Efesios 1:1-23
1 Éfeso* markacho salvashqa kaqkuna:
Noqa Pablo, Jesucristupa *apostolnin kanäpaq Tayta Dios akramashqa kaptinmi qamkunapaq kay cartata apaykätsimü. Jesucristo munashqanno kawarmi qamkunaqa Tayta Diospana karkaykanki.
2 Papänintsi Tayta Dios y Señor Jesucristo kuyapäshushpayki ali kawapäkunaykipaq yanapaykuläshunki.
Tayta Diosta agradëcikushqan
3 ¡Señor Jesucristupa Papänin Tayta Dios alabashqa kaykulätsun! Jesucristucho kaptintsimi gloriacho kaykaq lapan bendicionninkunata qomashqantsi.
4 Kay patsata manaraq kamarmi Jesucristuman churamashpantsi Tayta Dios akramarqantsi paypa nawpancho jutsaynaq y *santu kanantsipaq.
5 Kuyamashpantsimi kikin munashqanno destinamarqantsi Jesucristo kayninpa wamran kanantsipaq.
6 Kuyashqan Tsurinwan tsayno destinamashqantsipitami imaypis payta alabashun.
7 Kuyapäkuq karmi Tsurinpa yawarninwan rantimashpantsi lapan jutsantsikunata perdonamashqantsi.*
8 Pasaypa kuyapämashpantsimi y yachayta qomashpantsimi
9 runakuna mana musyashqanta Tayta Dios musyatsimashqantsi.
10 Tsaymi musyatsimashqantsi jana patsacho kaqkunata y kay patsacho kaqkunatapis pay destinashqan junaq Jesucristupa makinman lapanta churananpaq kashqanta.
11 Kikin munashqanno lapantapis ruraq karmi noqantsitapis Jesucristucho kaptintsi Tayta Dios destinamashqantsi herenciantsita* chaskinantsipaq.
12 Paymi kamakätsishqa Israel runakuna Jesucristuman puntata yärakur payta alabapäkunanpaq.*
13 Qamkunapis ali wilakuyninta mayarmi Jesucristuman yärakur salvakärishqanki. Tsaynöpami promitishqan Espíritu Santuwan* Tayta Dios shonquykita sëllashushqanki.
14 Espíritu Santuta qomashpantsimi Tayta Dios musyatsimantsi herenciantsita qomänantsipaq kashqanta y wamran kanantsipaq rantimashqantsita. Tsayno salvamashqantsipitami imaypis payta alabashun.
Wawqi panikunapaq Tayta Diosta manakushqan
15 Tsaymi Señor Jesucristuman shumaq yärakärishqaykita musyar y wawqi panikunawan kuyanakushqaykita musyar
16 Tayta Diosta qamkunapaq manakur imaypis agradëcikü.
17 Tsaynöpis Señornintsi Jesucristupa Papänin munayniyuq Tayta Diostami manakü Espíritu Santuwan tantiyatsishuptiki payta *reqipäkunaykipaq.
18 Shonquykicho tsayno tantiyatsishuptikimi musyapäkunkipaq Tayta Dios qayashushpayki imapaq salvashushqaykita, pasaypa ali herenciata chaskishqaykita*
19 y payman yärakuqkunata munayninwan shumaq yanapashqanta.
20 Tsay munayninwanmi Jesucristuta kawarirkatsimur gloriacho alawqa kaq nawpanman jamatsishqa.*
21 Tsaynöpami Jesucristuta Tayta Dios churashqa kay vïdacho y juk vïdachöpis munayniyuq kananpaq. Tsaymi *angilpitapis, *supaypitapis y pïmay runapitapis mas munayniyuq kaykan.
22 Tsayno munayniyuq kaptinmi lapan imaykatapis paypa munayninman Tayta Dios churashqa.* *Iglesiata kuyarmi payta churashqa lapanpapis mandaqnin kar uman kananpaq.
23 Noqantsinami iglesian kar cuerpun kaykantsi.* Tsaymi imaypis yanapaykämantsi munashqanno kawanantsipaq. Paypa makinchömi lapanpis kaykan.
Ichic wilacuycuna
^ apóstol Apóstol ninanqa “wilakunanpaq kachashqan runa” ninanmi. Apostolkunataqa Jesucristumi kacharqan maytsaymanpis aywar wilakuyninta wilakunanpaq. Tsay apostolkunaqa karqan chunka ishkaymi. Jesucristo wanushqanpita kawarirkamurmi Pablutapis yuriparkur churarqan apóstol kananpaq (Mar. 3.14; Luc. 6.13-16; 1Cor. 9.1-2). Apostolkunatami Jesucristo nirqan Espíritu Santu shamur lapanta yachatsinanpaq kashqanta y Jesucristo yachatsishqanta yarpätsinanpaq kashqanta (Juan 14.25-26; 16.12-15). Tsaynöpami Jesucristupa apostolninkuna y paykuna autorizashqan runakuna Mushuq Testamentuta qelqapäkurqan.
^ 1.1 Hech. 18.19-21; 19.1.
^ santu; sagrädu Tayta Dios santu kashqanta nirqa jutsaynaq kashqanta y pipis ni imapis payman mana tinkushqantami niykan (Isa. 5.16; 6.3; Apoc. 4.8; 15.4).
^ 1.13a Luc. 24.49; Juan 14.26; 16.13-15; Hech. 1.4; 2.33.
^ 1.13b 2Cor. 1.22; Efe. 4.30.
^ reqiy, Diosta reqiy Tayta Diosta reqirqa payman yärakuntsi y pay munashqanno kawar kushikuntsi. Tsaynöpis tantiyantsi kuyakuq kashqanta, munayniyuq kashqanta, jutsaynaq santu kashqanta, juzgakuq kashqanta, alilata ruraq kashqanta y promitishqanta imaypis cumpliq kashqanta.
^ 1.18 Éxo. 34.9; Deut. 9.26, 29; 32.9; 1Rey. 8.53; Sal. 74.2; 135.4; Isa. 19.25; Jer. 10.16; 51.19.
^ 1.20 Sal. 110.1.
^ ángel Kay patsata manaraq kamarmi angilkunata Tayta Dios kamarqan payta sirvinanpaq. Angilkunaqa manami imaypis wanuntsu. Tayta Diospa nawpancho karmi imaypis alabarkaykan (Isa. 6.1-3; Apoc. 5.11-12).
^ supay Supaykunaqa Tayta Diosta mana cäsukuq angilkunami kaykan. Paykunami Satanás mandashqanta rurar runakunata qeshyatsin, löcuyätsin, chikinakatsin y yarpayninta pantakätsin Tayta Diospa ali wilakuyninta mana tantiyapäkunanpaq (Mat. 12.43-45; Mar. 1.23-26; Luc. 8.2). Masta musyanaykipaq liyinki Satanáspita tantiyatsikuyta.
^ iglesia Iglesiaqa manami Diosta alabana wayilatsu, sinöqa Jesucristuta chaskikuqkunami kaykan (Hech. 13.1; 14.23; 20.28; Rom. 16.1; Efe. 1.22; 5.23).
^ 1.22-23 Col. 1.18, 24.
