Efesios 2:1-22
2 Nawpataqa qamkuna jutsata rurar wanushqanömi kapäkurqayki.*
2 Wakin runakunanölami qamkunapis Tayta Diosta mana cäsukur *Satanáspa makincho kawapäkurqayki.
3 Tsaynölami lapantsipis shonquntsi munashqanta rurar y mana alita yarpar kawarqantsi. Tsayno kawashqantsipitami wakin runakunatano Tayta Dios castigamänantsipaq karqan.*
4 Tsayno kaykaptintsipis Tayta Dios kuyapäkuq karmi pasaypa kuyamashqantsi.
5 Tsaymi jutsa ruraycho wanushqano kaykaptintsipis Jesucristuta wanushqanpita kawaritsimur noqantsitapis wanushqano kashqantsipita kawaritsimashqantsi.* Kuyapäkuq karmi salvamashqantsi.
6 Jesucristuwan kawaritsimashqantsinömi gloriacho paywan jamatsimashqantsi.
7 Tsayno jamatsimashqantsi Jesucristucho kaptintsi pasaypa kuyapämashqantsita shamuq watakunacho pïmaypis tantiyakunanpaqmi.
8 Tayta Dios kuyapäkuq karmi Jesucristuman yärakuptintsi salvacionta qaramashqantsi*. Manami kikintsipitatsu ni alita rurashqantsipitatsu salvacionta tarishqantsi, sinöqa Tayta Diospitami. Tsaymi pipis alabakunqatsu kayno nir: “Alikunata rurashqäpitami Tayta Dios salvamashqa”.
9 -
10 Jesucristucho kaptintsimi alikunata rurar kawanantsipaq mushuq kawayta Tayta Dios qomashqantsi. Tsayno kawanantsipaqqa unaypita patsami destinamarqantsi.
Israel runakunatapis mana Israel runakunatapis Jesucristo amistatsishqan
11 Ama qonqapäkuytsu mana Israel runa kar nawpata imano kashqaykitapis. Israel runakunaqa *señalakushqa karmi señalaküni kashqaykipita manakaqman churapäkushurqayki.
12 Jesucristupa wilakuynintapis manami musyapäkurqaykitsu. Israel runapitapis jäpami kapäkurqayki. Tayta Dios promitishqanta chaskinaykipaq rurashqan *pactukunapis manami qamkunapaqtsu karqan. Kay patsacho Diosniynaq oqrakashqami kawapäkurqayki.
13 Tayta Diospita karucho kashqa karpis Jesucristucho karnami yawarninta jichashqanpita Tayta Diospa nawpanchöna karkaykanki.
14 Jesucristo tsayno salvashushqanki ali kawayta qomaqnintsi karmi.* Mana rikanakunanpaq tsaparaq tapiata juchutsiqnömi Israel runa kaptintsipis mana Israel runa kaptintsipis juk aylunöla kanantsipaq shuntamashqantsi.
15 Tsayno shuntamashqantsi Israel runakunapa leyninkunata, mandamientukunata y reglamentukunata anularmi.* Jesucristucho mushuq runa kanantsipaqmi Israel runakunatapis y mana Israel runakunatapis shuntamashqantsi.
16 Cruzcho wanurmi Tayta Dioswan amistatsimashqantsi mana chikinakur alina kawanantsipaq.*
17 Kay patsaman Jesucristo shamurmi Tayta Diospa makincho ali kawanantsipaq kaq wilakuyta wilakurqan. Tsay wilakuy kaykan Tayta Diospita karucho kaykaq mana Israel runakunapaq y paypa nawpancho kaykaq Israel runakunapaqmi.*
18 Tsaymi Israel runa kaptintsipis mana Israel runa kaptintsipis Tayta Diosta imay hörapis manakunantsipaq Jesucristo kayninpa Espíritu Santu yanapaykämantsi.
Tayta Dios täkunan templu kashqantsi
19 Tsayno kaykaptinqa mana Israel runakuna karpis mananami jäpanatsu karkaykanki, sinöqa Tayta Diospa wamrankuna karmi lapan salvashqa kaqkunawan tsay aylulana karkaykanki.
