna paykunapa tsurinkunawan tarqa TAYTA DIOSMAN manana yärakur juk dioskunatami adoranqapaq. Juk dioskunata adoraptinqa Tayta Dios pasaypa rabyashpan juklami lapaykita ushakätsishunkipaq.
5 “Tsay nación runakunapa sacrificiuta rupatsina *altarninkunata juchutsir adorashqan wankakunatapis pakir ushapäkunki. *Asera diösata adorananpaq jawishqan qerukunata mutupäkunki y adorapäkushqan ïdulunkunatapis ninaman qaykapäkunki.*
6 Qamkunaqa karkaykanki TAYTA DIOS akrashqan *santu runakunami. Maytsay nación runakunapitami akrashushqanki kuyashqan runakuna kapäkunaykipaq”.*
Israel runakuna Tayta Diosta cäsukunanpaq nishqan
7 Tsaypita mastapis Moisés kayno nirqan: “Manami atska runakuna kashqantsipitatsu TAYTA DIOS akramashqantsi, sinöqa lapan nacionpita mas walkalaraq kaykaptintsimi.*
8 Kuyamashpantsimi TAYTA DIOS akramashqantsi. Payqa kuyamantsi Abrahamta, Isaacta y Jacobta promitishqanta cumplirmi. Tsaymi Egiptucho Faraónpa munaynincho kaykashqantsipita munayninwan jorqamashqantsi.
9 Tsayno kaykaptinqa shumaq tantiyakäriy TAYTA DIOS rasunpa Dios kashqanta. Payta *kuyar mandamientunkunata cumpliqkunataqa imaypis kuyanqami. Tsaynölami *pactu rurashqanta cumplir waranqa (1,000) *generación kashqanyaq yanapanqa.
10 Paypa contran sharkuqkunatami itsanqa pasaypa castigar mana shuyarätsiypa ushakätsinqa.*
11 Tsayno kaykaptinqa kanan junaq tantiyatsishqä mandamientunkunata, estatütunkunata y leyninkunata mana qonqaypa cumplipäkuy”.
Cäsukur bendicionta chaskipäkunanpaq kashqan
Levítico 26.3-13; Deuteronomio 28.1-14
12 Tsaypita mastapis Moisés kayno nirqan: “Kay leykunata cäsukur cumpliptikiqa unay ayluntsikunata kuyapar *pactu rurashqantami TAYTA DIOS imaypis cumplinqa.
13 Tsawraqa qamkunata kuyashushpayki unay ayluntsikunata promitishqan nacionman pushashunkipaq. Tsaychömi paypa bendicionninwan wamraykikunapis atska kanqa. Chakrayki shumaq wayuptinmi mikuynikipis atska kanqa. Vïnuykipis manami pishinqatsu, aceitikipis manami ushakanqatsu y wäkaykikuna, uyshaykikuna y cabraykikunapis tsaytsikamanmi miranqapaq.
14 Wakin nacionkunata qoshqanpitapis masmi bendicionninta qoshunkipaq. Tsaymi qamkunachöqa olqupis ni warmipis qoluq mana kanqatsu. Uywaykikunapis alimi miranqa.
15 Imayka qeshyakunapitapis TAYTA DIOSMI tsapäshunkipaq. Egipto runakunata fiyupa castigar nakatsishqanno manami nakatsishunkipaqtsu. Contrayki sharkuqkunatami itsanqa tsayno castigar nakatsinqapaq.
16 “TAYTA DIOS munaynikiman churamushqan runakunataqa mana kuyapaypami lapanta ushakätsinki. Paykuna adorashqan dioskunata ama adorapäkunkitsu. Tsaykunata adorarqa lutan ruraykunamanmi churakankipaq.*
17 “Tsaycho taq runakunata rikar ama yarpapäkunkitsu qamkunapita mas atska kaptin mana ushakätsinaykipaq kashqanta.
18 Atskaq kaptinpis ama mantsakunkitsu. Tsaypa trukanqa yarpapäkuy Faraónta y Egipto runakunata TAYTA DIOS imano castigashqantapis.
19 Tsaynöpis yarpapäkuy señalkunata, milagrukunata y espantaypaq kaqkunata rurar munayninwan TAYTA DIOS Egiptupita jorqamashqantsita. Egiptupita yarqamunantsipaq yanapamashqantsinömi mantsakuykashqayki runakunata ushakätsinaykipaqpis yanapashunkipaq.
20 “Makikipita qeshpiqkunata y pakakuqkunatapis TAYTA DIOS kikinmi qarqunqapaq.
21 Lapanpaq munayniyuq TAYTA DIOS yanapaykäshuptikiqa tsay runakunata ama mantsakärinkitsu.
22 Tsay runakunata TAYTA DIOS manami juklatsu ushakätsinqa, sinöqa walka walkalami qarqunqa. Lapanta jukla qarquptinqa chunyaq rikakuptin jirka uywakuna mirarmi ushakätsishunkipaq.
23 “TAYTA DIOSMI yanapashunki tsay runakunata ushakätsinaykipaq.*
24 Mandaq reykunata wanutsir ushaptiki paykunapa jutinkunapis qonqakanqapaq. Tsawraqa manami pipis qamkunata ichipäshunkipaqtsu.
25 Paykunapa ïdulunkunatapis lapanta rupatsir qoriwan y qellaywan enchapashqankunata ama quëdatsikunkitsu. Quëdatsikurqa lutan ruraykunaman churakarmi TAYTA DIOSTA pasaypa rabyanätsinki.
26 Tsayno kaykaptinqa wayikiman tsay ïdulukunata ni enchapashqan qorita ni qellayta ama apapäkunkitsu. Apaptikiqa qamkunatapis TAYTA DIOS ushakätsishunkipaqmi. Melanaypaq kaqta imatapis mana yatashqaykino tsaykunatapis ama yatapäkunkitsu”.
Ichic wilacuycuna
^ 7.1 Hech. 13.19.
^ pactu Pactuqa promitinakushqanta cumplinanpaq nishqanmi kaykan. Unay Testamentuchöqa Israel runakunawanmi pactuta Tayta Dios rurarqan. Tsaymi Tayta Dios promitirqan Israel runakunapa Diosnin kar paykunata imaypis yanapananpaq. Israel runakunanami Tayta Diosta promitirqan mandamientunkunata y leyninkunata cumplipäkunanpaq (Éxo. 6.7; 19.5-6; Lev. 26.3-12). Pactuta rurarmi uywata pishtar shuntashqan yawarta Israel runakunaman Moisés tsaqtsuparqan (Éxo. 24.8). Tsaynölami Jesucristo noqantsi rayku wanur yawarninta jichashpan mushuq pactuta rurarqan payta chaskikuqkunata jutsankunapita perdonar salvananpaq (Luc. 22.20; Heb. 10.16-17).
^ altar Altarkunaqa karqan rumiwan perqashqa y qerupita ruraykur jananpa y rurinpa bronciwan enchapashqami. Tsay altarkunachömi uywakunata rupatsir runakuna jutsankunapita perdonashqa kananpaq cürakuna Tayta Diosta manakäriq. Tsaynölami templu rurincho qoripita rurashqa taksha altarpis karqan. Tsaychömi cürakuna inciensuwan qoshtatsiq. Rumipita perqashqa altar imano kashqanta musyanaykipaq rikanki 2Sam. 24.18-cho kaq dibüjuta. Tayta Diosta mana cäsukuq runakunapis altarkunata ruraykurmi ïdulukunata adorapäkuq (Éxo. 30.1-10; Deut. 27.5-6; 2Rey. 16.10-16; 2Crón. 4.1).
^ Asera Aseraqa cananeo runakuna adorashqan diösami karqan. Paykunaqa yarpapäkurqan tsay diösa imatapis miratsiq kashqantami. Aserata adorananpaqmi raku qerukunata jawipäkuq. Cananeo runakunaqa yarpapäkurqan tsay jawishqan qerukunacho Asera kashqantami (Éxo. 34.13; Deut. 7.5; 12.3; 16.21; 1Rey. 16.33; 18.19; 2Rey. 13.6).
^ 7.5 Deut. 12.3.
^ santu; sagrädu Tayta Dios santu kashqanta nirqa jutsaynaq kashqanta y pipis ni imapis payman mana tinkushqantami niykan (Isa. 5.16; 6.3; Apoc. 4.8; 15.4).
^ 7.7 Juan 15.16; 1Juan 4.10.
^ kuyay, Diosta kuyay Tayta Diosta kuyarqa lapan nishqankunatami cäsukuntsi (Deut. 6.5; 11.1; Juan 14.15, 21; 1Juan 5.3). Tsaynöpis Tayta Diosta kuyarqa runa mayintsitapis kuyantsimi (1Juan 4.20-21; 5.1).
^ pactu Pactuqa promitinakushqanta cumplinanpaq nishqanmi kaykan. Unay Testamentuchöqa Israel runakunawanmi pactuta Tayta Dios rurarqan. Tsaymi Tayta Dios promitirqan Israel runakunapa Diosnin kar paykunata imaypis yanapananpaq. Israel runakunanami Tayta Diosta promitirqan mandamientunkunata y leyninkunata cumplipäkunanpaq (Éxo. 6.7; 19.5-6; Lev. 26.3-12). Pactuta rurarmi uywata pishtar shuntashqan yawarta Israel runakunaman Moisés tsaqtsuparqan (Éxo. 24.8). Tsaynölami Jesucristo noqantsi rayku wanur yawarninta jichashpan mushuq pactuta rurarqan payta chaskikuqkunata jutsankunapita perdonar salvananpaq (Luc. 22.20; Heb. 10.16-17).
^ generación Juk generacionqa kaykan runa yurishqanpita hasta tsurin yurishqanyaqmi. Tsurinkuna yuriptinnami juk generación qalaykun. Wilkankuna yuriptinnami juk generación qalaykun. Wilkankunapa tsurinkuna yuriptinnami juk generación qalaykun. Tsaynölami imayyaqpis kanqa (Éxo. 20.6; Deut. 5.10; 7.9; 1Crón. 16.15; Sal. 105.8; Mat. 1.17).
^ 7.9-10 Éxo. 20.5-6; 34.6-7; Núm. 14.18; Deut. 5.9-10.
^ pactu Pactuqa promitinakushqanta cumplinanpaq nishqanmi kaykan. Unay Testamentuchöqa Israel runakunawanmi pactuta Tayta Dios rurarqan. Tsaymi Tayta Dios promitirqan Israel runakunapa Diosnin kar paykunata imaypis yanapananpaq. Israel runakunanami Tayta Diosta promitirqan mandamientunkunata y leyninkunata cumplipäkunanpaq (Éxo. 6.7; 19.5-6; Lev. 26.3-12). Pactuta rurarmi uywata pishtar shuntashqan yawarta Israel runakunaman Moisés tsaqtsuparqan (Éxo. 24.8). Tsaynölami Jesucristo noqantsi rayku wanur yawarninta jichashpan mushuq pactuta rurarqan payta chaskikuqkunata jutsankunapita perdonar salvananpaq (Luc. 22.20; Heb. 10.16-17).
^ 7.12-16 Deut. 11.13-17.
^ 7.18-23 Éxo. 7.8—12.30; 14.23-31; 23.27-30.