20 Ali cimientushqa wayinömi karkaykanki. Tsay wayipa cimientunqa *apostolkuna y profëtakuna yachatsishqanmi kaykan. Jesucristunami wayipa esquïnancho mas alinnin kaq rumi kaykan.*
21 Jesucristuman yärakuptintsimi rumita shumaq perqaqno noqantsitapis churaykämantsi Tayta Diospa *sagrädu templun kanantsipaq.
22 Qamkunapis Jesucristuman yärakurmi templuta sharkatsishqa rumino karkaykanki.* Tsay templuchömi Tayta Diospa Espïritun taykan.
Ichic wilacuycuna
^ 2.1 Juk ishkay castellänu traduccionkunachöqa versïculu 5-pita jorqur kayno nirmi yapan: Tsayno kaptikipis kananqa mushuq kawaytami qoshurqayki.
^ Satanás Satanásqa supaykunapa mandaqninmi kaykan. Payqa manami Diosnötsu maytsaychöpis kaykan. Satanáspa wakin jutinkunami kaykan diablu y Beelzebú (Mar. 1.13; Hech. 13.10).
^ 2.8-9 Wakin runakunaqa regalamashqantsi nipäkun.
^ señalakushqan Señalakuyqa chiwlakunanpa punta qaranta kutsurir jorqushqanmi kaykan. Abrahamwan Tayta Dios pactuta rurashqanta yarpashpanmi Israel runakunaqa tsayno señalakärin. Tsaymi olqu wamrakunata yurishqanpita pusaq junaqniyuq kaykaptin señalapäkun. Tsaytami castellänucho “circuncisión” nipäkun (Gén. 17.9-14; Col. 2.11; 1Cor. 7.18-20).
^ pactu Pactuqa promitinakushqanta cumplinanpaq nishqanmi kaykan. Unay Testamentuchöqa Israel runakunawanmi pactuta Tayta Dios rurarqan. Tsaymi Tayta Dios promitirqan Israel runakunapa Diosnin kar paykunata imaypis yanapananpaq. Israel runakunanami Tayta Diosta promitirqan mandamientunkunata y leyninkunata cumplipäkunanpaq (Éxo. 6.7; 19.5-6; Lev. 26.3-12). Pactuta rurarmi uywata pishtar shuntashqan yawarta Israel runakunaman Moisés tsaqtsuparqan (Éxo. 24.8). Tsaynölami Jesucristo noqantsi rayku wanur yawarninta jichashpan mushuq pactuta rurarqan payta chaskikuqkunata jutsankunapita perdonar salvananpaq (Luc. 22.20; Heb. 10.16-17).
^ 2.14 Juan 14.27.
^ 2.15 Rom. 10.4; Heb. 8.13.
^ 2.17 Isa. 57.19.
^ apóstol Apóstol ninanqa “wilakunanpaq kachashqan runa” ninanmi. Apostolkunataqa Jesucristumi kacharqan maytsaymanpis aywar wilakuyninta wilakunanpaq. Tsay apostolkunaqa karqan chunka ishkaymi. Jesucristo wanushqanpita kawarirkamurmi Pablutapis yuriparkur churarqan apóstol kananpaq (Mar. 3.14; Luc. 6.13-16; 1Cor. 9.1-2). Apostolkunatami Jesucristo nirqan Espíritu Santu shamur lapanta yachatsinanpaq kashqanta y Jesucristo yachatsishqanta yarpätsinanpaq kashqanta (Juan 14.25-26; 16.12-15). Tsaynöpami Jesucristupa apostolninkuna y paykuna autorizashqan runakuna Mushuq Testamentuta qelqapäkurqan.
^ 2.20 Isa. 28.16; Mat. 21.42.
^ sagrädu Liyinki santupita tantiyatsikuyta.
^ 2.22 1Cor. 3.16-17; 1Ped. 2.4-5.
